كونفەرەنتسيامىزدىڭ كەزەكتى قوناعى -  «دات» جوباسىنىڭ باس وقىرمانى ەرمۇرات باپي وقىرماندار تاراپىنان كەلىپ تۇسكەن ساۋالداردىڭ العاشقى لەگىنە جاۋاپ بەرىپ وتىر.

ەرمۇرات مىرزا لاتىن الىپبيىنە قاتىستى ساۋالعا جاۋاپ بەرە كەلىپ: «مەن دە قازاق بالاسى بولعاندىقتان، كوزقاراسىم دۇرىس: ورىستىق، قۇلدىق مۇرادان قۇتىلۋ ءۇشىن، لاتىنعا ما، رۋنا جازۋىنا ما اۋىسۋ - ايتەۋىر ءتۇبى كيريلليتسادان كەتۋ كەرەك. بىراق كەتەر كەزدى ەرىككەندە ۋاق-ۋاق سامميتتەر مەن كورمەلەر وتكىزۋدى ەرمەك قىلاتىن اقوردا ەمەس، ازاماتتىق قوعام مەن مامان-عالىمدار قاۋىمداستىعى شەشۋى كەرەك. ال كيريلليتسادان كەتۋدىڭ وڭى - سوڭعى ەكى ءجۇز جىلدا الەمدىك كوشتە كەرىتارتپا كەسىرگە ۇشىراعان سلاۆيان قاۋىمى قارپىنەن الەمدىك وركەنيەتكە ءوتۋ دەپ تۇسىنەمىن. تەرىسى - ءبىزدىڭ ءتىلىمىز ەمەن ەسىكتى كەڭسەلەرگە كىرمەيىنشە، لاتىنمەن لاعىپ، قايدا بارار ەكەنبىز دەگەن ويعا قالا بەرەم» - دەگەن ويىن جەتكىزەدى.

كونفەرەنتسيامىزدىڭ كەزەكتى قوناعى -  «دات» جوباسىنىڭ باس وقىرمانى ەرمۇرات باپي وقىرماندار تاراپىنان كەلىپ تۇسكەن ساۋالداردىڭ العاشقى لەگىنە جاۋاپ بەرىپ وتىر.

ەرمۇرات مىرزا لاتىن الىپبيىنە قاتىستى ساۋالعا جاۋاپ بەرە كەلىپ: «مەن دە قازاق بالاسى بولعاندىقتان، كوزقاراسىم دۇرىس: ورىستىق، قۇلدىق مۇرادان قۇتىلۋ ءۇشىن، لاتىنعا ما، رۋنا جازۋىنا ما اۋىسۋ - ايتەۋىر ءتۇبى كيريلليتسادان كەتۋ كەرەك. بىراق كەتەر كەزدى ەرىككەندە ۋاق-ۋاق سامميتتەر مەن كورمەلەر وتكىزۋدى ەرمەك قىلاتىن اقوردا ەمەس، ازاماتتىق قوعام مەن مامان-عالىمدار قاۋىمداستىعى شەشۋى كەرەك. ال كيريلليتسادان كەتۋدىڭ وڭى - سوڭعى ەكى ءجۇز جىلدا الەمدىك كوشتە كەرىتارتپا كەسىرگە ۇشىراعان سلاۆيان قاۋىمى قارپىنەن الەمدىك وركەنيەتكە ءوتۋ دەپ تۇسىنەمىن. تەرىسى - ءبىزدىڭ ءتىلىمىز ەمەن ەسىكتى كەڭسەلەرگە كىرمەيىنشە، لاتىنمەن لاعىپ، قايدا بارار ەكەنبىز دەگەن ويعا قالا بەرەم» - دەگەن ويىن جەتكىزەدى.

