كۇزگە تامان ۇلتتىق ۆاليۋتا باعامى دوللارىنا 460 مەجەسىنەن اسا باستاۋى ىقتيمال. سەبەبى، بيىلدىڭ ەكىنشى توقسانىندا قازاقستاننىڭ سىرتقى تولەم بالانسى 2,7 ميلليارد دوللارعا مينۋسقا كەتكەن. ياعني، يمپورتقا جۇمسالاتىن قارجى ەكسپورتتان تۇسەتىن تۇسىمنەن ارتىپ كەتىپ وتىر. يمپورت كولەمى 22 پايىزعا ارتسا، ەكسپورت كەرىسىنشە 7 پايىزعا قىسقارعان. بۇل تۋرالى DALA INSIDE جازادى.

ەكىنشى توقساندا قازاقستاننىڭ مۇنايدان تۇسەتىن ۆىرۋچكاسى 2021 جىلدىڭ ەكىنشى توقسانىمەن سالىستىرعاندا 31 پايىزعا ازايعان. سەبەپ - مۇناي باعاسى بيىل تومەندەپ بارادى. بۇل ۇلتتىق قورعا بيىل تۇسەتىن قارجىنىڭ ءبىز ويلاعانداي كەرەمەت بولىپ شىقپايتىنىن بايقاتىپ وتىر.

قازىر تەڭگە بيرجادا ۇلتتىق بانكتىڭ بيۋدجەت ترانسفەرتى بويىنشا كونۆەرتاتسيالارى مەن كۆازيمەملەكەتتىك كومپانيالاردىڭ ۆاليۋتالىق ۆىرۋچكانى ساتۋ بويىنشا وپەراتسيالارىنىڭ ارقاسىندا عانا ءوزىن ۇستاپ تۇر. بىراق ۆىرۋچكا ازايعان سايىن، كونۆەرتاتسيا كولەمى ازايماق. سول كەزدە تەڭگە باعامىنا قىسىم كوبەيە تۇسەدى.

ارينە، ۇلتتىق بانك قانداي دا ءبىر اۋىر شوكتى بولدىرمايتىنى انىق. ەگەر ونداي سيگنالدار بولسا، ينتەرۆەنتسيا مەحانيزمى ىسكە قوسىلادى. بيىلدان باستالعان مامىراجاي ۋاقىتتا ينتەرۆەنتسيا بولماعان ەدى. ال كۇزدە تۋربۋلەنتتى كەزەڭگە اياق باسۋىمىز عاجاپ ەمەس.

ينتەرۆەنتسيا - ۇلتتىق بانكتىڭ تەڭگە باعامىنا دەم بەرۋ ءۇشىن بيرجادا ءوز قورىنداعى دوللارلاردى ساتۋ وپەراتسياسى.

Abai.kz