كەشە مولدوۆا استاناسىندا كوپ ادامدىق ميتينگ ءوتتى. ۇيىمداستىرۋشى: «شور» اتتى وپپوزيتسيالىق ستاتۋسى بار پارتيا. ولار: «مايا ساندۋ، بيلىكتەن كەت!»، - دەپ ۇرانداتتى. جاقتاستارىن الاڭعا رەسەيشىل پارتيانىڭ ۆيتسە-ءتورايىمى مارينا تاۋبەر باستاپ شىقتى.

«شور» پارتياسى بىلتىر رەسەي ۋكرايناعا سوعىس اشقاندا، پۋتيننىڭ سوعىسىن قوس قولداپ قولداعان پارتيا. ورىس بيلىگىنە ادالدىعىن دالەلدەۋ ءۇشىن ونىڭ ارناۋلى وكىلدەرى ماسكەۋگە بىرنەشە مارتە بارىپ تا قايتقان. ەسەسىنە «شور» پارتياسىنىڭ توراعاسى يلان شورعا اقش بيلىگى سانكتسيا سالدى.

ۋكراينا سياقتى مولداۆانىڭ دا پۋتين بيلىگىنەن تەپەرىش كورىپ، جەرىنەن ايىرىلعانى بەلگىلى. رەسەيدىڭ اسكەرى ىرگەسىندە تۇر. كەڭەس وداعىن قايتا قۇرۋدى كوزدەيتىن ورىس باسشىسى «ءبولىپ ال دا بيلەي بەر» جىمىسقى ءتاسىلىن ولارعا دا قولدانعان. كرەملدىڭ تىزەسى باتقان مولداۆانىڭ ەكونوميكاسىن كوتەرىپ، قاۋىپسىزدىگىن قامتاماسىز ەتۋ ءۇشىن ناتو-عا، ەۋرووداققا كىرۋگە ۇمتىلۋى زاڭدى دا. ۋكراينا سوعىسى كورسەتكەندەي تەرىستىك كورشىمىز ولاردىڭ دا ەرىكتى تاڭداۋىنا جاۋ كوزبەن قاراپ وتىر.

اقپاننىڭ 13-ءى كۇنى مولدوۆا پرەزيدەنتى مايا ساندۋ: «رەسەي سىرتقى كۇشتەردى پايدالانىپ مولدوۆا بيلىگىن اۋدارماقشى، ەۋرووداققا كىرۋىنە كەدەرگى جاساپ، ۋكراينا سوعىسىنا تارتپاقشى»، - دەپ مالىمدەگەن ەدى. ونىڭ مۇنداي پىكىر بىلدىرۋىنە زەلەنسكيدىڭ: «ءبىز كرەملدىڭ مولداۆا بيلىگىن تاقتان تايدىرۋدى كوزدەيتىن قۇپيا قۇجاتىن بايقادىق»، - دەگەن ءسوزى مەن ميتينگ كەسىرىنەن 10-شى اقپاندا ەل ۇكىمەتىنىڭ بۇتىندەي وتستاۆكاعا كەتۋى سەبەپ بولعان ءتارىزدى. زەلەنسكيدىڭ سوزىنە مايا ساندۋدان بۇرىن رامازان قادىروۆ الەۋمەتتىك جەلى ارقىلى: «مىنا تۇرعان مولدوۆا نە ءتايىرى، كوكەمىز ايتسا ء(پۋتيندى مەڭزەيدى) الىستاعى امەريكاعا دا بارامىز. وعان ءبىزدىڭ اسكەري، تەحنيكالىق الەۋەتىمىز جەتەدى»، -دەگەن ماعىنا دا جاۋاپ قايتارىپ ەدى.

مولداۆا پرەزيدەنتى ءسوزىن ناقتىلاپ: «كرەمل رەسەي، بەلارۋس، چەرنوگوريا، سەربيا ازاماتتارىن  مولداۆاعا كوپتەپ كىرگىزىپ، دۇربەلەڭ تۋدىرىپ، مولداۆانىڭ زاڭدى بيلىگىن اۋدارىپ، رەسەيگە باعىنىشتى قۋىرشاق ۇكىمەت جاساقتاعىسى كەلەدى، ءبىز وعان جول بەرمەيمىز، بەيبىتشىلىك پەن قوعامدىق ءتارتىپتى قورعايمىز، ەل مەن مەملەكەتتىڭ قاۋىپسىزدىگىن ساقتاپ قالامىز»، - دەگەن ەدى.

كەشەگى ميتينگ مايا ساندۋ حانىمنىڭ كۇدىگىنىڭ بەكەر ەمەسىن كورسەتكەندەي.

Abai.kz