- ەرەكە, سىزگە, ءسىز شىعارىپ وتىرعان گازەتكە ايتارىم جوق, ريزامىن! وزىڭىزبەن ارىپتەس بولىپ جۇمىس باستاعان, اشىق ويلى ازامات سانالعان ءبىر توپ - ج.قورعاسبەك, ن. ءجۇسىپ ت.ب-لار كورىنبەيدى عوي, قازىر قايدا ءجۇر وسى?

- سۇراعىڭىزدىڭ استارىن اڭدادىم... ال اتالعان ازاماتتارعا قاتىستى استارسىز ايتار بولسام،  اركىم ءوز سوقپاعىندا ءجۇر: بىرەۋ - جار جاعالاپ، ەندى بىرەۋ - جار ساعالاپ...  ال جۇسىپبەك پەن نۇرتورە مەملەكەتتىك قىزمەتپەن دەڭگەيلەس شارۋادا: ول جەردە «اشىق ويلى ازامات سانالعاندار» ساناتقا الىنبايدى - «قوعام» دەگەن قورانىڭ ءتارتىبى سول. وسى تۇرعىدان كەلگەندە، الدەكىمدەردى «قايدا ءجۇر» دەپ، جازعىرا المايمىن، باۋىرىم.

- ەرەكە!
ءاۋ باستا قازاقستاننىڭ تاۋەلسىزدىگىن الماۋعا، كۇنى بىتكەن سسسردى ساقتاپ قالۋعا جانتالاسقان، كەيىن ەلتسين "زادنىي موست"دان ءبىر تەۋىپ زورلىقپەن ونى بەرگەن سوڭ حالىق قازىناسىن ۇرلاپ، زاڭسىز بايىعان، ەندى قايتادان وداقتىڭ وتارىنا ءبىزدى بەرىپ وزدەرى قازىردىڭ وزىندە قىز-قىرقىندارىن شەتەلگە قونىستاندىرىپ جاتقان وتانعا وپاسىز مىنا بيلىكتى قاشان تاقتان تايدىرامىز؟

التايشى.

- جەتى جولدان تۇراتىن ءبىر سويلەم سۇراعىڭىز قانشاما ۇزىن بولسا، بۇل بيلىكتىڭ كەتەر كۇنى دە سونشالىقتى ۇزاق بولايىن دەپ تۇر عوي. ونىڭ عۇمىرى تاقتى تاقىمىنا باسقان ادامنىڭ كورەر كۇنىمەن ولشەنەتىن جاعدايعا تاپ بولدىق. سەبەبى، ءسىز سياقتى «قاشان تايدىرامىز؟» دەگەن قازاق از بوپ تۇر. امال نەشىك، كوپپەن كورگەن «ۇلى توي»، شىداي تۇرۋعا تۋرا كەلەدى: پارسىلىق پايىممەن ايتساق، شاح پەن يشاك سايتان بولىپ كەتپەسە، ءبىرى - ءبىر كۇنى ولەر... تۇركىنىڭ توركىنى التايشىلار امان بولسىن!

- ەرمۇرات اعا! بولاشاقتا مىقتى جۋرناليست بولۋ ءۇشىن قازىرگى جازىپ جۇرگەن "DAT" اۆتورلارىنىڭ ىشىندەگى كىم دەگەن جۋرناليستەن ۇيرەنۋىم كەرەك؟ جاستارعا بۇگىنگى جۋرناليستەر اراسىنان ءدال كىمدى ۇلگى-ونەگە ەتىپ ۇسىناسىز؟

- «بولاشاقتا مىقتى جۋرناليست بولام» دەگەن ارمانىڭ جاقسى ەكەن - وركەنىڭ ءوسسىن! وتكەندەردەن مارات قابانبايدى وقى: مارقۇمنىڭ جازبالارى ۇلتتىق كىتپاحانادا ساقتالعان «انا ءتىلى» مەن «سولدات» گازەتتەرىندە بار. مارات اعانىڭ پۋبليتسيستيكاسى 80-ءنىڭ سوڭى مەن 90-شى جىلداردىڭ شەدەۆرى.

