اشىعىن ايتقاندا، اباي وبلىسىنداعى قانشاما ازاماتتىڭ ءومىرىن جالماعان الاپات ءورت بىزدەگى باسقارۋ جۇيەسىنىڭ ابدەن ءىرىپ-شىرىگەندىگىن كورسەتەدى. باياعى 30 جىل بويعى قالىپتاسقان ادەتپەن بارلىق كىنانى جوعارى جاق تومەنگى جاققا يتەرە سالادى.

«دەر كەزىندە بىزگە ەسكەرتكەن جوق، قامسىز وتىردى»، دەپ قارا اسپاندى قاپىلتىپ جاتىر. سولاي شىعار. ال، مۇمكىن، حابارلاسقان دا شىعار. الايدا، قازىر تومەنگى جاقتىڭ ايتقانىن كىم تىڭداپ جاتىر؟ مازاسىن الا بەرسەڭ «باستى اۋىرتپا» دەپ جەكىپ تاستاماسىنا كىم كەپىل؟ سوسىن، ولار دا «ۇيدەي پالەدەن ۇندەمەي قۇتىلادى». ولاردى سولاي ۇيرەتىپ تاستادى.

ەكىنشىدەن: «يلين ءورت سوندىرۋگە بىردەن بارعان جوق»، - دەيدى. وۋ، ول مەكەمە پرەزيدەنتكە تىكەلەي باعىنادى ەمەس پە؟ ەندەشە، ونى كىم قاداعالاپ، باقىلاۋعا ءتيىستى؟ مارتەبەسى بيىك بولعان سوڭ، وعان سمايىلوۆتىڭ دا ءتىسى باتپايدى. دەمەك، ول ءمينيستردىڭ بارعىسى كەلسە بارادى، بارعىسى كەلمەسە بارمايدى. ءوزى بي، ءوزى قوجا. ەندەشە، ەندى، ايت نە، ايتپا نە، ورنىنان ءتۇسىر نە، تۇسىرمە نە؟

ال ەكولوگيا ءمينيسترى جاپ-جاس قىزعا ءتىپتى، وبال. ادامداردىڭ بەيكۇنا وپات بولعاندىعى، ارينە، جانىنا قاتتى باتقان بولار، نازىك جاراتىلعان جان عوي، كوز جاسىنا ەرىك بەرگەنى دە تۇسىنىكتى. الايدا، تومەننەن كوتەرىلىپ، وسى سالاداعى بارلىق ساتىدان وتكەن، بىلىكتىلىگى مەن ومىرلىك تاجىريبەسى مول، ءتىس قاققان ادامنىڭ ورنىنا وسى جاس بالانى اكەلىپ قويعان كىم؟ مۇندا وتىزداعى ەمەس، ەڭ بولماسا قىرىقتاعى بىلىكتى مامان تابىلمادى ما؟

سوسىن ءيليننىڭ ورنىنا كەلگەن، وسى سالاعا مۇلدەم جات ادامنىڭ ەرتەڭ وسىنداي جاعداي بولسا، جەدەل قيمىلداپ، ءورتتىڭ الدىن الا الاتىندىنا كىم كەپىلدىك بەرەدى؟ ەرتەڭ ول دا كوز جاسىنا ەرىك بەرمەسىنە كىم سەنىمدى؟

قىسقاسى، سۇراق كوپ، جاۋاپ جوق. ادەتتەگىدەي جاعداي. ويتكەنى، بىلتىرعى جىلعى ءبىزدىڭ قوستانايداعى وسىنداي الاپات ورتتەن ءتيىستى قورىتىندى شىعارىلمادى ما دەپ، قورقامىن.

جايبەرگەن بولاتوۆ

Abai.kz