پاندەميا اياقتالىپ، قىتايمەن شەكارا اشىلعالى ۆيزا ماسەلەسى قايتادان جۇرت نازارىن اۋدارا باستادى. اسىرەسە، جاز ماۋسىمى باستالىپ، كەلىپ-كەتەتىن كىسىلەر كوبەيگەن تۇستا بۇل ماسەلە ۋشىىعىپ كەتتى. 

قر ءسىم ۇرىمجىدەگى پاسپورتتىق-ۆيزالىق قىزمەت كورسەتۋ مەكەمەسىنەن ۆيزا كەزەگىن الا الماي قينالعان قانداستاردىڭ ءۇنى ەلىمىزگە جەتىپ، قوعامدىق ۇيىمدار مەن جۋرنايستەردىڭ، بلوگەرلەردىڭ نازارىن اۋدارا باستادى. بۇل ماسەلە بيلىكتىڭ ءار بۋىنىن شىرماپ العان كوررۋپتسيا مەن بيۋروكراتياعا جانە الىپ-بەرۋگە داندەپ العان مەنتاليتەتىمىزگە بايلانىستى جۋىر ماڭدا شەشىلمەيتىن كۇردەلى تۇيىنگە اينالىپ تۇر. دەگەنمەن، شەشۋدىڭ ناقتى جانە تۇبەگەيلى جولىن تاپپاساق تا، ءوز ۇسىنىمىزدى ورتاعا سالىپ كورەيىك.

ءبىرىنشى، قىتايدىڭ پەكين قالاسىندا قر-نىڭ ەلشىلىگى، شاڭحاي، سيان قالالارىندا كونسۋلدىق جانە ءۇرىمجى قالاسىندا پاسپورتتىق-ۆيزالىق قىزمەت مەكەمەسى جۇمىس ىستەيدى. وسى مەكەمەلەردىڭ بارلىعى اۋماق بولىنىسىنە قاراماستان الدىنا بارعان قانداستارعا قىزمەت كورسەتسە، وزدەرىنە تۇسكەن سالماق جەڭىلدەپ، قانداستارىمىز دا مۇمكىندىك الار ەدى.

ەكىنشى، قازىر قىتايداعى كوپتەگەن قانداستارىمىز اسىرەسە اۋىلدىق جەردەگىلەر مال-مۇلكىن ساتىپ، تۇراقتى تىركەۋىن ءوشىرىپ، قازاقستانعا ءبىرجولاتا كوشىپ كەلۋگە دايىندالىپ وتىر. وسى كىسىلەر مەن وتباسىلارعا كەزەككە تۇرماي، توتە بارىپ ۆيزا راسىمدەيتىن مەحانيزم قاراستىرىلسا قۇپ بولار ەدى.

ءۇشىنشى، ەلىمىز قازىر ەلەكتروندى ۇكىمەتكە ءوتتى. سوندىقتان ۆيزا بەرۋ جانە كەزەك الۋ قىزمەتىندە اشىقتىق پەن مولدىرلىكتى تالاپ ەتىپ كۇن سايىن، اپتا سايىن، اي سايىن قانشا ادامنىڭ، كىمدەردىڭ كەزەك جانە ۆيزا العانىن قر ءسىم-ءنىڭ سايتىندا جاريالاپ تۇرسا جانە ول سايت بارلىق قاراپايىم حالىققا قول جەتىمدى بولسا ءجون بولار ەدى.

ءتورتىنشى، قانداستار تىعىز ورنالاسقان بارلىق الىس-جاقىن شەتەلدەردەگى ەلىمىزدىڭ ەلشىلىكتەرى مەن كونسۋلدىقتارىندا ارناۋلى ءبىر قىزمەتكەر قانداستار جۇمىسىمەن اينالىسادى. ولار قازىرگە دەيىن قانداس كۋالىگىن بەرىپ كەلگەن. ەندى قر ەڭبەك جانە حالىقتى الەۋمەتتىك قورعاۋ مينيسترلىگى دايىنداعان «قۇتتى مەكەن» جوباسىن ىسكە اسىرىلادى. قازىر كەلىپ جاتقان قانداستاردان سۇراپ-بىلگەنىمىزدە، كوبى وسى اقپاراتتاردان حابارسىز. وسى اقپاراتتاردى ناسيحاتتاۋدىڭ وڭاي ءارى ءتيىمدى جولدارىن قاراستىرساق، بيلىك تە، حالىق تا ۇتىلماس ەدى.

ءومارالى ادىلبەكۇلى

Abai.kz