استانادا ەكس-پرەزيدەنتتىڭ كەنجە قىزى ءاليا نازارباەۆاعا قاتىسى بار اتىشۋلى «وكم وپەراتورى» كومپانياسىنا قاتىستى باستى سوت وتىرىسى ءوتىپ جاتىر، دەپ حابارلايدى Ulysmedia.kz.

ايىپتالۋشىلار قاتارىندا بۇرىنعى ەكولوگيا ۆيتسە-ءمينيسترى احمەتجان پىرىمقۇلوۆ، وكم وپەراتورىنىڭ بۇرىنعى توراعاسى مەدەت قۇمارعاليەۆ، بۇرىنعى قارجى ديرەكتورى رۋستام تەمىربەك جانە بۇرىنعى باس ديرەكتور سۆەتلانا كوروتەنكو بار.

پروكۋرور ايىپتاۋ اكتىسىن وقىعاننان كەيىن سۋديا سوتتالۋشىلاردان تاعىلعان «ايىپ تۇسىنىكتى مە جانە ونىمەن كەلىسەسىز بە؟» دەپ سۇرادى.

«مويىندامايمىن، ەشقانداي قىلمىس جاساعان جوقپىن»، - دەپ جاۋاپ بەردى احمەتجان پىرىمقۇلوۆ.

قۇمارعاليەۆ تە تاعىلعان ايىپپەن كەلىسپەيتىنىن ايتىپ، وعان دالەلى بارىن مالىمدەدى.

رۋستام تەمىربەك تاعىلعان ايىپتىڭ ءمانىن تۇسىنبەيتىنىن مالىمدەدى. ول «وكم وپەراتورى» جشس كادەگە جاراتۋ زاڭمەن بەكىتىلگەنگە دەيىن ءاليا نازارباەۆانىڭ تىركەۋىندە بولعانىن ايتتى. ونىڭ ۇستىنە، ول ءىس بويىنشا كورسەتىلگەن كومپانيالاردىڭ بارلىعى نازارباەۆاعا تيەسىلى ەكەنىن اتاپ ءوتتى.

«ونىڭ ءۇي كۇتۋشىسى ەمەس، ءاليا نازارباەۆانىڭ ءوزى ەدى. ول تىكەلەي نەگىزىن قالاۋشى. كىنام نەدە ەكەنىن تۇسىنبەيمىن، ەكولوگيالىق كودەكسكە قاتىستى بارلىق مىندەتتەمەلەر ورىندالدى. ايىپتاۋلار قيسىنسىز، مەن كىنانى مويىندامايمىن»، - دەدى تەمىربەك.

سۆەتلانا كوروتەنكو دا تاعىلعان ايىپپەن كەلىسپەيدى.

«مەن بۇل اكتپەن تۇبەگەيلى كەلىسپەيمىن. تۇسىندىرمە دە، دالەلدى بولىك تە جوق. ەشقانداي كەلىسىم بولعان ەمەس. اكتتى وقىعاندا مەنىڭ فاميليامنىڭ ورنىنا باسقا كىسىنىڭ ەسىمى بولۋى كەرەك دەگەن وي پايدا بولدى. سول ەسىمنىڭ نەگە اتالماعانىن تۇسىنەمىن. ولاي بولسا، مەن مۇندا بولماس تا ەدىم. پروكۋرور ايتقانداي، مەن 20 ادامنان تۇراتىن جۇمىس توبىن، ۆيتسە-مينيسترلەردى اداستىردىم-مىس. بۇل ابسۋرد. مەن قىلمىس جاساعان جوقپىن. مەن كىنانى مويىندامايمىن »، - دەدى كوروتەنكو.

Abai.kz