قازىرگىلەردەن - گەراعا بەلگەردىڭ لوگيكاسىن ۇيرەن. نەگىزى - «قيسىندا» (لوگيكا)  قيسىقتىڭ ءوزىن ءتۇزۋ عىپ كورسەتەتىن قۇدىرەت بار. قيسىنىن قيىستىرا بىلسەڭ، وقىرمانعا قاراعان قايىڭ بوپ كورىنەدى.

«دات» اۆتورلارى اراسىندا ءابدىراشيت باكىردىڭ پۋبليتسيستيكالىق ءپالسافاسىن پايىمداعان پايدالى. تاريح پەن بۇگىننىڭ اراسىنا ساياسي ەكسكۋرس-ەكسپەرتيزا جاساۋدى قاناعات جۇكەشەۆ دەگەن عالىم اعاڭنان ۇيرەن. ساياسي-الەۋمەتتىك پۋبليتسيستيكادا لەسبەك بايجانوۆ، ايدوس سارىم، قۋاندىق شاماقاي، ءامىرجان قوسانوۆ دەگەن «دات» اۆتورلارى - ساراپتامادا سۇڭعىلا.

ايتپاقشى، اتالعان اعالارىڭنىڭ ءامىرجاننان باسقاسى «جۋرفاكتا» وقىماعان جازعىشتار.  سوندىقتان، ءباسپاسوز ءماسليحاتىندا تاراتىلاتىن پرەسس-رەليزدى كوشىرۋدى ماماندىق سانايتىن «بارىپكەل-شاۋىپكەلدەن» ىرىلەۋ بولۋ ءۇشىن، جۋرناليستىك ديپلوم الۋ مىندەت بولماسا كەرەك.

بۇگىنگى جۋرناليستەردەن قاينار ولجاي، ءامىرحان مەڭدەكە، ساكەن سىبانباي، باۋىرجان وماروۆ، سۇلتانحان اققۇل، داۋرەن قۋات، سەرعازى مۇحتاربەك، ءامىرحان بالقىبەك، امانگەلدى كەڭشىلىك، سانسىزباي نۇربابا (مولداجانوۆ) دەگەن اتى-جوندەر گازەتتەر بەتىنەن كورىنە قالسا، وقي ءجۇر - قور بولمايسىڭ. ءبىر قىنجىلىس - ماعان كەزىندەگى سۇعىلا گازەتشى قايناردى تەلەديداردىڭ تەمىر-تەرسەگى «جەپ» قويعانداي كورىنەدى دە تۇرادى.

مەن بىردەڭەنى بىلسەم - جازۋىڭ مەن مانەرىڭ («ستيل» دەگەنىم عوي) قالىپتاسقان، كەسەك جازاتىن جۋرناليست بولام دەسەڭ، جاستايىڭنان تەلەجاشىك جۋرناليستيكاسىنا اۋەستەنبەۋ كەرەك. ءتىپتى، تەلەديدار كوكەيىڭدى تەسىپ بارا جاتسا، گازەتتە ءتورت-بەس جىل توسەلىپ العان سوڭ - بار. گازەتتىڭ جازۋىن وقىرمان تەسىلىپ وقيدى، باسىنا جاستاپ، ەتىگىنىڭ قونشىنا قىسىرىپ، ارحيۆتەن الىپ وقيدى: تاسقا باسىلىپ قالار دۇنيەنى جاقسى جازۋ قاجەتتىلىگىنە تاربيەلەنەسىڭ.

