كەشەگى ورتالىق كوممۋنيكاتسيالار قىزمەتىندەگى ءباسپاسوز ءماسليحاتىنان ءمالىم بولعانىنداي قازاقستاننىڭ ىشكى ءوندىرىسى قارقىندى دامۋ ۇستىندە ەكەن.

قازىرگى كۇنى قازاقستان 106 ەلگە وڭدەلگەن ءونىم ەكسپورتتاپ جاتىپتى. بۇل مالىمەتتى ساۋدا جانە ينتەگراتسيا ۆيتسە-ءمينيسترى قايرات تورەباەۆ ءوز اۋزىمەن ايتتى.

«وڭدەلگەن ونىمدەر ەكسپورتى وتكەن جىلى 26,5 ملرد اقش دوللارى بولدى. بيىل 1-توقساندا وڭدەلگەن ءونىمنىڭ سىرتقى ساۋداسىنىڭ جالپى كولەمى 18,8 ملرد اقش دوللارىن قۇرادى. بۇل وتكەن جىلعى سايكەس كەزدەگى كورسەتكىشتەن 32 پايىزعا جوعارى. سوڭعى ءۇش جىلدا بۇل كورسەتكىش 63 پايىزعا ءوستى. وسى كەزەڭدە شيكىزاتتىق ەمەس تاۋارلاردىڭ ەكسپورتى 5,9 ملرد اقش دوللارىن قۇرادى. ءوسىم 7,6 پايىزدى كورسەتتى. 2025 جىلى 41 ملرد اقش دوللارىنا جەتكىزۋ كوزدەلگەن»، - دەدى ول.

ۆيتسە-ءمينيستردىڭ دەرەگىنشە، ەلىمىز ەكسپورتقا مىس، مىس كاتودىن، فەرروقورىتپالار، ۋران، مۇناي ونىمدەرىن، كۇمىس، ۇن، مىرىش، تابيعي گاز شىعارادى.

وڭدەلگەن تاۋارلاردىڭ نەگىزگى يمپورتتاۋشىلارى رەسەي، قىتاي، وزبەكستان، تۇركيا، نيدەرلاند، ۇلىبريتانيا، جاپونيا، قىرعىزستان، گرۋزيا، اۋعانستان بولعان.

مينيستر مىرزا سونداي-اق، قازاقستان قىتايمەن ساۋدا-ساتتىقتىڭ جاڭا فورماتىن ەنگىزەتىنىن دە شۇيىنشىلەدى.

اتاپ ايتقاندا قىتاي اۋماعىندا وڭدەۋشى كاسىپورىندار قۇرىلىسىمەن اينالىساتىن كومپانيامەن كەلىسىمشارت جاسالعان.

«ولار بىزگە قازاقستاندا ايماق قۇرۋدى، وعان قىتايدا تۇتىنىلاتىن ءتۇرلى ونىمدەردى وندىرۋشىلەردى ورنالاستىرۋدى، ەكسپورت الدىنداعى تەكسەرۋ جۇرگىزۋدى ۇسىنادى. زەرتحانالار، تەحنيكالىق رەتتەۋ، بارلىق ليتسەنزيالار سول جەردە بولادى. ياعني، قازاقستان اۋماعىندا ماشينا نە كونتەينەر مورلەنىپ، قىتاي اۋماعىنداعى ساتىپ الۋشىلارعا توقتاۋسىز جەكىزىلەدى. بۇل ساۋدا-ساتتىقتىڭ جاڭا فورماتى. ءبىز ونى قىتايمەن تاجىريبەدەن وتكىزەمىز. ولاردا الەمنىڭ وزگە بىردە-ءبىر ەلىمەن مۇنداي ساۋدا جوق. ءبىز سوعان قول جەتكىزە الدىق. مۇنى قازاقستان ۇكىمەتى تاراپىنان ىلگەرىلەۋشىلىك دەر ەدىم»، - دەيدى قايرات تورەباەۆ.

سونىمەن بىرگە بيىل تاعى 70 وتاندىق كومپانيا Alibaba پلاتفورماسىنا شىعارىلادى ەكەن.

«مينيسترلىك شاعىن جانە ورتا بيزنەس ءۇشىن ەلەكتروندىق كوممەرتسيا نارىعىنا قولجەتىمدىلىكتى جەڭىلدەتۋ ءۇشىن ىنتىماقتاستىققا جانە بىرلەسكەن جۇمىسقا دايىن. ءبىز ولاردىڭ مول تاجىريبەسىن پايدالانا وتىرىپ، ءوز كۇش-جىگەرىمىزدى قازاقستاندىق كاسىپورىنداردى تسيفرلىق نارىققا شىعارۋعا باعىتتايمىز. ەكسپورتتاۋشىلاردى قارجىلىق ەمەس قولداۋ قۇرالدارىنىڭ ءبىرى - وتاندىق ەكسپورتتاۋشىلاردى Alibaba.com ەلەكتروندىق پلاتفورماسىنا شىعارۋ. 2020-2022 جىلدارى Alibaba پلاتفورماسىنا 220 كومپانيا ورنالاستىرىلدى. پلاتفورمادا ورنالاسقان كومپانيالار ءۇشىن شاعىن سايتتار قۇرىلادى. پلاتفورمادا جۇمىس ىستەۋ جانە ءوز تاۋارلارىن جىلجىتۋ ءۇشىن وقىتۋ ۆەبينارلارى وتكىزىلەدى.

«اتالعان كەزەڭدە باعدارلاماعا قاتىسۋشىلاردىڭ جيىنتىق ساتۋ كولەمى شامامەن 225 ملن اقش دوللارىن قۇرادى. بيىل ءبىز التىن اككاۋنتتار ۇسىنۋ جۇمىسىن جالعاستىرامىز جانە تاعى 70 كومپانيا اتالعان مۇمكىندىككە يە بولادى»، - دەدى قايرات تورەباەۆ».

ميلليارد حالقى بار قىتاي نارىعىنىڭ ءبىزدىڭ ەل ءۇشىن ۇلكەن مۇمكىندىك ەكەنى بەلگىلى. دەسە دە قوعامدا قىتايمەن جاقىنداسۋدىڭ زاردابىن ايتىپ جاتقان نارازى كوڭىل دە بار. پايدانى كوزدەگەندەردىڭ شەتەلدىكتەرگە ساتۋعا تيىم سالىنعان اۋىلشارۋاشىلىق جەرلەرىن قىتاي سايتتارىنا، ەلەكتروندى ساۋداعا شىعارىپ جاتقان جايتتەردە وتقا ماي قۇيعانداي بولدى. ءبىر جاعىنان ەلەكتروندى ساۋدانى دامىتىپ، وعان قوسا ۆيزاسىز بايلانىستى قاتار الىپ ءجۇرۋ – ەكى ۇشتى شەشىم سياقتى. ەڭ باستىسى قازىرگى زات باعاسى شارىقتاعان قيىن زاماندا پايدادان گورى، ەلىمىزدىڭ ازىق-تۇلىك قاۋىپسىزدىگىن ءبىرىنشى ورىنعا قويۋىمىز كەرەك.

Abai.kz