قور قۇرۋ تۋرالى كەلىسىمگە 2023 جىلعى 16 ناۋرىزدا تۇركى مەملەكەتتەرىنىڭ ۇيىمىنا (تمۇ) مۇشە مەملەكەتتەر باسشىلارىنىڭ ءسامميتى اياسىندا قول قويىلدى. «تۇركى ينۆەستيتسيالىق قورىن قۇرۋ تۋرالى كەلىسىمدى راتيفيكاتسيالاۋ تۋرالى» زاڭ تۇركى الەمىنىڭ ەكونوميكالىق ينتەگراتسياسىنىڭ العاشقى بىرلەسكەن قارجى ينستيتۋتىن قۇرۋ ءۇشىن ازىرلەندى.

تمۇ-عا 5 مۇشە مەملەكەت: قازاقستان رەسپۋبليكاسى، ازەربايجان رەسپۋبليكاسى، تۇركيا رەسپۋبليكاسى، وزبەكستان رەسپۋبليكاسى جانە قىرعىز رەسپۋبليكاسى قور قۇرىلتايشىلارى رەتىندە تىركەلدى. قور قۇرىلىمى پرەزيدەنتتەن، باسقارۋشىلار كەڭەسىنەن، ديرەكتورلار كەڭەسىنەن، باس ديرەكتوردان جانە قىزمەتكەرلەردەن تۇرادى.

قوردىڭ ءاربىر مۇشەسىنىڭ داۋىس بەرۋ قۇقىعى تەڭ. قوردىڭ شتاب-پاتەرى ىستانبۇل قالاسىندا ورنالاسقان. قور مىناداي فۋنكتسيالاردى ورىندايدى: جوبالاردى، اتاپ ايتقاندا شاعىن ءارى ورتا كاسىپورىنداردىڭ جوبالارىن قارجىلاندىرۋ، تسيفرلىق ينفراقۇرىلىم جاساۋدى جانە ونى جاڭعىرتۋدى قولداۋ، ونەركاسىپ ءوندىرىسىن، كولىكتى، اۋىل شارۋاشىلىعىن، ءتۋريزمدى، سونداي-اق «جاسىل ەكونوميكانى» قوسا العاندا، ءوزارا مۇددەلى سالالاردا دامۋ جوبالارىن قولداۋ.

قوردىڭ جارعىلىق كاپيتالى 500 ملن دوللار كولەمىندە بولماق. سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ مالىمەتىنە قاراعاندا، قوردىڭ جارعىلىق كاپيتالى جالپى نومينالدى قۇنى 350 ملن اقش دوللارىن قۇرايتىن تولەنگەن اكتسيالارعا، سونداي-اق نومينالدى قۇنى 150 ملن اقش دوللارىن قۇرايتىن تارتىلاتىن اكتسيالارعا بولىنەدى. قورعا ءاربىر مۇشە مەملەكەتكە 70 ملن اقش دوللارىن قۇرايتىن تولەنگەن اكتسيادان كەلەدى.

كەلىسىمدى راتيفيكاتسيالاۋ قازاقستان رەسپۋبليكاسىنا ەكونوميكانىڭ باسىم سەكتورلارىنداعى، اسىرەسە شاعىن جانە ورتا كاسىپكەرلىكتى دامىتۋ جوبالارىن قارجىلاندىرۋدى الۋعا، سونداي-اق تمۇ ءوڭىرى اياسىندا ساۋدا-ەكونوميكالىق ىنتىماقتاستىقتى نىعايتۋعا مۇمكىندىك بەرەدى.

Abai.kz