كيبەرقىلمىستىڭ، ينتەرنەت الاياقتىقتىڭ ءورشىپ تۇرعانىن باسىڭا تۇسپەي بىلمەيدى ەكەنسىڭ. مەنىڭ ۇلىم شىلدەنىڭ 13-ىندە الاياقتىڭ تورىنا شىرمالدى.

ءوزىن بانك حوۋمكرەديت قاۋىپسىزدىك قىزمەتىنىڭ وكىلىمىن دەپ تانىستىرعان بەلگىسىز جان بالامنىڭ سەنىمىنە كىرىپ الىپ، قىزمەتتىك كۋالىگىنىڭ كوشىرمەسىن كورسەتىپ، «سىرتىڭنان بىرەۋلەر نەسيە الىپ جاتىر» دەپ ۇرەيلەندىرىپ، راست دەسك قوسىمشاسىن اشتىرعان. كەلەسى كۇنى ورىن العان وقيعادان كەيىن الدى-ارتىن باعامداعان بالامىز بانكتىڭ اۋداندىق بولىمشەسىنە حابارلاسسا، ولار وبلىس ورتالىعى تالدىقورعانداعى بانكپەن ماسەلەنى شەشۋگە كەڭەس بەرەدى.

سويتسە اتالعان بانكتە قاۋىپسىزدىك قىزمەتى جوق، ۇلىم بارعانشا 8 ملن.تەڭگەگە نەسيە راسىمدەپ، ونىڭ 6 ميلليونىن 2 ادرەساتقا اۋدارىپ ۇلگەرىپتى. بۇعان قوسىمشا وسى بانكتەگى دەپوزيتتە ساقتاۋلى 1 ملن. 200 مىڭ تەڭگەنى جىمقىرىپ ۇلگەرگەن. بولعان وقيعا جونىندە الدىمەن تالدىقورعان قالالىق ىشكى ىستەر باسقارماسىنا، سولاردىڭ نۇسقاۋىمەن سارقان اۋداندىق ىشكى ىستەر بولىمىنە جۇگىنگەن سوڭ ءىس قوزعالدى. اقشا اۋدارىلعان 2 ادامنىڭ دەرەگى اقتوبە وبلىسىنان شىعىپتى. سارقاندىق تەرگەۋشى ا. جۇماباەۆ قر ىشكى ىستەر مينيسترلىگى اقتوبە وبلىسىنىڭ پوليتسيا دەپارتامەنتىنە ماتەريالدى جولدادى. شىلدەنىڭ 27-سىندە اقتوبە وبلىستىق پوليتسيا دەپارتامەنتى باستىعىنىڭ ورىنباسارى ن. سۇلتانوۆ زاڭدى شەشىم قابىلداۋ ءۇشىن ت.س. كۋلديەۆكە، د.ي. سيدوروۆاعا قاتىستى الاياقتىق فاكتىسى بويىنشا ءىس تىركەلگەندىگىن حابارلادى.

دەگەنمەن ءىستىڭ ىلگەرىلەمەۋى كوڭىلگە كىربىڭ تۋعىزادى. پروكۋروردىڭ رۇقساتىمەن كامەرا ارقىلى سول كۇنگى بانكوماتتى پايدالانۋشىلار ءالى كۇنگە تەكسەرىلمەگەن.  بۇل جەردە سونداي-اق كليەنتتىڭ قۇپياسىن باسقا بىرەۋلەرگە اشىپ بەرگەن بانك قىزمەتكەرلەرىنە كۇدىك تۋىندايدى. سەبەبى بانكتەگى تەكسەرۋ جۇيەلەرى قايدا قاراعان؟ كەز كەلگەن ادامنىڭ ەسەپشوتى نەمەسە جەكە ادامنىڭ دەرەكتەرى تۋرالى مالىمەتتى كەز كەلگەن قىزمەتكەر كورە المايدى ەمەس پە؟ كىرگەن ادام بولسا ەلەكتروندى تۇردە كىرگەن ۋاقىتى، نە ءۇشىن كىرگەنى كورسەتىلىپ جۋرنالعا جازىلماي ما؟ نەسيە راسىمدەۋشىنىڭ بيومەتريالىق بەينەسى ەگجەي-تەگجەيلى جان-جاقتى تەكسەرىلمەي مە؟ بيومەتريالىق تەكسەرىستەن بولەك سمس كود سۇرالماي ما؟ تەكسەرۋ جۇيەسى ارقىلى بەينەفوتولار تۇسىرىلمەي مە؟

وسىنداي سانسىز ساۋالدار كوكەيىمىزدەن كەتپەيدى. الاياقتار قاشانعى الشاڭداي بەرەدى؟

جومارت يگىمان،

قازاقستاننىڭ قۇرمەتتى ءجۋرناليسى

Abai.kz