بۇعان دەيىن رەسەي فەدەراتسياسىندا «شەتەل اگەنتى» تۋرالى زاڭ قابىلدانىپ، سوعىستى سىناعان تاۋەلسىز بۇقارالىق اقپارات قۇرالدارىن، قوعام بەلسەندىلەرى مەن جۋرناليستەردى جاپپاي جازاعا ۇشىراتقان، - دەپ جازادى Mezgil.kz. 

رەسەيدىڭ جازالاۋشى زاڭى

ادام قۇقىقتارىن شەكتەۋگە باعىتتالعان بۇل زاڭ اۋەلى 2012 جىلى «كوممەرتسيالىق ەمەس ۇيىمدار تۋرالى» فەدەرالدى زاڭعا تۇزەتۋلەر ەنگىزىلگەننەن كەيىن پايدا بولعان ەدى. 2017 جىلى رەسەي ادىلەت مينيسترلىگى «شەتەلدىك اگەنت» ايدارىن بۇقارالىق اقپارات قۇرالدارىنا تاعاتىن زاڭ جوباسىن دايارلاپ شىعاردى. وسىلايشا زاڭعا باعىنباعان ءتۇرلى باق-دىڭ ءتىزىمى جاسالدى. 2021 جىلدىڭ قاراشا ايىندا 97 بۇقارالىق اقپارات قۇرالى، ونىڭ ىشىندە 62 جەكە تۇلعا «شەتەل اگەنتى» بولىپ تانىلعان. 2022 جىلدىڭ اقپانىنا قاراي ولاردىڭ سانى 115-كە دەيىن وسكەن. وسىلايشا «شەتەل اگەنتتەرىنىڭ» سانى تولىعۋدا.

گۇرجىستاننىڭ تاڭداۋى...

7 ناۋرىزدا گرۋزيا پارلامەنتى «شەتەل اگەنتى» تۋرالى زاڭدى قابىلداماق بولىپ، حالىقتىڭ جاپپاي نارازىلىعىنا ۇشىراعان. ءۇش كۇنگە سوزىلعان ميتينگتەردەن كەيىن، بيلىك زاڭدى قابىلداۋدى ۋاقىتشا توقتاتتى.

قىرعىزستان دا رەسەيدىڭ جولىنا ءتۇستى

ەندىگى كەزەك قىرعىزستانعا كەلگەن سەكىلدى. قىرعىزستان ۇكىمەتى «شەتەلدىك اگەنت» تۋرالى زاڭ قابىلداۋعا بەل بۋا كىرىستى. الايدا قىرعىزستاننىڭ قۇقىق قورعاۋشىلارى «شەتەل اگەنتى» تۋرالى زاڭ جوباسىن قابىلداۋعا قارسىلىق ءبىلدىرىپ وتىر.

ويتكەنى زاڭ جوباسى كوممەرتسيالىق ەمەس ۇيىمدار قىزمەتىنىڭ اشىقتىعىنا، جاريالىلىعىنا كەسىرىن تيگىزۋى مۇمكىن.

«زاڭ جوباسى «كوممەرتسيالىق ەمەس ۇيىمدار شەتەلدەن كومەك السا – قىرعىزستاندى تۇراقسىزدىققا الىپ كەلەدى دەگەن يدەيانى ناسيحاتتاپ وتىر»»، - دەيدى قۇقىق قورعاۋشىلار.

قىرعىزستان ازاماتتارى پرەزيدەنت جاپاروۆ پەن پارلامەنت دەپۋتاتتارىنا «شەتەل اگەنتى» مارتەبەسىن بەرەتىن زاڭ جوباسى بويىنشا قارسىلىعىن ءبىلدىرىپ، قۇجات ۇسىندى. قۇجات وتكەن اپتادا پارلامەنتتىڭ قاراۋىنا ەنگىزىلدى. قازىر «شەتەل اگەنتى» تۋرالى زاڭدى جاساۋعا اتسالىسقان دەپۋتاتتار ءوز داۋىستارىن قايتىپ الا باستادى.

بىرقاتار حالىقارالىق قۇقىق قورعاۋ ۇيىمدارى: امەريكالىق Human Rights Watch جانە Freedom Now, نورۆەگيالىق حەلسينكي كوميتەتى، يرلانديالىق FrontLine Defenders (Kloop مەديا رەسۋرسى) قىرعىزستان پارلامەنتىن «شەتەلدىك اگەنتتەر» تۋرالى زاڭدى قابىلداماۋعا شاقىردى.

ولار ۇندەۋىندە قىرعىزستاننىڭ زاڭ جوباسى «نەگىزىنەن رەسەيدىڭ زاڭناماسىنا سۇيەنەتىنىن» جانە «شەتەلدەن قارجىلاندىرىلاتىن ۇيىمداردىڭ قىزمەتىن شەكتەۋگە» باعىتتالعانىن ايتادى.

Abai.kz