پرەزيدەنت اكىمشىلىگى باسشىسىنىڭ ورىنباسارى ءھام پرەزيدەنتتىڭ ءباسپاسوز حاتشىسى رۋسلان جەلدىباي قازاقستاننىڭ وداقتاس مەملەكەتتەرگە قاتىستى كوزقاراسى تۋرالى پىكىر ءبىلدىردى.

«قازاقستان ەشقانداي وداقتاس رەسپۋبليكاعا قوسىلمايدى»، - دەدى رۋسلان جەلدىباي Facebook پاراقشاسىندا.

رۋسلان جەلدىباي:

- وزدەرىڭىزگە ءمالىم، مەملەكەت باسشىسى جاقىندا ماسكەۋ قالاسىندا وتكەن II ەۋرازيالىق ەكونوميكالىق فورۋمعا قاتىستى.

پرەزيدەنت جيىن بارىسىندا بۇگىندە ساراپشىلار قاۋىمداستىعى كەڭىنەن تالقىلاپ جاتقان بىرقاتار مالىمدەمە جاسادى.

ەاەو اياسىنداعى ينتەگراتسيا تەك قانا ەكونوميكالىق سيپاتتا عانا ءجۇرۋى كەرەك. بۇل – پرەزيدەنتتىڭ نەگىزگى ۇستانىمى. ونىڭ شەڭبەرىنەن شىعۋ ۇيىمنىڭ جارعىلىق قۇجاتتارىنىڭ ماقساتتارىنا، پرينتسيپتەرى مەن مىندەتتەرىنە قايشى كەلەدى.

پرەزيدەنت اتاپ وتكەندەي، ەكونوميكالىق ينتەگراتسيا – بۇل تۇپكى ماقسات ەمەس، ول ەكونوميكانى دامىتۋدىڭ جانە حالىقتارىمىزدىڭ ءال-اۋقاتىن ارتتىرۋدىڭ نەگىزگى قۇرالدارىنىڭ ءبىرى. ياعني، ۇيىم اياسىندا قابىلداناتىن كەز كەلگەن شەشىم ونىڭ ءاربىر مۇشەسىنە جانە، ەڭ الدىمەن، ولاردىڭ ازاماتتارىنا پايداسىن تيگىزۋى ءتيىس.

سونىمەن قاتار ءتۇرلى دەڭگەيدەگى ينتەگراتسيا ماسەلەسى قوزعالدى. بۇگىندە ەاەو-نىڭ ەكى مۇشەسى – رەسەي مەن بەلارۋس ءوزارا ىقپالداستىقتىڭ جوعارى دەڭگەيىنە شىقتى. بۇل – ەرەكشە پرەتسەدەنت. مەملەكەت باسشىسىنىڭ پايىمىنشا، شىن مانىندە، ءبىر حالىق جانە ءبىر مەملەكەت تۋرالى ءسوز بولىپ وتىر. وسى رەتتە مۇلدە باسقا ماقساتتاردى كوزدەگەن ەكى ءتۇرلى ينتەگراتسيالىق جوبا شەڭبەرىندەگى باستامالاردىڭ ارا-جىگىن اجىراتۋ اسا ماڭىزدى.

ءبىزدىڭ ەلىمىزگە كەلەتىن بولساق، قازاقستان قانداي دا ءبىر وداقتاس مەملەكەتتەر قۇرۋعا نەمەسە ولاردىڭ قۇرامىنا كىرۋگە نيەتتى ەمەس جانە ونى جوسپارلاپ وتىرعان جوق.

*سۋرەتتەر رۋسلان جەلدىبايدىڭ الەۋمەتتىك جەلىدەگى پاراقشاسىنان الىندى.

Abai.kz