بوستاندىققا ۇمتىلعان اسقاق ارمان مەن قايسار رۋحتىڭ جەڭىسى - تاۋەلسىزدىك. اتا-بابامىزدىڭ سان عاسىرلىق كۇرەسىنىڭ ناتيجەسىندە يە بولعان ەگەمەندىگىمىز بۇگىنگى ۇرپاق ءۇشىن قانشالىقتى ماڭىزدى؟ قازىرگى تاۋەلسىزدىك ۇرپاقتارى  ەركىن  ەلدىڭ  ازات  ويلى ازاماتتارىنا اينالىپ ۇلگەردى.  ولار ءۇشىن  تاۋەلسىزدىك كۇنى قازاق دۇنيەتانىمىنداعى قاسيەتتى ۇعىمعا جاتادى. سوندىقتان كەيىنگى تولقىننىڭ تاۋەلسىزدىك جايىنداعى  ويلارى ورنىعىپ،  پىكىرلەرى  قالىپتاسىپ ۇلگەرگەن. وسى ورايدا،   «شىعىس» وڭىرلىك قولباسشىلىعىنا قاراستى 5518 اسكەري ءبولىمىنىڭ ساربازدارى ەل  تاۋەلسىزدىگى جايىنداعى مازمۇندى ويلارىن ورتاعا سالدى. 

بايارحان نۇرمۇعامەت، قاتارداعى جاۋىنگەر: 

مەن تاۋەلسىزدىكتى -  ۇلى ماقساتتارعا جول باستار تەمىرقازىق، حالقىنا كۇش-قۋات بەرەر رياسىز كۇن شۇعىلاسىنا تەڭەيمىن. ماڭدايىمىزعا بىتكەن ەلدىگىمىز بەن بەرەكەلى بىرلىگىمىزدى، باياندى تىرلىگىمىزدى كوزدىڭ قاراشىعىنداي ساقتاۋدا جان اياماي قىزمەت ەتۋگە دايىنمىن. ۇلتتىق ۇلان قاتارىنا شاقىرىلعان تۇستان باستاپ  جاۋىنگەرلىك جاساق ساپىندا  قالا كوشەلەرىن ارالاپ، ءتارتىپتىڭ ساقتالۋىن باقىلايمىن. قىزمەتتىك مىندەتىمدى ورىنداۋ بارىسىندا نازارىما ءبىراز  دۇنيە ىلىكتى. اسىرەسە، كوشەدە ءماز-ءمايرام بوپ كەلە جاتقان بالا مەن انانىڭ جايماشۋاق جۇزدەرى، ارقا-جارقا بولىپ، قىران-توپان كۇلكىگە قارىق بولعان  تاكسيستەردىڭ تۇرىسى، سپورتتىق الاڭداردا  اق تەر، كوك تەرگە ءتۇسىپ، اسىر سالىپ  ويناعان بالالار شۋىلى، ونەرلى جاستاردىڭ ەل كوپ شوعىرلانعان جەرلەردە دومبىرا ويناپ، ۇلتتىق اسپابىمنىڭ اۋەلەگەن كۇمبىرى، قازاق كۇرەسىنە اسىققان بىلەكتى جاستاردىڭ شوعىرى، ءتىپتى يت-مىسىعىمەن  بەيمارال سەرۋەندەپ جۇرگەن جاندار بولسىن، بارلىعى دا - بەيبىت اسپان استىندا مامىراجاي  كۇن كەشكەن ازات ەلدىڭ تۇرعىندارى ەكەندىگىن ەسىڭە سالادى. مىنە، وسى ءبىر كورىنىستىڭ ار جاعىندا  ازاپپەن كەلگەن ازاتتىق دەگەن قاستەرلى ۇعىم جاتىر. جەلتوقساندا جارق ەتكەن جالىندى جاستار قازاققا ازاتتىق تاڭىن سىيعا تارتتى. وسىلايشا كۇللى جاھانعا قازاقتىڭ قايراتىن، ايبىنىن تانىتتى. ءبىز تاۋەلسىزدىك ۇرپاقتارى قۇندى اسىل مۇرامىزدى قاستەرلەۋ قاجەتپىز.  وتكەنگە زەر سالساق، تاريحتىڭ  تەپەرىشى مەن تاعدىردىڭ تالكەگىمەن قازاق جەرىنە اياق باسىپ، پانا ىزدەگەن قانشاما ۇلتتار مەن ۇلىستاردى   كەۋدەسىنەن قاقپاي، باۋىرىنا باسقان قازاق حالقىنىڭ كەڭپەيىلدىلىگى مەن مەيىرىمدىلىگى ءالى دە ۇزىلمەي، بۇگىنگە دەيىن جالعاسىپ جاتقانداي اسەرگە بولەنەسىڭ. لايىم، ءتاڭىر وسىنداي كەڭدىگىمىز بەن اۋىزبىرلىگىمىزدەن  ايىرماسىن.

