مەملەكەت باسشىسى قازاق ءتىلىن ودان ءارى دامىتۋ ارقاشان مەملەكەتتىك ساياساتتىڭ ماڭىزدى باعىتى بولىپ قالا بەرەتىنىن ۇنەمى ايتىپ كەلەدى.

الگىندە پرەزيدەنت قاسىم-جومارت توقاەۆ «قازاق ءتىلى» قوعامىنىڭ پرەزيدەنتى، ۇلتتىق قۇرىلتايدىڭ مۇشەسى راۋان كەنجەحانۇلىن قابىلداپ، ەكەۋارا ەلىمىزدىڭ مەملەكەتتىك ءتىلىن ءوز تۇعىرىنا قالاي قوندىرۋدىڭ وزەكتى ماسەلەلەرىن تالقىعا سالدى.

مەملەكەت باسشىسىنىڭ ءبىرىنشى رەت قازاق ءتىلىنىڭ قولدانىس اياسىن ارتتىرۋدا ەڭ الدىمەن امالياتتىق (پراكتيكالىق جۇمىستارعا) باعىتتتارعا باسىمدىق بەرگەن ءجون دەگەنى قۋانتىپ تاستادى. تاپ وسى امالياتتىق باعىت ەلىمىزدە دامىماي جاتىر. ويتكەنى ول فيلولوگتاردىڭ قاتىسۋىنسىز جۇزەگە اسادى. ءارى قازاق ءتىلدى ينتەرنەت پايدالانۋشىلاردىڭ: ينتەرنەت تۇتىنۋشى جانە ينتەرنەت قولدانۋشىلار دەپ ەكى ۇلكەن توپقا بولىنگەنىن ەسكەرەتىن كەز كەلدى.

وسى سوڭعى توپتاعىلار ءبىلىم بەرۋ ىسىندەگى، تەحنولوگياداعى جانە مەديا سالاسىنداعى قازاقشا كونتەنت پەن تسيفرلىق ونىمدەردى ازىرلەپ، مەملەكەتتەن كوك تيىن الماي، ميلەتشىلىك رۋحپەن جۇرتقا ۇسىنىپ كەلەدى. ولاردىڭ كىمدەر ەكەنىن، قايدا تۇراتىن، نەمەن اينالاساتىنىن «قازاق ءتىلى» قوعامى بىلگەن دە ەمەس، بىلگىسى كەلمەيتىن شىعار دەگەن ويعا قالاسىڭ. مىنە، ءار جەردە توز-توز بولىپ، مەملەكەت ماڭدايىنان سىيپاماعان مەديا سالاسىنداعى قازاقشا كونتەنت پەن تسيفرلىق ونىمدەردى ازىرلەيتىن اۋدارماشىلار قاۋىمىنا ايرىقشا ءمان بەرۋ قاجەت.

سونداي-اق پرەزيدەنت بالالارعا ارنالعان انيماتسيالىق تۋىندىلار شىعارۋدىڭ، كوپشىلىككە ارنالعان كينو ونىمدەرى مەن عىلىمي-تانىمدىق ادەبيەتتەر قورىن مولايتۋدىڭ، الەۋمەتتىك جەلىلەردە اعارتۋشىلىق باعىتتاعى ارنالار اشۋدىڭ ماڭىزدىلىعىنا نازار اۋداردى. وعان قوسا عالامدىق تسيفرلىق پلاتفورمالاردى قازاقشالاپ، ءتىل ۇيرەنۋگە مۇمكىندىك بەرەتىن وتاندىق اقپاراتتىق جۇيەلەردى كوبەيتۋ قاجەتتىگىن اتاپ كورسەتتى.

بىراق ءبىز وسى باعىتتا «قازاق ءتىلى» قوعامىنىڭ پرەزيدەنتى، ۇلتتىق قۇرىلتايدىڭ مۇشەسى راۋان كەنجەحانۇلى قازاق ءتىلدى ايماقتار مەن وڭىرلەردە سۋبتيترلىك جانە جالعىز ءام قوسار داۋىستى دۋبلياجدىق فيلمدەردى كورسەتەتىن قازاق ءتىلدى كينوتەاترلار مەن كينوپروكات جۇيەسىن قۇرۋدا باتىلدىق تانىتا الا ما، جوق دەگەن ويعا قالدىق.

ال، وسى اۋدارمالار جاسالىنۋى ءۇشىن ۇلتتىق اۋدارماشىلار وداعى قۇرىلۋى كەرەك. ونسىز مەملەكەت باسشىسى ايتقان اسىل ويلاردىڭ ءبارى ەسەبىن تاباتىن جەمقورلاردىڭ جەمساۋىنا كەتەدى. ويتكەنى، امالياتتىق باعىتتاعى ىستەردى ءوزىنىڭ دەربەس كاسىپوداعى بار اۋدارماشىلار وداعى عانا اتقارىپ شىعا الادى. ال، باسقالار ورتادان كيىلىكسە، اقشا تاران-تالاجعا ءتۇسىپ ەش ناتيجە بولمايدى.

ءار وبلىستاعى ءبىلىم بەرۋ ىسىندەگى، تەحنولوگياداعى جانە مەديا سالاسىنداعى قازاقشا كونتەنت پەن تسيفرلىق ونىمدەردى ازىرلەپ، مەملەكەتتەن كوك تيىن الماي ميلەتشىلىك رۋحپەن جۇرتقا ۇسىنىپ كەلە جاتقاندارعا جەكە قولداۋ كورسەتەتىن ۋاقىت تۋدى. بىراق ولارعا وسى قولداۋ كورسەتۋدە «قازاق ءتىلى» قوعامى قولۇشىن سوزا الا ما، ەگەر سوزا قالسا قالاي دەگەن وي كوكەيدى تىرايدى.

پرەزيدەنت ءارتۇرلى الەۋمەتتىك توپتاردىڭ، ونىڭ ىشىندە جاستاردىڭ اراسىندا ءتىل تازالىعىن ساقتاۋ ءۇشىن وقۋ جانە جازۋ ساۋاتتىلىعىن ارتتىرۋعا ارنالعان شارالاردىڭ قاجەتتىلىگىنە ەرەكشە توقتالعانى ءبىزدى قۋانتتى.

بىراق وسى جولى قازاق ءتىلدى اۋدانداردا جەكە تەلەارنالار اشىپ، وعان جاستاردى تارتۋ پروبلەماسى ءسوز ەتىلمەگەنى وكىنشى بولدى...

ەدى مەملەكەت باسشىسىنىڭ اسىل ويىن اتالعان قوعام قالاي اقتايدى؟ وسى ءۇمىتتى اقتاۋدا اۋدارماشىلار قاۋىمىنا جىلىكتىڭ مايلى باسى تيە مە؟ الدە تاعى دا ءبىر مەملەكەت باسشىسىنىڭ قولداۋىنىڭ اتىن جامىلىپ، اقشا اساۋدىڭ مارافونى باستالىپ كەتە مە؟ ازىرشە ساۋال كوپ... جاۋاپ جوق!

ءابىل-سەرىك الىاكبار

Abai.kz