استانا قالاسىندا «العاشقى دارىگەرلىك-سانيتارلىق جاردەم بەرۋ» اياسىنداعى ساياسات پەن تاجىريبە» (ادسج) بويىنشا استانا دەكلاراتسيانىڭ 5 جانە الماتى دەكلاراتسيانىڭ 45 جىلدىعىنا ارنالعان حالىقارالىق كونفەرەنتسيا ءوتىپ جاتىر.

«العاشقى دارىگەرلىك-سانيتارلىق جاردەم بەرۋ اياسىنداعى ساياسات پەن تاجىريبەدەگى: جوعارعى ناتيجەگە قول جەتكىزۋگە تالپىنىس» اتتى كونفەرەنتسياعا بۇكىل الەمدىك دەنساۋلىق ساقتاۋ ۇيىمىنان (بدۇ) وعان مۇشە 70 مەملەكەتتىڭ وكىلدەرى قاتىستى.

بدۇ باس ديرەكتورى ادانوم گەبرەيەسۋس ءوز بايانداماسىندا پرەزيدەنت قاسىم-جومارت توقاەۆتىڭ بارشا باستامالارعا قولداۋ بىلدىرۋىنە كوڭىلى مارقاياتىن جانە قازاق حالقىنا ىستىق ءىلتيپات بىلدىرەتىن العا تارتا كەلە:

«بدۇ ءوز ءوفيسىنىڭ قازاقستاندا اشىلعىنىن ماقتان تۇتادى. ءوز باسىم ءۇشىن قازاقستان اسا ماڭىزدى. مەنىڭ كەلىنىم قازاق، ءارى قوس نەمەرەم دە قازاقتار، سول سەبەپتى ءوزىم دە وسى ەلدىڭ ءبىر بولشەگى بولىپ تابىلامىن»، - دەدى تەدروس ادانوم گەبرەيەسۋس.

ەستەرىڭىزگە سالا كەتەتىن بولساق، ايتىسكەر ءجۇرسىن ەرماننىڭ نەمەرەسى ونىڭ ۇلىنا تۇرمىسقا شىققان بولاتىن.

(سۋرەت اقوردا سايتىنان الىندى)

اقوردانىڭ اقپاراتى

مەملەكەت باسشىسى ددۇ باس ديرەكتورى تەدروس گەبرەيەسۋستى جانە ۇيىمنىڭ ەۋروپاداعى وڭىرلىك بيۋروسىنىڭ باسشىسى حانس كليۋگەنى قابىلدادى.

استانادا ءوتىپ جاتقان مەديتسينالىق-سانيتاريالىق العاشقى كومەك جونىندەگى جاھاندىق كونفەرەنتسيا اياسىنداعى كەزدەسۋ بارىسىندا دۇنيەجۇزىلىك دەنساۋلىق ساقتاۋ ۇيىمىمەن ءوزارا ىنتىماقتاستىق ماسەلەلەرى تالقىلاندى.

مەملەكەت باسشىسى قوناقتارعا ءىلتيپات بىلدىرە وتىرىپ، ەلىمىز ەڭ ماڭىزدى ۇيىمنىڭ ءبىرى سانالاتىن ددۇ-مەن حالىقارالىق دەڭگەيدە ناتيجەلى قارىم-قاتىناس جاساپ وتىرعانىن اتاپ ءوتتى.

– ەلىمىز ارقاشان ءسىزدىڭ قىزمەتىڭىزدىڭ تابىستى بولۋىنا سەپتىگىن تيگىزەدى. قازىرگىدەي كۇردەلى جاعدايدا ددۇ-نى باسقارۋ وتە قيىن ەكەنىن بىلەمىن. بۇل – ناعىز سىناق. سىزگە الەمدەگى كوپتەگەن ەل مەن دەلەگاتتاردىڭ ءتۇرلى پىكىرلەرىنە قۇلاق اسىپ، ءتيىمدى شەشىم تابۋعا جانە مامىلە جاساۋعا تۋرا كەلەدى. سىزگە تابىس تىلەيمىن. ءبىز ءوز تاراپىمىزدان سىزگە ءاردايىم كومەكتەسەمىز جانە قولداۋ كورسەتەمىز، – دەدى مەملەكەت باسشىسى.

قاسىم-جومارت توقاەۆ پاندەميادان كەيىن اتالعان سالانى قالىپقا كەلتىرۋ، حالىق دەنساۋلىعىن ساقتاۋ ىسىندەگى نەگىزگى ماقساتتارعا قول جەتكىزۋ ءۇشىن دەنساۋلىق ساقتاۋ جۇيەسىن نىعايتۋعا قازاقستاننىڭ بەلسەندى تۇردە كىرىسكەنىنە نازار اۋداردى.

پرەزيدەنت ددۇ جەتەكشىلىگىمەن جۇزەگە اسىرىلىپ جاتقان ءتيىستى باستامالارعا تولىق قولداۋ كورسەتۋگە ەلىمىزدىڭ دايىن ەكەنىن ناقتىلادى.

مەملەكەت باسشىسىنىڭ ايتۋىنشا، قازاقستان بۇۇ-نىڭ 2030 جىلعا دەيىنگى ورنىقتى دامۋ ماقساتتارىنا قول جەتكىزۋگە، سونىڭ ىشىندە حالىقتى دەنساۋلىق ساقتاۋ قىزمەتىمەن تولىق قامتۋعا، انا مەن بالا ءولىمىنىڭ دەڭگەيىن تومەندەتۋگە، سونداي-اق تۋبەركۋلەز ەپيدەمياسىن تولىقتاي جويۋعا نيەتتى.

Abai.kz