ال كورەرمەننىڭ كوزى مەن كوڭىلىن تەلەجاشىكتىڭ الەم-جالەم، جارق-جۇرق سۋرەتتەرى الدارقاتىپ، ءسوزدىڭ سولعىندىعى بەينەنىڭ تاساسىندا قالادى. تەلەجۋرناليست - ەكراننىڭ شارشى بەتىندەگى بەينەقاتارعا جۇمىس ىستەۋگە ءماجبۇر. ول قاتاردان كورىنگەن بەينەنى سوزبەن سۋرەتتەۋ - مايعا ماي قۇيعانمەن بىردەي. ءسوز بەن بەينە جارىسقان جەردە جۋرناليزمنەن بۇرىن، ارتيستيزم ارتىق كورىنەدى. ال ءسوز ەكىنشى پلانعا شىقسا، جۋرناليستيكادان جۇرناق قالا ما؟

- ەرمۇرات اعا، ارمىسىز!
1. لاتىن الىپبيىنە كوشۋگە كوزقاراسىڭىز قالاي؟ ونىڭ وڭ جانە تەرىس جاقتارى تۋرالى نە ايتاسىز؟
2. وسىدان 20 جىلدان كەيىنگى قازاقستاندى قالاي ەلەستەتە الاسىز؟
3. ءومىر جولىڭىزدا قول جەتكىزگەن ەلەۋلى ەڭبەگىڭىز بەن اتتەگەن-اي تۇستاردى ايتاسىز با؟
4. بۇگىنگى قازاقتىڭ بويىنداعى قانداي كەمشىلىك (ونى قالاي جەڭۋگە بولادى؟) پەن ارتىقشىلىقتى اتاپ وتسەڭىز.
قۇرمەتپەن قازاق بالاسى.

-  1. مەن دە قازاق بالاسى بولعاندىقتان، كوزقاراسىم دۇرىس: ورىستىق، قۇلدىق مۇرادان قۇتىلۋ ءۇشىن، لاتىنعا ما، رۋنا جازۋىنا ما اۋىسۋ - ايتەۋىر ءتۇبى كيريلليتسادان كەتۋ كەرەك. بىراق كەتەر كەزدى ەرىككەندە ۋاق-ۋاق سامميتتەر مەن كورمەلەر وتكىزۋدى ەرمەك قىلاتىن اقوردا ەمەس، ازاماتتىق قوعام مەن مامان-عالىمدار قاۋىمداستىعى شەشۋى كەرەك. ال كيريلليتسادان كەتۋدىڭ وڭى - سوڭعى ەكى ءجۇز جىلدا الەمدىك كوشتە كەرىتارتپا كەسىرگە ۇشىراعان سلاۆيان قاۋىمى قارپىنەن الەمدىك وركەنيەتكە ءوتۋ دەپ تۇسىنەمىن. تەرىسى - ءبىزدىڭ ءتىلىمىز ەمەن ەسىكتى كەڭسەلەرگە كىرمەيىنشە، لاتىنمەن لاعىپ، قايدا بارار ەكەنبىز دەگەن ويعا قالا بەرەم.

2. «وسىدان 20 جىلدان كەيىن» 93 جاستاعى نۇرسۇلتان اعامىز اقوردادا وتىرمايتىن شىعار دەپ ويلايمىن. سوڭعى جيىرما جىلى «جوعالعان» مەنىڭ قۇرداستارىم ول كەزدە 74-كە كەلەدى ەكەن... بۇگىنگى وتىزداعى جىگىتتەر جاڭا قازاقستان جاسايدى دەپ ۇمىتتەنەم.

3. ەلەۋلى ەڭبەگىم بولسا، تاريحتان تابىلار. دەگەنمەن، «اتتەگەنسىز» ءومىر بولسا، ونىڭ ءمانىن تۇيسىنەر ولشەم بولمايدى عوي. سوندىقتان، «جاقسى» مەن «جاماندى» سالىستىرۋعا «اتتەگەن-اي» دا كەرەك شىعار.

