ءساۋىردىڭ 17-ءسى كۇنى ماسكەۋ سوتى ناۆالنىيدان كەيىن تاعى ءبىر پۋتين بيلىگىنە قارسى وپپوزيتسيونەردى ۇزاق جىلعا سوتتادى. كىسى قولىنان قازا تاپقان رەسەيلىك وپپوزيتسيونەر بوريس نەمتسوۆپەن بىرگە اقش كونگرەسىن رەسەيدىڭ ادام قۇقىقتارىن بۇزۋشى، جەمقور شەنەۋنىكتەرىنە (ولاردىڭ اراسىندا ءپۋتيننىڭ جاقىن سەرىكتەرى دە بار) سانكتسيا سالۋعا كوندىرگەن كارا-مۋرزاعا «مەملەكەتكە ساتقىندىق جاسادى»، «ورىس ارمياسىنىڭ بەدەلىن ءتۇسىردى» دەگەن كوپتەگەن ايىپتار تاعىپ، 25 جىلعا باس بوستاندىعىنان ايىردى.

رەسەي ۋكرايناعا باسىپ كىرگەننەن كەيىن بىرنەشە اپتادان سوڭ – 2022 جىلعى ناۋرىزدا اريزونا شتاتىندا امەريكالىق كونگرەسسمەندەردىڭ الدىندا سويلەگەن ۆلاديمير كارا-مۋرزا: «كرەملدە وتىرعان ديكتاتور رەجيم اسكەري قىلمىس جاسادى»، - دەپ مالىمدەگەن. 2022 جىلى ساۋىردە رەسەيگە ورالىسىمەن اۋىر ايىپتارمەن قاماۋعا الىندى.

ول بۇدان بۇرىن دا 2012 جىلى اقش پرەزيدەنتىنە رەسەي شەنەۋنىكتەرى مەن كاسىپكەرلەرىنىڭ امەريكالىق اكتيۆتەرىن بۇعاتتاۋعا مۇمكىندىك بەرەتىن «ماگنيتسكي زاڭىنىڭ» قابىلدانۋىنا تىكەلەي ات سالىسقانى ءۇشىن ەكى رەت ءولىم اۋزىنان قالعان.

2015 جانە 2017 جىلدارى كارا-مۋرزا رەسەيدە ەكى رەت اۋىر حالدە اۋرۋحاناعا ءتۇستى. جاقتاستارى ونىڭ ۋلانعانىن ايتتى. ءبىرىنشى قاستاندىقتان كەيىن ناۋقاستىڭ كەي ورگاندارى جۇمىس ىستەمەي قالىپ، قايتا اياققا تۇرۋ ءۇشىن ۇزاق ەمدەلدى.

وپپوزيتسيونەردىڭ سوتى الەمدىك قاۋىمداستىقتىڭ ەرەكشە نازارىن اۋداردى. حالىقارالىق قۇقىق قورعاۋشى ۇيىمداردان بولەك بىرىككەن ۇلتتار ۇيىمى مەن ەۋرووداق ۇكىمدى قاتاڭ ايىپتادى. اسىرەسە ەۋروپانىڭ انگليا، فرانتسيا، گەرمانيا قاتارلى جەتەكشى ەلدەرى ەرەكشە بەلسەندىلىك تانىتتى. وسى ەلدەردىڭ ماسكەۋدەگى ەلشىلەرى سوت زالىنا كىرە الماعىنىمەن سىرتتا قارسىلىق شاراسىن ءۇيىمداستىردى. رەسەي سىرتقى ىستەر مينيسترلىگى ولارعا ەسكەرتۋ جاسادى. ارتىنان انگليا ۇكىمەتى كارا-مۋرزا ءىسىن قاراعان سۋديا ەلەنى لەنسكوي، دەنيسا كولەسنيكوۆا مەن اندرەيا زاداچيناعا، رەسەي فسب قىزمەتكەرلەرى الەكساندر ساموفال ي كونستانتين كۋدرياۆتسەۆ سانكتسيا سالعانىن مالىمدەدى.

وعان كەيىنگى كەزدە سىركەسى سۋ كوتەرمەي جۇرگەن رەسەي قاۋىپسىزدىك كەڭەسىنىڭ ورىنباسار توراعاسى مەدۆەدەۆ وت الىپ قوپاعا ءتۇسىپتى. جەكە پاراقشاسىندا: «ارينە ءبىز ولاردىڭ شەشىمىنە پىسقىرمايمىز. انگليا كەشە دە، بۇگىن دە، بولاشاقتا دا رەسەيدىڭ ماڭگىلىك جاۋى بولىپ قالا بەرەدى. ولاردىڭ مەنمەندىگى رەسەيدىڭ يادرولىق قارۋلارى الىپ تولقىندار تۋدىرىپ، شالشىق ارالدارىن سۋ تۇبىنە باتىرعاندا بىتەدى»، - دەپ جازعان.

مەدۆەدەۆتىڭ ەۋروپا ەلدەرىن «قۋاتتى قارۋلارىمەن» قورقىتۋى ءبىر بۇل ەمەس ەكەنى جۇرتقا ءمالىم. الدىندا گەرمانيا زاڭ ورگاندارى «ءپۋتيندى سوعىس قىلمىسكەرى دەپ تانىپ، حالىقارالىق ىزدەۋ جاريالاعان» گااگا سوتىنىڭ شەشىمىن بۇلجىتپاي اتقاراتىنىن ايتقاندا: «توبەلەرىڭنەن قۇداي مەن ورىستىڭ اتوم بومبىسى ءتونىپ تۇر»، - دەپ قورقىتپاق بولعان.

رەسەي ۋكرايناعا سوعىس اشقالى بەرى انگليادا ءۇش ءۋازىر بيلىكتە بولدى. ۇشەۋىدە ءبىرىنىڭ اۋزىنا ءبىرى تۇكىرىپ العانداي رەسەيگە قاتاڭ پوزيتسيا ۇستانىپ كەلەدى. الدىنداعى بوريس جونسون الەم ەلدەرىن رەسەيمەن جاساسقان 300-جىلدان بەرگى شەكارا كەلىسىمدەرىن قايتا قاراۋعا ۇندەسە، مينيستر تاعىندا 40 كۇن عانا وتىرعان تراس تا: «ءىسىم رەسەيمەن بولادى»، - دەگەن ەدى. ال قازىرگى ءۋازىر سۋناك ۋكرايناعا قىرعىش ۇشاق بەرۋدەن كەت ارى ەمەس ەكەنىن اشىق ايتىپ، ۋكراين ۇشقىشتارىن دايىنداۋعا كىرىسىپ كەتتى. مەدۆەدەۆ ولاردى: «تراسس — «تەرمويادەرنايا رۋسوفوبكا. بوررەل — «نەدالەكي كوميسسار»، ا دجونسون — «فريك-ديادكا»، - دەپ قاعىتقان ەدى.

ەسبول ۇسەنۇلى

Abai.kz