"سەمەي ورمانى" رەزەرۆاتىنداعى الاپات ءورتتىڭ سەبەپتەرىن تەرگەۋ جونىندەگى ارنايى كوميسسيا ءوز قورىتىندىسىن ۇسىندى، دەپ حابارلايدى Ulysmedia.kz.

ەكولوگيا جانە تابيعي رەسۋرستار ءمينيسترى ەرلان نىسانباەۆ بريفينگ بارىسىندا ارنايى كوميسسيا اباي وبلىسىنداعى ورمان ءورتىنىڭ سەبەبىن انىقتاعانىن مالىمدەدى. ونىڭ ايتۋىنشا، كوميسسيا قۇرامىنا مەملەكەتتىك ورگاندار كىرگەن.

"ارنايى كوميسسيانىڭ قورىتىندىسى بار، وندا ءورتتىڭ تۇتانۋىنا قۇرعاق نايزاعاي سەبەپ بولعانى انىق كورسەتىلگەن. بۇعان دالەل بار – ءورتتى تاراۋىنا سەبەپ بولعان جەكە اعاش. بۇل رەسمي نۇسقا جانە ءبىز ونى ۇستانامىز", - دەدى مينيستر.

نىسانباەۆ قازاقستاندا ورماندى قاساقانا ورتەۋ فاكتىلەرى بولعانىن مويىندادى. الايدا اباي وبلىسىندا بولعان وقيعا تابيعي قۇبىلىستاردىڭ سالدارى ەكەنىن ايتتى.

"نەگىزىنەن دالا ورتتەرى قاساقانا قويىلادى دەپ ايتۋ دۇرىس ەمەس. ستاتيستيكا كورسەتكەندەي، ورمان ورتتەرىنىڭ 70%-ى – اۋىلشارۋاشىلىق ورتتەرىنىڭ ناتيجەسى. مەنىڭ تاجىريبەمدە سەمەي وبلىسىندا جۇمىس ىستەگەن شاعىمدا تاۋلىگىنە 25 قۇرعاق نايزاعاي بولاتىن ەدى", - دەدى مينيستر.

ەسكە سالايىق، “سەمەي ورمانى” رەزەرۆاتى اۋماعىندا 8 ماۋسىمدا ءورت تۇتانعان بولاتىن. 9 ماۋسىم كۇنى كەشكە قاراي ونىڭ اۋماعى 60 مىڭ گەكتارعا دەيىن جەتتى. وسىعان بايلانىستى سەمەي قالاسىندا توتەنشە جاعداي جاريالاندى.

اباي وڭىرىندەگى ەل تاريحىنداعى ەڭ ءىرى ورتكە بايلانىستى توتەنشە جاعدايلار مينيسترلىگىنىڭ باسشىسى يۋري يلين قىزمەتىنەن بوساتىلىپ، جاڭا مينيستر تاعايىندالدى. اباي وبلىسىنىڭ اكىمى ءوز مىندەتىن دۇرىس اتقارماعانى ءۇشىن سوگىس الدى.

ورتپەن ارپالىسىپ ءجۇرىپ 14 ادام قازا تاپتى. قارالى وقيعاعا بايلانىستى 12 ماۋسىم ەلىمىزدە ازا تۇتۋ كۇنى بولىپ جاريالاندى.

بۇدان بۇرىن باس پروكۋراتۋرا ورمان ءورتىنىڭ شىعۋى سەبەبى بويىنشا ءۇش نۇسقا تەكسەرىلىپ جاتقانىن ايتتى.

سونداي-اق، قر باس پروكۋرورىنىڭ ورىنباسارى جاندوس ومىراليەۆ اباي وبلىسىنداعى ورمان ءورتى بويىنشا ءوز قىزمەتىنە سالعىرت قاراعان شەنەۋنىكتەر قىلمىستىق جاۋاپكەرشىلىككە تارتىلاتىنىن مالىمدەگەن.

Abai.kz