4. كەمشىلىك - بويكۇيەزدىك، جارامساقتىق، داڭعازالىق، نەمقۇرايدىلىق... ونى بۇگىنگى قالىپتاسقان قازاقتىڭ بويىنان سىلىپ تاستاۋ مۇمكىن ەمەس. بىراق بولاشاقتا ءبىر امالى بار: بۇگىنگى بالاڭدى بەسىكتەن وسىعان قارسى تاربيەلەۋ كەرەك. ماسەلەنكي، ەۆرەيلەر ەس كىرگەن بالاسىنا «سەنىڭ قولىڭنان كەلمەيتىن ءىس جوق» دەگەن ويدى قۇيادى ەكەن. بىزگە دە بالا تاربيەسىندە ازداپ ەۆرەي بولۋ كەرەك شىعار...

- وسى مۇحتار شاحانوۆتى قالاي باعالايسىز؟

- شاماسى، مۇحتار اعا مەنىڭ باعاما زار بولماسا كەرەك. بىراق ءبىر بىلەتىنىم - بىزدە مۇقاڭداي جەتپىس جازۋشى بولسا، قازاق بۇگىنگىدەي كەندە تىرلىك كەشپەس ەدى. مەنىڭ ەسىمدە - 90-شى جىلداردىڭ ورتاسىندا «ازامات» قوزعالىسىن قۇرامىز دەپ، 70 زيالى بىلەك سىبانا شىققاندا، بيلىك بۇتىنا تىشىپ قويا جازداعان. پرەزيدەنت اكىمشىلىگى مەن ۇكىمەتتىڭ ىشكى ساياسات بولىمدەرى قوزعالىس قۇرۋعا قول قويعان ءاربىرىن شاقىرىپ، «قۇلىڭ بولايىن، رايىڭنان قايتشى» دەپ، جاتا-جالبارىنعان. قول قويعانداردىڭ «قوشقارلارىن» پرەزيدەنتتىڭ ءوزى قابىلداپ، ودان كىشىرەكتەرى مەن جاسامىستارىن سول كەزدەگى ۆيتسە-پرەمەر يمانعالي تاسماعامبەتوۆ ۇگىتتەپ، اقىرى «ازامات» قوزعالىسى قۇرىلماي قالدى. وسى ءسوزىم جالعان دەسەڭىز 1994-96 جىلدارى شاماسىندا پرەزيدەنت اكىمشىلىگىنىڭ ىشكى ساياسات بولىمىندە ءبىر باسشى بولعان ءۋاليحان جەزدەم قاليجانوۆتان سۇرارسىز. بۇگىن بيلىككە بۇيرەگى بۇرعان شەكپەندى بولسا دا، تەك-ءتۇبى جۋرناليست قوي - وتىرىك ايتپاس...

سوندىقتان، مۇحتار شاحانوۆ پەن تەمىرحان مەدەتبەكوۆ بولا ما، دۋلات يسابەكوۆ پەن يران-عايىپ بولا ما، جوق الدە جۇدىرىعىن جەڭ ىشىندە جاسىرىپ جۇرگەن تۇسىنجان شاپاي مەن عالىم دوسكەن سياقتى «جاستاۋ» بىرەۋلەرى بولا ما - اقىن-جازۋشىلاردىڭ باسىن قوسار بىرەۋى سۋىرىلىپ شىقسا، اقوردانىڭ اينالاسىنداعىلار كىشى دارەتكە وتىرىپ قويار ەدى. بىراق، قايدام، ءبيتتىڭ قابىعىنداي ءبىر كىتابىن گوسزاكازبەن شىعارۋ ءۇشىن، ۇندەرىن ءوشىرىپ العان وڭكەي ولەارماننان ونداي شىعا قويار ما ەكەن؟

- وتكەن 2012 جىلى "دات" گازەتىندە كوتەرىلگەن قاي ماسەلە بيلىكتىڭ ۇيقىسىن بۇزدى، اتاپ ايتا الاسىز با؟

