بۇگىن ءماجىلىس وتىرىسىندا «AMANAT» پارتياسى فراكتسياسىنىڭ مۇشەسى ەرلان سايروۆتىڭ پرەمەر-مينيستر ولجاس بەكتەنوۆكە كوشى-قون سالاسى مەن ەڭبەك نارىعىنداعى بىرقاتار ماسەلە بويىنشا جولداعان دەپۋتاتتىق ساۋالى.

ءبىز اتالعان دەپۋتاتتىق ساۋالدى Abai.kz اقپاراتتىق پورتالى وقىرماندارىنىڭ تالقىسىنا ۇسىنامىز...

ەرلان سايروۆ:

پرەزيدەنت قاسىم-جومارت توقاەۆ حالىققا جولداۋىندا «ەڭبەك نارىعىن، اسىرەسە كوشى-قون ماسەلەسىن رەتتەۋ سالاسىندا ەسەپكە الۋدىڭ ورتالىقتاندىرىلعان جۇيەسى جوق» دەپ اتاپ ءوتتى.

مەملەكەت باسشىسى ميگراتسيالىق پروتسەسستەردى مەملەكەتتىك رەتتەۋدىڭ تيىمدىلىگى تومەندىگىنە دە باسا نازار اۋداردى.

ءار-ءتۇرلى ساراپشىلاردىڭ ەسەبىنشە قازاقستاننىڭ ەڭبەك نارىعىندا 2030 جىلى ەڭبەك رەسۋرستارىنىڭ جەتىسپەۋشىلىگى 1,8 ملن ادامعا جەتۋى ىقتيمال!

قازىردىڭ وزىندە ەلىمىزدىڭ ەڭبەك نارىعىندا اسىرەسە اۋىلدىق جەرلەردە، 900-مىڭ مامان جەتىسپەيدى.

قازاقستاندا حالىقتىڭ سانى جالپى وسكەنىمەن، كەيبىر ايماقتارىندا دەپوپۋلياتسيا پروتسەسستەرى سەزىلۋدە.

2023 جىلى ەلىمىزدە 6286 اۋىلدىق مەكەن بولسا، 2025-جىلى 6 179 اۋىلدىق مەكەن قالعان. ەكى جىلدىڭ ىشىندە 80 تىرەكتى اۋىل جابىلعان.

جاعدايدى رەتتەۋ ءۇشىن ۇكىمەت كەلەسى كەزەك كۇتتىرمەس قادامدار جاساۋى ءتيىس.

1. سولتۇستىك-شىعىسقا كوشىپ كەلگەندە تۇرعىن ۇيگە ارنالعان ەكونوميكالىق موبيلدىك سەرتيفيكاتىنىڭ مولشەرىن 2 320 ايلىق ەكونوميكالىق كورسەتكىشكە، شامامەن 9,1 ملن تەڭگە دەيىن ۇلعايتۋ;

2. كوشىپ كەلگەننەن كەيىن، ازامات ءۇي ساتىپ الۋعا مەملەكەتتەن الاتىن كومەك مەرزىمى ەكى جىلعا سوزىلىپ، كوشىپ كەتۋ مەرزىمى كومەك العاننان  بەس جىلعا سوزىلۋى كەرەك.

3. مەملەكەتتىك قاراجات ەسەبىنەن سالىنعان تۇرعىن ءۇيدى جەكەشەلەندىرۋ ءتارتىبىن قايتا قاراستىرۋ.

4. اۋىل شارۋاشىلىعى، ءبىلىم بەرۋ سالالارىندا مامانداردى تارتقان جۇمىس بەرۋشىلەرگە سۋبسيديالاردى ۇلعايتۋ;

5. جۇمىس بەرۋشىلەرگە Enbek.kz پورتالىندا جۇمىس پەن تۇرعىن ءۇي تۋرالى اقپاراتتى جاريالاۋ مىندەتىن قاتاڭ ساقتاۋ. جاريالاماعانى ءۇشىن ءتارتىپتىڭ جازا قولدانۋ.

6. كوشىپ كەلگەن قانداستار مەن كوشىپ كەلۋشىلەر ءۇشىن گرانت بەرۋ مەرزىمىن كەمىندە 5 جىل تۇرۋ شارتىمەن 5 جىلعا سوزۋ;

7. جۇمىس بەرۋشىلەرگە قونىس اۋدارۋشىلار ءۇشىن تۇرعىن ءۇي ساتىپ الۋ نەمەسە سالۋعا 2%-دان اسپايتىن مولشەرلەمەمەن جانە 20 جىلعا دەيىنگى مەرزىممەن نەسيە بەرۋ;

8. سولتۇستىك-شىعىس ايماقتارىنا كوشىپ كەلگەن كۇندىزگى بولىمدە وقيتىن وتباسى بار ستۋدەنتتەرگە، “شارتتى جۇمىسسىز” مارتەبەسىن بەرۋ، ولاردى كۆوتاعا قوسۋ مۇمكىندىگىن قاراستىرۋ.

9. شەت ەلدە تۇراتىن قانداستاردى سولتۇستىك-شىعىس وڭىرلەرىنە ەڭبەك كۇشى رەتىندە تارتۋدىڭ جاڭا تەتىكتەرىن جاساۋ.

«AMANAT» فراكتسياسىنىڭ دەپۋتاتتارى

Abai.kz