ەندى قازىرگىدەي الىس ارالىق راكەتامەن اتقىلاۋ، «يادرولىق بومبا تاستاي سالامىز!» – دەگەن قورقىتۋ مۇلدە بولمايتىن بولدى!

بىرىككەن ۇلتتار ۇيىمى وسىنداي شەشىم شىعاردى. ونى ورىنداماعاندارعا دۇنيەجۇزى ەلدەرى ورە تۇرەگەلىپ: – قاتىن ەكەنسىڭ! – دەپ قارعايتىن بولعان سوڭ، جاقىندا عانا ءبىر-بىرىمەن قىرعىن سوعىسىپ جاتقان حاماس پەن يزرايل اسكەرلەرى ايدالاعا جينالىپ، باياعى زامان سوعىسىنداعى تاسىلمەن قاتار-قاتار تۇرا قالىستى.

– العا! پالەستينانى قورشاۋعا الامىز! حاماستىڭ كۇلىن كوككە ۇشىرامىز! جاساسىن، ەۆرەيلەر! – دەپ ۇرانداتتى يزرايل اسكەرىنىڭ قولباسشىسى بانان جەپ تۇرىپ.

– ءبىز دە قاراپ قالمايمىز! مۇسىلماندار ەلى جاساسىن! – دەدى حاماستىڭ قولباسشىسى بالمۇزداقتان جالاپ قويىپ.

سوعىستىڭ جاڭا ەرەجەسى بويىنشا، اسكەرلەر ءبىر-بىرىنە تۇرا ۇمتىلىپ، تەك يىقتارىمەن سوعىستى. كىم كۇشتى، كىم يىقتى، كىم ەڭگەزەردەي، سونىڭ تەگەۋىرىنىنە شىداماعان جاۋىنگەرلەر قالپاقتاي ۇشىپ جاتتى. وق اتىلعان جوق، قان توگىلگەن جوق، انالار جەسىر قالمادى، بالالار جەتىم قالمادى! ەكى جاق تەڭ تۇسكەن سوڭ، ءتۇس قايتا ەكى جاقتىڭ «مەن» دەگەن ەركەكتەرى جاپپاي قول كۇرەستەن باق سىناستى.  سوڭىندا ەكى جاق اۋىر ارتيللەريامەن اتىستى. بىراق، راكەتالار جارىلعاندا، اينالاعا تەك تورت شاشىرادى. جاتا قالىپ جەيسىز بە، جالايسىز با، ەركىڭىز ءبىلسىن! گازا سەكتورىنداعى بەيكۇنا سابيلەر اناسىن ىزدەپ، جىلاعان جوق. انالار سوعىسقا لاعنەت ايتىپ، شاشتارىن جۇلعان جوق... جازىقسىز حالىق قىرىلعان جوق!

رەسەي مەن ۋكراينا سوعىسى دا وسى تاسىلگە كوشىستى. ولار قىرىپ-جوياتىن قارۋلارىن مەتاللومعا وتكىزىپ، ءبىرىن-ءبىرى تاياقپەن ۇرىپ قۋالاپ، تاسپەن اتقىلاپ، پىسكەن جۇمىرتقا لاقتىرىسىپ، بۇقالار سياقتى ءسۇزىسىپ دەگەندەي... حالال سوعىس بولدى... زەلەنسكي مەن پۋتين ءبىر-ءبىرىن كارتوشكەمەن اتقىلاسىپ ءجۇر. مەن سەنەمىن، ەندى جەر جىلامايدى. جەتىم بالالار نان سۇرامايدى، انالار جىلاپ، قۇلامايدى... جەر - انا دەمالادى...

Abai.kz