29 قازان, جەكسەنبى كۇنى رەسەي قۇرامىنداعى داعىستان رەسپۋبليكاسىنىڭ استاناسىندا ءبىر جارىم مىڭداي ادام ماحاچكالا اۋەجايىن باسىپ الىپ، انتيسەميتتىك پروتەستتىك اكتسيا وتكىزدى.

تەل-اۆيۆتەن ۇشىپ كەلۋگە ءتيىس رەيستى قايىرا كەرى قايتارۋدى ماقسات تۇتىپ، ءيزرايلدىڭ گازا سەكتورىنداعى ارەكەتىن ايىپتاپ، جويىتتەردى ايماقتان قۋعا شاقىردى.

ەلىرگەن توپ اۋەجايدىڭ جازدىق ۇشۋ الاڭىنا ءوتىپ، جولاۋشىلار اراسىنان يزرايلدەن كەلگەندەردى ىزدەدى. پوليتسيامەن قاقتىعىس ورىن الىپ، وسى تارتىپسىزدىك كەزىندە 20 ادام جاراقات الدى. ونىڭ 10-ىنىڭ جاعدايى اۋىر. ال، تىنىشتىق ساقشىلارى اراسىندا 9 ادامنىڭ زارداپ شەككەنى ءمالىم بولدى.

رەسەي پرەزيدەنتى ۆلاديمير پۋتين وسى انتيسەميتتىك تارتىپسىزدىكتىڭ ورىن العاندىعى ءۇشىن باتىس پەن ۋكراينانى ايىپتادى. بۇعان جاۋاپ رەتىندە ۋكراينا ءسىم-ءى رەسەيدىڭ انتيسەميتتىك تارتىپسىزدىكتى ۇيىمداستىرۋعا كيەۆتىڭ قاتىسى بار دەگەن رەسەيلىك ساندىراققا قاتىستى «ساۋدىڭ تاماعىن ءىشىپ اۋىرۋدىڭ ءسوزىن سويلەۋشىلىك» دەپ تاپتى.

وسىنداي شاقتا قاشاندا ءپۋتيننىڭ قاسىنان تابىلاتىن قادىروۆ تا قاراپ قالمادى. كورشىسىندە ورىن الىپ جاتقان وقيعاعا قاتىستى رامزان قادىروۆ پۋتينمەن بىرگە قوزعالىپ، «ەگەر وسىنداي تارتىپسىزدىكتەر وزگە جەردە ورىن الاتىن بولسا، وق جاۋدىرۋ ارقىلى تاۋباسىنە كەلتىرۋ كەرەك» دەپ مالىمدەدى.

رەسپۋبليكادعى ءىىم جانە روسگۆارديا وكىلدەرىمەن بولعان سەيسەنبى كۇنگى وتىرىستا: «ەگەر الدەكىم رۇقسات ەتىلمەگەن شەرۋگە شىعا قالسا، ۇستاپ الىپ، تۇرمەگە قاماڭدار. نە بولماسا توبەسىنەن ءۇش مارتە ەسكەرتۋ وعىن اتىڭدار. وعان دا توقتالمايتىن بولسا، زاڭ تالابىن ورىندامايتىن بولسا، وندا ءتورتىنشى وقتى قاق ماڭدايىنا اتىڭدار! ولار بۇدان كەيىن اتتاپ باسپايدى. بۇل مەنىڭ بۇيرىعىم»، دەپ وداندا قاتتى ايتتى.

تاعى ءبىر وسىنداي اكتسيا 28 كۇنى كاراچاەۆو-چەركەسيادا ورىن الدى. انتيسەميتتىك اكتسيالار كاۆكاز رەسپۋبليكالارىنىڭ بارىندە بولدى.

داعىستاندا بۇگىنگى كۇنى تارتىپسىزدىكە قاتىستى دەگەن ايىپپەن 83 ادام ۇستالدى. بۇل تۋراسىندا داعىستان باسشىسى سەرگەي مەليكوۆ ايىپكەرلەر «ءادىل جازادان قاشىپ قۇتىلمايدى» دەپ ۋادە بەردى.

Abai.kz