تۇركياداعى ەكى كەزەڭگە سوزىلعان پرەزيدەنت سايلاۋى كەشە تۇندە ءوز مارەسىنە جەتتى. ەلدى 20 جىل بويى باسقارىپ كەلگەن رەجەپ تايىپ ەردوعان جەڭىسكە جەتىپ، 3-ءشى رەت پرەزيدەنت بولىپ سايلاندى.

سايلاۋ قورىتىندىسى بويىنشا، ەردوعان 52,14% داۋىس جيناعان، ال ونىڭ باستى قارسىلاسى، وپپوزيتسيا وكىلى كەمال قىلىشداروعلى 47,86% داۋىس الدى.

ەردوعان ءوزىنىڭ جاقتاستارىنا العىس ايتتى.

«مەن دەموكراتيا مەرەكەسىن جاساعان حالقىما راحمەت ايتقىم كەلەدى. بىزگە تاعى بەس جىل ەل باسقارۋدى سەنىپ تاپسىرعان، داۋىس بەرگەن ادامداردىڭ بارىنە العىسىم شەكسىز»، - دەدى ول.

قىلىشداروعلى «بۇل سايلاۋ – سوڭعى جىلدارى تۇركيادا بولعان ەڭ ادىلەتسىز سايلاۋ»، - دەپ باعالادى. ول تۇركيادا دەموكراتيا ورناتۋ ءۇشىن كۇرەسۋدى توقتاتپايتىنىن ايتتى.

جاقتاستارىنىڭ الدىندا سويلەگەن ەردوعان: «بىزگە بىرىگەتىن ۋاقىت كەلدى»، - دەدى، سونداي-اق، ول «كۇردتەردى قولدايتىن حالىقتار دەموكراتيالىق پارتياسىنىڭ» بۇرىنعى جەتەكشىسى سەلاحاتتين دەميرتاشتى تۇرمەدەن بوساتۋعا ۋادە بەرگەن قىلىشداروعلىن سىنادى.

تۇرىك بيلىگى دەميرتاشتى 2016 جىلى «كۇردىستان جۇمىسشى پارتياسىنا» بايلانىسى بار دەپ سوتتاعان.

ەردوعان دەميرتاشتى تەرروريست دەپ اتاپ: «ءبىز بيلىكتە وتىرعاندا ول ەشقاشان بوستاندىققا شىقپايدى»، - دەدى.

«بىزگە ناقتى جۇمىس ىستەيتىن ۋاقىت كەلدى. ءبىزدىڭ الداعى ماقساتىمىز – 6 اقپاندا جەر سىلكىنىسىنەن زارداپ شەككەن قالالاردى قالپىنا كەلتىرۋ، ادامداردىڭ ءومىر ءسۇرۋىن جاقسارتۋ، ينفلياتسيانى ءتۇسىرۋ»، - دەدى 20 جىل بويى ەل باسىندا كەلە جاتقان 69 جاستاعى ەردوعان.

رەجەپ تايىپ ەردوعاندى رەسەي پرەزيدەنتى ۆلاديمير پۋتين دە، ۋكراينا پرەزيدەنتى ۆلاديمير زەلەنسكي دە جەڭىسىمەن قۇتتىقتادى. ەردوعان سوعىس ءجۇرىپ جاتقان ەكى ەلدىڭ ورتاسىندا اراعايىندىق ءرولىن سومداۋعا تىرىسىپ ءجۇر. ول رەسەيگە سانكتسيالاردى اينالىپ وتۋگە كومەكتەستى، سونىمەن بىرگە ۋكرايناعا تۇرىك دروندارىن جەتكىزدى. ەكى تاراپتىڭ ورتاسىندا كەلىسسوز ۇيىمداستىردى، تۇتقىندار الماسۋىنا كومەكتەستى.

ايجان تەمىرحان

Abai.kz