نازارباەۆ اۋلەتىنىڭ اكتيۆتەرى ەپتەپ ەلدىڭ يەلىگىنە قايتىپ جاتىر. قارجى مونيتورينگ اگەنتتىگى داريعانىڭ قازاقستان – قىتاي شەكاراسىنداعى بيزنەس سحەماسىنا تەرگەۋ جۇرگىزۋدە. بۇل تۋرالى dalainside تەلەگرام ارناسى جازىپتى.

سەبەپ: قىتاي مەن قازاق شەكاراسىنداعى «نۇرلى جول» بەكەتىنە قاراستى ۇزىندىعى 3 km (!) جولدى نازارباەۆانىڭ «Eurotransit Nur Zholy» كومپانياسى پايدا كوزىنە اينالدىرعان.

سحەما: جەتىسۋ وبلىسى، پانفيلوۆ اۋدانى قازاقستان - قىتاي شەكاراسى ماڭىنداعى بەيتاراپ اۋماقتا «نۇرلى جول» وتكىزۋ پۋنكتى بار.

قازاق شەكاراسىنان وتكەسىن ساۋداگەرلەر نەيترالدى اۋماقتا ورنالاسقان ساۋدا ورتالىعىنا بارىپ، وزدەرىنە كەرەكتىنى ساتىپ الادى. بۇدان كەيىن جۇك پەن جولاۋشىنى جوعارىدا ايتقان «Eurotransit Nur Zholy-نىڭ» كولىكتەرى شەكارا ماڭىنا دەيىن جەتكىزەدى. شەكاراعا دەيىنگى جول ۇزاقتىعى نەبارى ءۇش-اق شاقىرىم...

جۇرت وسى ءۇش شاقىرىمدى ءجۇرىپ ءوتۋ ءۇشىن داريعاعا تيەسىلى كومپانيانىڭ لوگيستيكالىق قىزمەتىنە جۇگىنىپ، قوماقتى اقشا تولەۋگە ءماجبۇر بولعان.

جۇك جانە جولاۋشى تاسىمالداۋ ىسىمەن اينالىساتىن وزگە كومپانيالاردى بۇل جەرگە جولاتپاعان. وسىلايشا «Eurotransit Nur Zholy» كومپانياسى قورعاستاعى جەكە-دارا مونوپوليسكە اينالعان

فاكت: «نۇرلى جول» ورتا ازياداعى ەڭ ۇلكەن وتكىزۋ بەكەتى.

مۇندا تەك «Eurotransit Nur Zholy» كومپانياسىنىڭ كولىكتەرى عانا قىزمەت كورسەتىپ كەلگەن. تاڭعالماڭىز، بۇل ەسكى قازاقستان.

نازارباەۆاعا تيەسىلى «نۇرلى جول» بەكەتىن سالۋعا «ەۋرازيا بانكىنەن» 100 ملن دوللار بولىنگەن.

قارجى مونيتورينگى «Eurotransit Nur Zholy» جشس-ىن تەكسەرۋ كەزىندە قىتايدىڭ بەيتاراپ اۋماعىنان قازاقستانعا جۇك تاسيتىن جالعىز وپەراتور بولا تۇرا، قىزمەت قۇنىن بالەنباي ەسە وسىرگەنىن دالەلدەدى.

داريعاعا تيەسىلى كومپانيا مونوپوليستىك قىزمەتتەن 4,2 ملرد تەڭگە تابىس تاپقان. سوزگە كەلمەي كىناسىن مويىنداعان كومپانيا باسشىلىعى مەملەكەتكە قۇنى 5,3 ملرد تەڭگەدەن اساتىن اكتيۆتەرىن (3,6 گەكتار جەر تەلىمى بار) اۋدارۋ تۋرالى ءوتىنىش-حات بەرىپتى.

اگەنتتىك كومپانيانىڭ بىلىقتارىن تەكسەرۋدى جالعاستىرۋدا.

Shishkin_like ارناسىنىڭ جازۋىنشا، قازاقستان-قىتاي شەكاراسىنداعى وتكىزۋ پۋنكتى «Eurasia Transit Holding LTD» سەرىكتەستىگىنىڭ ەنشىلەس كومپانياسى.

«Eurasia Transit Holding LTD» قۇرىلتايشىلارىنا قاراساڭىز كەلەسى پەرسونالار الدىڭىزدان شىعادى:

1. دانيار قايرات - QazaqGaz كومپانياسىنىڭ ەكس-باسشىسى، داريعا نازارباەۆانىڭ جۇبايى دەلىنگەن قايرات شارىپباەۆتىڭ ۇلى.

2. ۆەنەرا ءشايجۇنىسوۆا - داريعا نازارباەۆانىڭ كىشى قىزى.

بۇدان ىلگەرىدەگى «Eurotransit Nur Zholy» داريعا نازارباەۆا مەن قايرات شارىپباەۆتىڭ باقىلاۋىندا بولعانىن توپشىلاۋعا بولادى.

كومپانيا 2018 جىلدان بەرى قازىناعا 485 ملن تەڭگە سالىق تولەگەن. ەڭ قىزىعى سالىقتىڭ سۇبەلى بولىگىن (318 ملن تەڭگەنى) قاڭتار وقيعاسىنان كەيىن اپىل-عۇپىل اۋدارا باستاعان. كومپانيانىڭ 2022 جىلعى تازا تابىسى 1,4 ملرد تەڭگەنى قۇراعانىن ايتا كەتۋ كەرەك.

Abai.kz