ەسحات باۋىرجان، قاتارداعى جاۋىنگەر: 

تاۋەلسىز قازاقستاننىڭ جاستارى ءۇشىن كەلەشەككە جۇكتەلەر مىندەت تە وتە  جاۋاپتى. ويتكەنى، الەمنىڭ دامىعان ەلدەرىنىڭ قاتارىنا قوسىلىپ، ءححى عاسىردىڭ تورىنە شىعارۋ -  بىزدىڭ الدىمىزعا قويىلعان مىندەت، ءارى ۇلتتىڭ نامىسىنا سىن بولىپ تابىلادى. سوندىقتان وتان الدىنداعى بورىشىمدى وتكەرىپ بولعان سوڭ، ينجەنەر ماماندىعى بويىنشا قىزمەت ەتىپ، ەلىمىزدىڭ دامۋى جولىنا ءوز ۇلەسىمدى قوسقىم كەلەدى. ەلىمىز ءۇشىن ەڭبەكتەنىپ، حالقىمىز ءۇشىن قىزمەت ىستەسەك – بوستاندىقتىڭ بوز الا تاڭىنىڭ قادىرىن بىلگەندىگىمىز بولار. مەن سەۋل قالاسىنداعى شۋي دجوۋ تەحنولوگيالىق ۋنيۆەرسيتەتىنەن ءبىلىم الدىم. بىلىكتى مامانداردان يگەرگەن ءىلىمىمدى كۇنى ەرتەڭ تۋعان ەلىمنىڭ وركەندەۋىنە ارناسام  –  مەنەن اسقان باقىتتى جان جوق شىعار. جالپى، تاۋەلسىزدىك مەرەكەسىن جاس ۇرپاق جۇرەگىمەن سەزىنۋى كەرەك. تاۋەلسىز ەلدىڭ ەڭ باستى تۇعىرى - ول ءبىلىمدى جاستار دەپ ويلايمىن.

داۋلەت امانباەۆ، قاتارداعى جاۋىنگەر: 

