مەملەكەت باسشىسى قاسىم-جومارت توقاەۆ نيۋ-يورك قالاسىنا جۇمىس ساپارى اياسىندا ورتالىق ازيا مەن اقش مەملەكەتتەرى باسشىلارىنىڭ سامميتىنە قاتىستى. بۇل تۋرالى اقپاراتتى اقوردانىڭ رەسمي سايتى حابارلادى.

اقپاراتقا سۇيەنسەك، جيىندا س5+1 سەرىكتەستىگى ارقىلى ەكونوميكا، ەنەرگەتيكا جانە قاۋىپسىزدىك سالالارىندا ورتالىق ازيانىڭ ەگەمەندىگىن، ورنىقتى دامۋىن جانە وركەندەۋىن ودان ءارى نىعايتۋ ءۇشىن بىرلەسىپ جۇمىس ىستەۋ ماسەلەسى تالقىلانىپتى.

سامميتتە مەملەكەت باسشىسى قاسىم-جومارت توقاەۆ اقش پرەزيدەنتى دجوزەف بايدەننەن كەيىن ءسوز سويلەدى. سونىمەن قاتار، شاراعا قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ، وزبەكستان پرەزيدەنتى شاۆكات ميرزيوەۆ قاتىستى.

كەزدەسۋ بارىسىندا ستراتەگيالىق سەرىكتەستىكتى، ساياسي ديالوگتى، ساۋدا-ەكونوميكالىق، ينۆەستيتسيالىق جانە گۋمانيتارلىق سالالارداعى ىنتىماقتاستىقتى ودان ءارى دامىتۋ، سونداي-اق ەۋرازيا قۇرلىعىنداعى بەيبىتشىلىك پەن تۇراقتىلىقتى ساقتاۋ ماسەلەلەرى جان-جاقتى تالقىلاندى.

سامميتتە ەكونوميكالىق ىنتىماقتاستىق ماسەلەسىنە، سونداي-اق امەريكالىق كومپانيالاردىڭ ماڭىزدى قازبا بايلىقتاردى يگەرۋ، جاڭارتىلاتىن ەنەرگيا كوزدەرى، وڭدەۋ ونەركاسىبى جانە باسقا دا باعىتتاردى دامىتۋ مۇمكىندىكتەرىنە باسا ءمان بەرىلدى.

بۇدان بولەك، پىكىرتالاس بارىسىندا قاۋىپسىزدىك پروبلەمالارىن، سونىڭ ىشىندە كيبەرقاۋىپسىزدىك، تەرروريزم، ەكسترەميزم، زاڭسىز ميگراتسيا جانە ەسىرتكى تاسىمالى سەكىلدى قاۋىپ-قاتەرلەردى شەشۋ ءۇشىن ىنتىماقتاستىقتى نىعايتۋ پەرسپەكتيۆالارى قاراستىرىلدى.

پرەزيدەنت الماتى قالاسىندا ورتالىق ازيا مەن اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى ايماقتىق ورتالىعىن اشۋ ىسىندە اقش تاراپىنىڭ قولداۋىنا سەنىم ارتاتىنىن جەتكىزدى.

Abai.kz