وتكەن اپتاداعى ەڭ قايعىلى وقيعا – 28 قازان كۇنى تۇندە قاراعاندى وبلىسىنداعى كوستەنكو اتىنداعى شاحتادا بولعان جارىلىس. وسى ءبىر قايعىلى جايتقا بايلانىستى 29 قازان قازاقستان رەسپۋبليكاسىندا جالپىۇلتتىق ازا تۇتۋ كۇنى بولىپ جاريالاندى.

شاحتادا ورىن العان اپات كەزىندە 252 ادام ىشتە بولىپ، كەيىن ولاردىڭ 205-ءى جەر بەتىنە شىعارىلدى. قر توتەنشە جاعدايلار مينيسترلىگىنىڭ مالىمەتىنشە، اپاتتان قازا تاپقان كەنشىلەردىڭ سانى 46-عا جەتىپ وتىر.

ەندى قىزمەتتىك مانساپتىق ءوسۋ جولىن قاراعاندىدان باستاعان جانە وسى وبلىستى 2009 جىلدىڭ 19 قاراشاسىنان 2012 جىلدىڭ 20 قاڭتارىنا دەيىن باسقارعان بۇرىنعى پرەمەر-مينيستر سەرىك احمەتوۆ قر پرەزيدەنتىنىڭ تەلەراديوكەشەنى ازىرلەگەن «وچاگ سمەرتي - دوكۋمەنتالنىي فيلم. سامايا كرۋپنايا تراگەديا نا شاحتە يم. كوستەنكو كازاحستان سەگودنيا» اتتى 20 مينۋتتىق دەرەكتى فيلمدە قاراعاندىداعى ششاحتا ورىن العان قايعىلى وقيعاعا قاتىستى ءوز ويىن ورتاعا سالدى.

«10 جىلدا قانشاما وسىنداي قايعىلى جاعدايلار بولىپ، 140-تان استام كەنشىلەرىمىز بەن مىقتى ماماندارىمىز قۇربان بولدى. ولاردىڭ وتباسىلارى، قانشاما ادام زارداپ شەكتى. بۇل ۇلكەن جاۋاپكەرشىلىك. ەندەشە، «ارسەلورميتتال تەمىرتاۋ» جاۋاپقا تارتىلۋى كەرەك جانە تەك قازاقستاندا عانا ەمەس، ونى حالىقارالىق دەڭگەيدە جازالاۋ كەرەك»، - دەيدى قازاقستاننىڭ بۇرىنعى پرەمەر-ءمينيسترى.

سونىمەن قوسا: «ارسەلورميتتال تەمىرتاۋ» قوجايىندارى مەن باسشىلىعىن جاۋاپكەرشىلىككە، ءتىپتى قىلمىستىق جاۋاپكەرشىلىككە تارتۋ ءۇشىن مەملەكەت حالىقارالىق قاۋىمداستىقتىڭ نازارىن اۋدارۋى كەرەك دەپ ويلايمىن»، - دەيدى سەرىك احمەتوۆ.

دەرەكتى فيلمدە «ارسەلورميتتال تەمىرتاۋ» نىساندارىنداعى اپاتتىڭ كوپ بولۋىنىڭ باستى سەبەبى – ادام قاۋىپسىزدىگىن قامتاماسىز ەتۋ باعىتىندا ەش اقشا بولىنبەگەندىگى جانە باسشىلىقتى تەك تۇسكەن اقشا قىزىقتىرعانىن العا تارتادى.

سەرىك احمەتوۆ شاحتانىڭ جاڭا يەسى وزىمىزدەن شىعىپ، ادام ومىرىنە قۇرمەتپەن قاراۋ كەرەكتىگىن ايتقان.

سەرىك احمەتوۆتىڭ: «نەگە؟ ويتكەنى بۇل نەمقۇرايدىلىق، سالاقتىق قىلمىسقا پارا پار جانە ول ونەركاسىپتىك، تەحنيكالىق قاۋىپسىزدىككە مول قارجى ءبولىنىپ جاتقانىنا قاراماستان ۇزاق جىلدار بويى جالعاسىن تاۋىپ كەلدى»، - دەگەن ءسوزى بيلىككە وي سالۋعا ءتيىس.

ويتكەنى، احمەتوۆ – بۇرىنعى بيلىكتىڭ ەل قازبا بايلىقتارىنىڭ وزگەنىڭ قولىنا كەتۋىندەگى ورىن العان بارشا بىلىق-شىلىقتى سىرتتاي ەمەس، ىشتەي بىلەتىن جان.

Abai.kz