ۇلتتىق ۆاليۋتا ورىنسىز پافوس پەن پاتەتيكانى كوتەرمەيدى!
![](https://abai.kz/content/uploads/2023/11/274551562_519885249668945_3270531389348565912_n.jpg)
وسى بىزدە ءبىر جامان ادەت بار: جىل سايىن تويلاناتىن ۇلتتىق ۆاليۋتامىز – تەڭگە كۇنى اسىرە قارجىلىق پاتريوتيزمگە بەرىلىپ، بوركىمىزدى اسپانعا لاقتىرىپ تويلايمىز دا، تەڭگەنىڭ تاۋقىمەتتى تاعدىرى تۋرالى اۋىز اشپايمىز: تۇنىپ تۇرعان پافوس پەن پاتەتيكا!
مىنە، بۇگىن ۇلتتىق ۆاليۋتامىز ەنگىزىلگەنىنە 30 جىل تولىپ وتىر. ۇلكەندى-كىشىلى جيىندار وتپەك، ونىڭ ەڭ ۇلكەنىنە پرەزيدەنت قۇتتىقتاۋ حات جولدار.
ءسوز جوق، ۇلتتىق ۆاليۋتا – كەز كەلگەن مەملەكەتتىڭ تاۋەلسىزدىگىنىڭ سيمۆولى. ونى قۇرمەتتەپ، قاستەرلەۋ كەرەك. مەملەكەت قارجىسىن كوزدىڭ قاراشىعىنداي ساقتاپ، ەسەلەپ جۇرگەن قارجىگەرلەردىڭ دە ەڭبەگىن ەلەپ-ەسكەرۋىمىز دە قاجەت.
بىراق 30 جىل بويىنا ەلدى باسقارعان بيلىك تەڭگەنى قاستەرلەدى مە؟
قاستەرلەسە، وسى ۋاقىت ىشىندە ول 100 ەسە قۇنسىزدانار ما ەدى؟ سول قۇنسىزدانۋدىڭ كەسىرىنەن جالاقىسىن تەڭگەمەن الاتىن قاراپايىم حالىقتىڭ تۇرمىس جاعدايى وسىنشاما بەيشارا حالگە تۇسەر مە ەدى؟!
وسى جىلدار بويىنا قولدان قولعا كوشىپ، بيلىككە جاقىن ات توبەلىندەي عانا توپتىڭ قولىندا بولعان جەكە بانكتەردىڭ قۇبىجىق كلاندىق جۇيەنىڭ سيمۆولىنا، ساياسي امبيتسيالارىن قاناعاتتاندىرۋدىڭ قوزعاۋشى كۇشىنە اينالعانىن نەگە ايتپايمىز؟! وركەنيەتتى ەلدەردەن از عانا پروتسەنتكە اقشا الىپ، ءوز حالقىنا 20-30 پروتسەنتكە كرەديت بەرىپ، حالىقتىڭ قانىن سورعان وسى بانكتەر ەمەس پە؟! ءالى دە سورىپ كەلەدى!
«قارجىگەرلەر كۇنى» دەيمىز، سول قارجىنى جىل سايىن جىمقىرىپ جۇرگەندەردىڭ ءبىرازى سول قارجىگەرلەر ەمەس پە؟ ميللياردتاعان قارجىنى شەتەلگە ىتقىتىپ جىبەرگەن دە سولار ەمەس پە؟!
مەيرام كۇنى قارا اسپاندى توندىرمەي-اق قويايىن دەپ ەدىم، بىراق بۇگىنگى شەكتەن شىققان پافوستى قۇتتىقتاۋلاردى وقىپ وتىرىپ، وسىنى جازۋعا بەل بۋدىم.
اۋرۋىن جاسىرعان ارام ولەدى: بۇگىنگى مەرەيتوي كۇنى وسى جانە باسقا دا وزەكتى ماسەلەلەر ايتىلسا دەگەنىم عوي.
ءامىرجان قوسان
Abai.kz