ازاماتتىق بەلسەندى تۇراربەك قۇسايىنوۆ الماتىدا ورىس قولباسشىسى الەكساندر نەۆسكيگە ارنالعان ەسكەرتكىشتىڭ قويىلۋىنا قارسى.

«تاريحقا كوز جۇگىرتسەك، كنياز الەكساندر نەۆسكي التىن ورداعا امالسىز باس يگەن. ول ءبىزدىڭ كوشپەندى اتا-بابامىزدى جەك كورگەن، تەك ساياسي بيلىگىنە مويىنسۇنۋىنا تۋرا كەلگەن. تاريحشىلار ونىڭ ناعىز يمپەرياليست جانە ءدىننىڭ فاناتى بولعانىن ايتادى. كرەمل مەن پۋتين ءپىر تۇتاتىن، اسكەري يمپەرياليست الەكساندر نەۆسكيگە قازاقستاننىڭ وڭتۇستىك استاناسى – الماتىدان ەسكەرتكىش اشۋدىڭ كەرەگى نە؟»،-دەيدى بەلسەندى.

ءبىر كۇن بۇرىن، پراۆوسلاۆتاردىڭ رەسمي سايتى mitropolia.kz 13 شىلدەدە الماتىدا ورىس قولباسشىسى الەكساندر نەۆسكيگە ارنالعان ەسكەرتكىش اشىلادى، دەپ جازدى. سايتتا پاتريارح كيريللدىڭ باتاسىمەن، قازاقستان پرەزيدەنتى ق.توقاەۆتىڭ رۇقساتىمەن ەسكەرتكىش ورناتىلىپ جاتقانى ايتىلعان.

ەسكەرتكىشتىڭ باستى ميسسياسى قازاقستان قوعامىن بىرلىك پەن تاتۋلىققا شاقىرۋ، سەبەبى موڭعول يمپەرياسىنا بىرنەشە مارتە باس يە بارعان الەكساندر-نەۆسكي ديپلوماتيالىق قىزمەت اتقارعان دەلىنگەن اقپاراتتا.

سونداي-اق mitropolia.kz سايتى الماتى قالاسىن ماقالادا كەڭەستىك ۇلگىدە «الما-اتا» دەپ جازىپتى. الايدا قازىر ماقالا وشىرىلگەن.

ورىس كنيازىنە ەسكەرتكىش ورناتۋ تۋرالى اڭگىمە وسىدان 3 جىل بۇرىن شىققان. 2020 جىلى جەلتوقساندا سول كەزدەگى مادەنيەت جانە سپورت ءمينيسترى اقتوتى رايىمقۇلوۆا مەن قازاقستان ءميتروپوليتى الەكساندردىڭ كەزدەسۋىندە جوسپارلانادى.

2021 جىلى الەكساندر نەۆسكيدىڭ تۋعانىنا 800 جىل تولادى. سوعان وراي الماتىداعى عيباداتحانا الدىندا ونىڭ مونۋمەنتى تۇرعىزىلادى، دەپ جازىلدى باق-تا.

«كەزدەسۋگە قاتىسۋشىلار 2021 جىلى الماتىدا جاڭادان سالىنعان الەكساندرو-نەۆسكي عيباداتحاناسىنىڭ الدىنا كنياز الەكساندرعا ەسكەرتكىش قۇرۋ ماسەلەسىن قاراستىردى. ميتروپوليتتىك وكرۋگ باسشىسى ايتىپ وتكەندەي، قازىرگى ۋاقىتتا بەدەلدى سۋرەتشىلەر ۇلى دالانىڭ داستۇرلەرىنە ءتان، قازاقستاننىڭ حالىق باتىرلارى سەكىلدى اتقا مىنگەن ادال بيلەۋشىنى بەينەلەيتىن ەسكيزدىك جوبا ازىرلەنۋدە»،-دەپ جازدى mitropolia.kz.

Abai.kz