- وي-بۋ، بيلىكتىڭ ۇيقىسى بۇزىلعان زامان ءوتىپ كەتتى عوي! كەزىندەگى «دات» كوتەرگەن «قازاقگەيتكە» تاقىلەتتەس تاقىرىپتار ەكى كۇننىڭ بىرىندە كوتەرىلىپ جاتىر: بىراق بيلىك بىلق ەتپەيدى. حالىقپەن ساناسۋدان قالعان بيلىكتىڭ بۇگىنگى ۇيقىسى «جاڭاوزەن قىرعىنى» كەزىندە دە بۇزىلمادى. ەندىگى جەردە ءبىر عانا گازەت ەمەس، بۇتكىل ەل كوتەرىلمەيىنشە «ۇيقى بۇزىلادى» دەگەن وي - قۇر قيال بولىپ قالدى عوي...

- ەلىمىز شىن تاۋەلسىزدىگىن الار، قازاقتىڭ اق تاڭى اتار. سول كەزدە «دات» جوباسىمەن قازاقتىڭ بۇكىل ماسس-مەديا جۇيەسى تىنىستايتىن بولادى. كەشىكپەي وعان قولىمىز جەتەر. سول كەزدە "دات" جالپىۇلتتىق باس گازەتكە اينالادى. ەلەستەتىپ كورىڭىزشى، كۇن سايىن شىعاتىن "دات" گازەتىنە كۇنىن كورە الماي جابىلىپ قالعان "ەگەمەننىڭ" جۋرناليستەرى جۇمىس سۇراپ كەلسە، ەڭ الدىمەن كىمدى جۇمىسقا الار ەدىڭىز؟

- قيالىڭىز قىزعىلىقتى ەكەن: تىلەۋىڭىز وڭ بولسىن! دەگەنمەن، «دات» رەسمي تۇردە ۇلتتىق گازەت بولا قويماس. ول ءۇشىن جۇرتتىڭ ساناسىندا رەۆوليۋتسيا بولۋ كەرەك. 1992 جىلى ەلىمىز تاۋەلسىزدىك العان كەزدىڭ وزىندە، كومپارتيانىڭ ورگانى بولعان «سوتسياليستىك قازاقستان» گازەتىن «ەگەمەندىگە» عانا اۋىستىرا العان سانامىزبەن تۇبەگەيلى توڭكەرىس جاساي الماسپىز. ماسەلەن، سول جىلدارى تاۋەلسىزدىك العان بالتىق جاعالاۋى ەلدەرىنىڭ پارتيالىق گازەتتەرى تۇگەلدەي جابىلدى. ال ءبىز «سوتسياليستىكتى» «ەگەمەندىمەن» الماستىرعانعا عانا ءماز بولدىق. سەبەبى، بىزگە تاۋەلسىزدىك ءوز اياعىمەن كەلگەنىمەن، تاۋەلسىز ەلدىڭ تۇيسىك-تانىمىن تۇبىرىمەن وزگەرتەتىن  جاڭا بيلىك كەلگەن جوق. بۇرىنعى «سوكپ»-نىڭ سارىجەم باسشىلارى ەل باسىندا قالدى. ولاردىڭ ءوزى كوممۋنيستىك بىلىمنەن باسقا تەرەڭ ءتالىم كورمەگەن، الاشتىڭ مۇراسىنان ماقۇرىم مۇراگەرلەر ەدى. سول مۇراگەرلەردىڭ ەندىگى كورسەتكەن كۇنى مىناۋ - قايتادان كرەملدىڭ كۋرانتىمەن - ساعاتىن، ماسكەۋدىڭ مەڭزەۋىمەن - ساياساتىن تۇزەتۋگە كوشتى. سول ساياساتتىڭ سالدارىنان تولىق ماندەگى تاۋەلسىز ەل بولۋعا مۇمكىندىك بەرەتىن تاريحي شانستى قولدان جىبەرىپ الدىق. ەندى بىزگە ماسكەۋ ونداي مۇمكىندىك بەرمەيدى. وكىنىشتىسى - وسى.

