قازاقستان اسكەرى تۇركيالىق سوققى جاساۋشى «Anka» دروندارىن سىناقتان وتكىزۋدى باستادى. سىناق 2024 جىلدىڭ كوكتەمىنە دەيىن جالعاسادى.

سىناق ءساتتى وتكەن جاعدايدا «Anka» دروندارى قازاق ارمياسىنىڭ اسكەري تەحنيكالارىنىڭ قاتارىن تولىقتىراتىن بولادى.

«تەستتىك ۇشۋلار – قابىلداۋ كەزەڭدەرىنىڭ ءبىرى. كەشەندى تاجىريبەلىك اسكەري پايدالانۋ 2023 جىلدىڭ تامىز ايىندا جوسپارلانىپ، 2024 جىلدىڭ ناۋرىز ايىنىڭ ورتاسىنا دەيىن جالعاسادى، – دەدى ۇۇا جاۋىنگەرلىك دايىندىق جانە جاۋىنگەرلىك قولدانۋ وقۋ ورتالىعىنىڭ باسشىسى شوقان مۇسابەكوۆ.

«Anka» دروندارى تاياۋ شىعىس پەن قاراباق سوعىسىندا ءوزىنىڭ قانداي كۇشكە قاۋقارى بارىن كورسەتكەن.

ونىڭ ارتىقشىلىق سيپاتتارى: الىس قاشىقتىققا ۇشا الاتىنى. سوققىنىڭ دالدىگى مەن ۇزاق ۋاقىت اۋەدە بولا الاتىندىعى. 300 كگ سالماقتى كوتەرىپ ۇشادى. ونىڭ تاعى ءبىر ارتىقشىلىعى – مۇز قاتۋدان قورعايتىن جۇيە ورناتىلعان. بۇل تومەنگى تەمپەراتۋرالاردى اۋەگە كوتەرۋلۋگە مۇمكىندىك بەرەدى.

ايتا كەتەيىك، بىلتىردان بەرى قازاقستان مەن تۇركيا بىرقاتار اسكەري كەلىسىمدەر جاسادى. ونىڭ ىشىندە اقپاراتتىق تەحنولوگيالار سالالارى بويىنشا ىنتىماقتاستىق، اسكەري بارلاۋ سالاسى بويىنشا ىنتىماقتاستىق،  اسكەري ارحيۆتەر، اسكەري تاريح، مۋزەيتانۋ جانە اسكەري جاريالانىمدار سالالارى بويىنشا ىنتىماقتاستىق ت.ب. بار.

ونان كەيىن قازاقستان مەن تۇركيا سوققى جاساۋشى درونداردى ساتىپ الۋ جانە شىعارۋعا قاتىستى كەلىسسوزدەر جۇرگىزىپ، ناتيجەسىندە قازاقستان اۋماعىندا سوققى جاساۋشى «Anka»  دروندارىن جاساۋ ىسكە اساتىن بولعان. اتالمىش درون اتىشۋلى «بايراقتاردان» قۋاتتى ءارى جاڭا سانالادى.

تۇركيالىق دروندار سوڭعى جىلدارى ۇرىس الاڭىندا ءوزىنىڭ تيىمدىلىگىن كورسەتۋدە. سيريا، ليۆيا، قاراباق جانە ۋكراينا سوعىسى بۇل عاسىر دروندار ءداۋىرى ەكەنىن كورسەتتى. قازاقستان دا الەمدىك اسكەري ترەندتەن قالماۋدىڭ امالىن قاراستىرۋدا.

Abai.kz