مەن كەيدە ءبىزدىڭ ءوز تىزگىنىمىز وزىمىزدەگى، ەگەمەندى ەل ەكەندىگىمىزگە وتە سەنىمدى بولا بەرمەيمىن. ويتكەنى قازىر بىزگە كىم بولسا سول دىكەڭدەپ، اقىل ايتۋدى جامان ادەتكە اينالدىردى.

اسىرەسە بۇل جان-جاعىنان جاۋ ىزدەگەن كورشىمىزدە ءتىپتى، قالىپتى جاعداي ما دەپ قالاسىڭ. بىزگە قوقان-لوققى جاسايتىنداردىڭ سانىنان دا جاڭىلاسىڭ. جاقىندا سولاردىڭ ساپىنا رەسەيدىڭ بىزدەگى باس كونسۋلى ەۆگەني بوبروۆ دەگەن قوسىلىپتى.

ول وسى تامىز ايىنىڭ 23-ءى كۇنى وزدەرىنىڭ تاسس دەگەن اگەنتتىگىنە قازاقستاندا ورىس ءتىلدى مەكتەپتەردىڭ كۇرت ازايىپ بارا جاتقاندىعىن ايتىپ، قاتتى مۇڭىن شاعىپتى. ول وسىنى ويلاپ، ءتۇن ۇيقىسى ءتورت بولىنەتىن كورىنەدى.

ارينە، بوبروۆ دەگەننىڭ بايبالامى جاۋاپسىز قالعان جوق. ونىڭ ەشبىر نەگىزسىز ايىپتاۋلارىنا ءبىزدىڭ سىرتقى ىستەر مينيسترلىگىنىڭ ارنايى وكىلى ايبەك سمادياروۆ بايىپتى تۇردە، ناقتى دالەلمەن جاۋاپ بەردى.

ونىڭ ايتۋىنشا، ەلىمىزدە بارلىعى 7 مىڭ 711 مەملەكەتتىك مەكتەپ بار. مۇنىڭ 3 مىڭ 957-ءى قازاقشا دا، 1 مىڭ 203-ءى ورىسشا. ال ەندى بىلاي قاراعاندا تاۋەلسىز العان ەلدىڭ مەملەكەتتىك تىلدەگى مەكتەپتەرىنىڭ كوبەيۋى تاڭ قالارلىق نارسە ەمەس، ءتىپتى زاڭدى تەندەنتسيا دەسەك تە ارتىق ەمەس. سولايى سولاي عوي. الايدا، بۇل جەردە وزىمىزگە ءوزىمىز قايشى كەلەتىن ءبىر كىلتيپان بار. ول سمادياروۆ مىرزانىڭ كەلتىرگەن تاعى ءبىر تسيفرى. ول كىسىنىڭ جاۋابىنا قاراعاندا بىزدە تاعى دا اناۋ-مىناۋ ەمەس، 2 مىڭ 551 قازاقشا-ورىسشا ارالاس مەكتەپ بار ەكەن. ال ەگەر بۇعان جوعارىداعى 1 مىڭ 203 ورىس مەكتەبىن قوسساق، ەكەۋى تەڭەسىپ قالماي ما؟ سوندا «قازاق مەكتەپتەرى كوبەيىپ كەلەدى» دەگەنىمىز ءوزىمىزدى-ءوزىمىز الداۋ بولىپ شىقپاي ما؟ وندا نەمەسىنە كونسۋلسىماققا جاۋاپ بەرىپ، اۋرە بولامىز؟

سوسىن، تاعى ءبىر قىزىعى، الگى كونسۋل اراعا ءۇش كۇن سالىپ، قىزمەتتەن كەتكەن كورىنەدى. بىزدەگى كەيبىر «ساراپشىلار» مۇنى جاڭاعى مالىمدەمەسىمەن بايلانىستىرىپ جاتىر. بوس اڭگىمە، ەشبىر قيسىنسىز تۇجىرىم.

بىرىنشىدەن، رەسەيدە ەش ۋاقىتتا بۇدان دا سوراقى اڭگىمەلەردى بىقسىتقان ەشبىر لاۋازىمدى ادام ورنىنان كەتكەن ەمەس.

ەكىنشىدەن، ول مۇمكىن بۇدان دا جايلى جەرگە ورنالاسقان بولار.

ال، ۇشىنشىدەن، ءوزىنىڭ باسقا قىزمەتكە اۋىساتىندىعىن بىلە تۇرا، ءدال وسىلاي ارانداتۋشىلىق جاساماسىنا كىم كەپىل؟

ايتپاقشى، بۇل كونسۋل بىزدەگى ورىس مەكتەپتەرى تۋرالى ونشا قايعىرماسا دا بولادى. وزگە ەمەس، ءوزىمىزدىڭ تۋرا استانا قالاسىندا بيىل ءبىرىنشى سىنىپقا باراتىن بالدىرعانداردىڭ جارتىسىنا جۋىعى ورىس مەكتەبىنىڭ تابالدىرىعىن اتتايدى ەكەن.

كۇلەمىز بە، جىلايمىز با؟

جايبەرگەن بولاتوۆ

Abai.kz