تاۋەلسiزدiكتiڭ تۇعىرىنا قونۋى – بiزدiڭ اتا-بابالارىمىز ارمانداعان سان عاسىرلىق ازاتتىق سالعان سۇرلەۋدىڭ داڭعىل جولى ىسپەتتەس. الاعاي دا بۇلاعاي قيلى-قيلى زامانادان باز كەشىپ، قانشاما ارپالىستى باستان كەشكەن ءبىزدىڭ جۇرت ەل بولىپ قالىپتاسۋدى ءاماننان ماقسات تۇتتى. سول جولدا جۇدىرىقتاي جۇمىلعان جەر قايىسقان قول اق نايزانىڭ ۇشىمەن، اق بiلەكتiڭ كۇشiمەن  ەل ءۇشىن ەگەسكە ءتۇستى. ويتكەنى، ولاردىڭ بويىن كەرنەگەن وتانعا دەگەن ىستىق ماحابباتپەن استاسقان جاۋىنگەرلىك رۋح ەدى. مەنىڭ دە مەرزىمدى اسكەري  قىزمەتىمدى وتكەرۋ بارىسىندا – جاۋىنگەرلىك رۋحىمنىڭ اسقاق بولعانى، اسىلى ابزال. ال قايتپاس قايسار رۋح بابالار ەرلىگىن ساناڭنىڭ تۇيسىگىمەن  تۇسىنە بىلگەندە عانا بويىڭا قونادى. ەلى ءۇشىن ەمىرەنگەن ەر قادىرىن باعالايتىن مەن ءۇشىن بۇل مەرەكەنىڭ  قۇندىلىعى جوعارى. سوندىقتان  تاۋەلسىزدىككە جەتۋ جولى  قانشالىقتى ناۋبەتكە تولى بولسا، ازات جەردىڭ اۋاسىمەن تىنىستاۋدىڭ باياندىلىعى دا سونشالىقتى جاۋاپتى ەكەنى اقيقات. مەنىڭ ويىمشا، جاس ۇرپاق تاۋەلسىزدىكتىڭ تاعىلىمدارىن تانىپ، قاستەرلەپ،  قۇرمەتتەپ وتىرۋى كەرەك. ويتكەنى، تاۋەلسىزدىك بىزگە بارىنەن دە قىمبات.

تۇرسىنبەك ناۋرىزباي، قاتارداعى جاۋىنگەر: 

اينالاعا كوز جۇگىرتسەك، قازىرگى گەوساياسي احۋال كۇردەلى شيەلەنىسكە تولى.  مۇنىڭ بارلىعى الەمدەگى جاعدايدىڭ تۇراقسىزدىعىن اڭعارتسا كەرەك.  الەمدە بولىپ جاتقان كەلەڭسىز وقيعالار تۇتاس ەلدىڭ قۇتىن قاشىرىپ،  بەرەكەسىن كەتىرگەنى  بەسەنەدەن بەلگىلى. ال، بەيبىت اسپان استىندا عيبراتتى عۇمىر كەشۋ ءبىزدىڭ ەلدە ءومىر سۇرگەن ءاربىر ازاماتتىڭ ماڭدايىنا جازىلعانداي. مەن ۇلتتىق ۇلان ساپىندا ابىرويلى قىزمەت ەتىپ، وزىمە جۇكتەلگەن جاۋىنگەرلىك تاپسىرمالاردى ورىندالۋ ۋاقىتىنان بۇرىن اتقارۋدامىن. وسىلايشا، جەدەل ءارى شاپشاڭ قوزعالىستىڭ يەسى ەكەندىگىمدى  بايقاتقىم كەلەدى. وسىلايشا، اسكەري بولىمدە بارىنشا بەلسەندىلىك  تانىتىپ، الداعى ۋاقىتتا كەلىسىمشارت بويىنشا قىزمەتكە تۇرعىم كەلەدى.  مەن وتان قورعاۋ جولىندا تايىنباس مىنەز قاجەتتىگىن بىلەمىن. جالپى، بۇگىنگى تاڭدا اسكەر قاتارىنا شاقىرتىلعان ساربازدى جاعىمدى جاڭالىقتار كۇتۋدە. مىسالى، اسكەردەن كەيىن ءوزىڭ قالاعان جوعارى وقۋ ورىنىنا تەگىن تۇسە الاسىڭ. سوندىقتان بۇل جاڭالىق بىلىمگە قۇشتار جانداردىڭ وتانعا دەگەن قۇلشىنىستارىن ەسەلەي تۇسپەك دەگەن ويدامىن. مەن جاڭاشىل باستامانى ەگەمەندىكتىڭ تاعى ءبىر ەرەن جەڭىسىنە بالايمىن.

ازىرلەگەن رۇستەم مۇحامەت-راقىم

Abai.kz