كولىك ءمينيسترى مارات قاراباەۆ استانادا سالىنىپ جاتقان LRT قۇرىلىس-مونتاج جۇمىستارىن اياقتاۋ ءۇشىن كەلەسى جىلى شامامەن 45 ملرد تەڭگە، ال جۇمىس كولەمى ۇلعايار بولسا 150 ملرد تەڭگەگە دەيىن قاراجات سۇراتانىن ايتتى.

«بيىل جوباعا 52 ملرد تەڭگە ءبولىندى. جىل باسىندا وسى سومانى مينيسترلىك ەندى سۇراپ جاتىر دەگەن اقپارات تارادى. اڭگىمە ول جايلى ەمەس. ول سوما ءبولىنىپ، ىرگەتاس قازىقتارىن قاعۋعا باعىتتالدى. ول جۇمىس 96 پايىز ورىندالدى. ال تىرەۋ ورناتۋ جۇمىستارى 76 پايىزعا اياقتالدى. قۇرىلىمدارىن ءبىر-بىرىنە جالعاۋ جۇمىستارى، بىلۋىمشە، 82 پايىز جاسالدى. بۇل – بيىل اياقتالعان جۇمىستار»، – دەدى مارات قاراباەۆ.

سونداي-اق ۆەدومستۆو باسشىسى كەلەسى جىلى جوباعا قانشا قاراجات قاجەت بولاتىنىن ايتتى.

«كەلەسى جىلى قۇرىلىس-مونتاج جۇمىستارىن اياقتاۋ ءۇشىن شامامەن 45 ملرد تەڭگە كەرەك بولادى. قازىر قۇرىلىس الاڭىندا 1,5 مىڭعا جۋىق جۇمىسشى ەڭبەك ەتىپ جاتىر. ەگەر جۇمىس اۋقىمى كەڭەيسە، وندا قوسىمشا 150 ملرد تەڭگەگە دەيىن قاراجات سۇرايمىز. الايدا نىساندى اياقتاۋ جوسپارى 2025 جىلعا كوزدەلگەن. العاشقىدا 8 ستانتسيا مەن 5 پويىز جۇمىسىن باستايدى، – دەدى مينيستر.

فوتو: اشىق دەرەككوزدەن

Abai.kz