ال كەزىندە ءوزىم دە ءۇش جىلدان استام ۋاقىت قىزمەت قىلعان «ەگەمەن قازاقستان» قاقىسىندا ايتار بولسام، ءبىز قازىر «ەگەمەن» ەكەنىمىزدى كىمگە دال بوپ دالەلدەپ ءجۇرمىز دەگەن وي تۋادى. «قازاقستانعا» «ەگەمەن» دەگەن ەسكى سوزدەن قۇتىلاتىن ۋاقىت بولدى. ونداي ءسوز رەسەيدىڭ قۇرامىنداعى تاتارستان مەن باشقۇرتستانعا عانا جاراسادى. ال ءبىز كىمنەن «ەگەمەنبىز»؟ «ەگەمەندىگىمىزدى» كىمنىڭ ەسىنە سالىپ ءجۇرمىز - قاراتاۋدىڭ قويناۋىندا بايدىڭ قويىن باعىپ جۇرگەن جالداما قازاققا ما؟ ول بەيشاراعا «ەگەمەن» ەكەنىمىزدى ەسكەرتۋ ءۇشىن، جىلىنا مەملەكەتتىك بيۋدجەتتەن 500 ميلليون تەڭگە شىعىنداپ، ارنايى گازەت شىعارۋ قاجەت ەمەس. اۋدان تۇگىلى، اۋىلدىڭ اكىمى جىلىنا ءبىر رەت وعان: «سەن - ەگەمەنسىڭ!» دەپ، كوزىنە شۇقىپ قويسا بولدى - ول بايعۇس باس شۇلعىپ جۇرە بەرەتىن كۇن تۋعان.

ءبىز - تاۋەلسىز ەلمىز! ءتىپتى، تاۋەلسىز ەكەنىمىزدى دە ەسكەرتە بەرۋ - جالتاقتىقتىڭ بەلگىسى. ماسەلەن، مەن «تاۋەلسىز تۇركيا»، «تاۋەلسىز گەرمانيا»، «تاۋەلسىز اقش» دەگەن تىركەستى ەستىپ كورمەپپىن.

سوندىقتان، 90 جىلدان اسقان تاريحى بار «ەگەمەندى» ەل ەكشەسىنەن وتكىزەر كۇنگە «قولىمىز جەتەر» دەگەن ارمانىڭىز وتە ورىندى. بىراق، ول ەكشەۋدى بىزگە «سوكپ»-دان قالعان ساياساتكەرلەر سياقتى ساۋىتبەكتەر («ەگەمەننىڭ» ەگەسى) ەمەس، ەسكىدەن سىتىلعان جاڭا قوعامنىڭ جىگىتتەرى جاساۋ كەرەك.

ال  «ەگەمەننەن» جۋرناليستەرى جۇمىس سۇراپ كەلسە، ەڭ الدىمەن كىمدى جۇمىسقا الار ەدىم»؟ اكىم-قارانىڭ قاباعىنا جالتاقتاپ، ءمينيستردى موڭكىتىپ المايىن دەپ، قالتىراق قالام ۇستاعان «ەگەمەننىڭ» بۇگىنگى جۋرناليستەرى جاڭا زامانعا قىزمەت ەتە المايدى! ولاردىڭ سولاقاي ساياسات مۇجىگەن ساناسىن وزگەرتەم دەپ، يت بولعانشا، ينتەرنەت يىرىمىندە ەركىن جۇرگەن بلوگەردەن جۋرناليست جاساۋ - قازاققا دا، قوعامقا دا الدەقايدا قولايلى قادام بولادى. ارينە، «ەگەمەندىك» ارىپتەستەرىمنىڭ جازۋ شەبەرلىگىنە شاك كەلتىرە المايمىن: ماسەلە - ساناعا سىڭگەن قيقىمدا.

(جالعاسى بار)

Abai.kz