اقش-تىڭ رەسەيدەگى بۇرىنعى توتەنشە جانە وكىلەتتى ەلشىسى مايكل ماكفول رەسەي پرەزيدەنتى ۆلاديمير ءپۋتيننىڭ كەيىنگى 20 جىلدا قالاي وزگەرگەنىن ايتىپ بەردى.

«پۋتين 2000 جىلدان باستاپ دەموكراتيانى تۇنشىقتىردى. وعان دەيىن ول باسقاشا بولعان ەدى. مەن 2000 جىلى پۋتين تۋرالى ماقالا جازىپ، ونىڭ قالا وزگەرگەنىن ايتىپ، الەمگە ەسكەرتكەنمىن. ول يمپەرياليست، بۇكىل ءومىرىن كەڭەس يمپەرياسىن قورعاۋعا ارناعان ادام دەگەنمەن 20 جىل بۇرىن الدەقايدا باتىسشىل بولاتىن،-دەدى ول Espresso باسىلىمىنا بەرگەن سۇحباتىندا.

ديپلومات پۋتين العاش ەل بيلەگەن جىلدارى نارىقتىق رەفورمالار جۇرگىزگەنىن جانە جەكە مەنشىكتى قۇرمەتتەيتىنىن ەسكە الدى. بىراق رەسەي پرەزيدەنتى قازىر، اسىرەسە، ۋكرايناعا باسىپ كىرگەننەن كەيىن ەكونوميكاعا مەملەكەتتىك قاتاڭ باقىلاۋدى قايتا بەكىتتى.

«ەكىنشىدەن، ول ءبىر كەزدەرى باتىسپەن ءوزارا قارىم-قاتىناس قۇرۋعا اشىق بولاتىن، ءتىپتى رەسەيدىڭ ناتو-عا كىرۋى تۋرالى دا ايتقان ءسوزى بار. ال قازىر ۋكراينانىڭ ناتو-عا قوسىلعىس كەلگەنى ءۇشىن، ۋكراين جەرىنە باسقىنشىلىق جاساپ وتىر. 2002 جىلى «ەگەر ۋكراينا ناتو-عا كىرگىسى كەلسە، ءوز ەركى. بۇل ءبىزدىڭ شارۋامىز ەمەس» دەگەن. پۋتين ۋاقىت وتە كەلە ناعىز كونسەرۆاتيۆتى پراۆوسلاۆيەلىك ءدىني قۇندىلىقتاردى جاقتايتىن ۇلتشىلعا اينالدى»،-دەيدى ماكفول.

ونىڭ پىكىرىنشە، پۋتين ءاۆتوريتاريزدى كۇشەيتتى، حالقىن باقىلاۋدان شىعارىپ الامىن دەپ قورىققاننان سىرتقى جاۋدى ويلاپ تاپتى.

«ول ناتو-نىڭ كەڭەيۋىنەن ەمەس، دەموكراتيالىق ەكسپانسيادان قورقادى. ول 2000 جىلى سەربيادا، 2003 جىلى گرۋزيادا بولعان نارازىلىقتارعا كۋا بولدى. بۇل ونىڭ اۆتوريتارلىق باسقارۋ جۇيەسىنە قاۋىپ ءتوندىردى. سىزگە مىنانى جەتكىزگىم كەلەدى.

گيتلەر كەڭەس وداعىنا باسىپ كىرگەن 1941 جىلدان بەرى باتىستان رەسەيگە قارسى اسكەري قاۋىپ تونگەن جوق. بىراق دەموكراتيانىڭ قانات جايۋى ءپۋتيننىڭ قولىنداعى بيلىگىنە قاۋىپ ءتوندىردى»، - دەپ ءتۇسىندىردى ماكفول.

مايكل ماكفول 2011-2014 جىلدار ارالىعىندا اقش-تىڭ رەسەيدەگى توتەنشە جانە وكىلەتتى ەلشىسى بولدى.

كەرىمسال جۇباتقانوۆ

Abai.kz