«ۆاگنەر» اسكەري كومپانياسى مەن ونىڭ باسشىسى ەۆگەني پريگوجين سالعان لاڭنان كەيىن، قولىندا اقشاسى بار وليگارحتاردىڭ ءبارى جەكە ارميا جاساقتاۋعا كىرىستى. سەبەبى، رەجيمدى قۇلاتۋ وڭاي ەكەنىن، جانە ول قۇلاسا ەلدە تارتىپسىزدىك ورناپ، كىمنىڭ كۇشى بار، سولار رەسەيدى ءبولىپ الاتىنىن ەسى بار ادامنىڭ ءبارى ءتۇسىنىپ قويدى. بولاشاقتا چۆك-سى بار وليگارحتار ءار وبلىستى ءبولىپ الىپ، ودان جەكە مەملەكەت قۇرا الادى، دەپ جازادى DALA INSIDE. 

گازپروم قوجايىنى الەكسەي ميللەر ۆاگنەردىڭ مودەلىمەن «پوتوك» چۆك-سىن جاساقتاپ ءبىتتى. «پوتوك» ءتىپتى اۋىر ارتيللەريا مەن تانكتەرگە دە يە بولىپ وتىر.

روسنەفت باسشىسى يگور سەچين پريگوجينمەن كەلىسىپ، «ۆاگنەردەن» كەتكەن، بىراق قورعانىس مينيسترلىگىمەن كونتراكتقا وتىرعىسى كەلمەيتىن جالدامالى كاسىپقويلاردى «گرانيت» چۆك-سىنا جيناپ جاتىر. رامزان قادىروۆتىڭ «احمات» دەگەن جەكە ارمياسى باياعىدان بار. ول شەشەنستاندى ءبولىپ الۋ ءۇشىن ءپۋتيننىڭ ءولىمىن كۇتىپ ءجۇر. سەبەبى، رامزان ءوزىن پۋتينگە عانا جىگىتشە انت بەردىم، ال قالعاندارىنا ەشتەڭە قارىز ەمەسپىن دەپ ەسەپتەيدى. اركادي روتەنبەرگ، يۋري كوۆالچۋك سىندى پۋتينگە جاقىن وليگارحتار دا جەكە چۆك يدەيالارىن ىسكە اسىرۋعا اسىعۋدا.

قازاقستاندىق وليگارحاتتان الەكساندر ماشكەۆيچتە جاسىرىن چۆك بار. بىراق ول اسكەري ۇيىمنان كورى قارۋلى كۇزەتكە كوپ كەلەدى. كەز-كەلگەن «جاڭا قازاقستانىڭدى» «ايىرىپ» تاستايتىن ازۋلى ارميا قۇرۋ ماسەلەسى تيمۋر قۇلىباەۆتى دا تولعاندىرا باستادى. وسىعان قاتىستى رەسەيدە ءبىراز كەلىسسوزدەر بولعان.

بىراق تانك، ارتيللەريا، ۇشاق، درونى بار چۆك وتە قىمبات دۇنيە بولىپ شىقتى. ءتىپتى 1 ميلليارد دوللاردىڭ ءوزى ماردىمسىز قارجى دەپ سانالادى. چۆك سىندى «قىمبات ويىنشىقپەن» ويناۋ ءۇشىن قالتادا 5 ميلليارد دوللاردان كوپ قارجى بولۋى ءتيىس.

DALA INSIDE رەسەيدەگى ينتريگالاردىڭ قازاقستانعا ىقپالىن زەرتتەۋدە. ونىڭ بارىسىندا مۇلدە جاسىرىن جۇرگەن فيگۋرا انىقتالدى. ول تۋرالى كەلەسى پوستتاردا جازامىز.

Abai.kz