«ەستىمەگەن ەلدە كوپ، ەسەك مىنگەن سارتتا كوپ» دەگەندەيىن پارتيالارعا سەنىم ارتقان سايلاۋشىلاردى سەلت ەتكىزگەن وقيعا ءماجىلىس قابىرعاسىنان شىقتى.

ناقتىلاپ ايتار بولساق، بىزدە اۋزىڭدى اڭقيتىپ، قوس ازاماتتىقپەن دەپۋتاتتىق مانداتتى قالتاعا باساتىن پىسىقايلار دا بار ەكەن.

ەندى ماسەلەنىڭ انىق-قانىعىن ءسوز ەتەتىن بولساق، سەنات سپيكەرى ماۋلەن اشىمباەۆ جەردەن جەتى قويان تاپقانداي: «2022 جىلى قوس ازاماتتىقتىڭ 841 فاكتىسى انىقتالدى. ال، بيىلعى جىلى، ياعني، قاڭتار مەن قازان ارالىعىندا 525 تۇلعانىڭ قوس ازاماتتىعى بارلىعى بەلگىلى بولدى. قوسار ازاماتتىعى بارلاردىڭ اراسىندا جەرگىلىكتى ورگانداردىڭ دەپۋتاتى بولعاندىعى جايتارى دا كەزدەسىپ قالادى»، - دەپ دۇڭك ەتكىزدى.

بەيسەنبى كۇنگى سەناتتاعى «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭنىڭ جوباسىن تالقىلاۋدى قورىتىندىلاعان اشىمباەۆ ءوز ويىن: «ءبىز وسى كەلىسىم دە، قالعان قول قويىلعاندارى دا قازاقستان كونستيتۋتسياسىنىڭ ورىندالۋىنا قىزىمەت ەتەدى دەگەنگە كامىل سەنەمىز»، - دەپ تۇيىندەدى.

وسىلايشا سەنات قوسار جانە ەكىنشى ازاماتتىققا قىرعيداي شۇيلىگىپ، بۋىرقانىپ ءبىر العان سوڭ، «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭنىڭ قابىلدانۋىن قۇپتادى.

Abai.kz