استانادا «دارىن» مەملەكەتتىك جاستار سىيلىعىنىڭ لاۋرەاتتارىن ماراپاتتاۋ ءراسىمى ءوتتى.

شاراعا قر مادەنيەت جانە اقپارات ءمينيسترى ايدا بالاەۆا، پارلامەنت ءماجىلىسىنىڭ دەپۋتاتتارى، قوعام قايراتكەرلەرى مەن ماراپات يەلەرى قاتىستى.

مينيستر ءوز سوزىندە «دارىن» جاستار ءۇشىن ەڭ ماڭىزدى سىيلىق ەكەنىن اتاپ ءوتتى.

«ارينە، ونەر-ءبىلىم – ادامنىڭ تالابىنان تۋسا، ونىڭ ىشكى ءتالىمى مەن مادەنيەتى – تۇلعانىڭ زيالى ساناسى مەن ۇلتتىڭ ساپاسىنان. سوندىقتان دا، ەل پرەزيدەنتى قاسىم-جومارت كەمەلۇلى توقاەۆ زيالى، ينتەللەكتۋالدى ۇلت تۋرالى ايتقاندا، ەڭ الدىمەن ونىڭ نەگىزىن قۇراۋشى – وزدەرىڭىزدەي ونەرلى دە ءبىلىمپاز عانا ەمەس، تەرەڭ سانالى، رۋحاني ساپالى جاندار تۋرالى ايتادى.

مەملەكەت باسشىسىنىڭ سوڭعى جىلدارى جۇرگىزىپ جاتقان اۋقىمدى رەفورمالارى دا وسىنداي جاستارىمىزدىڭ ەرتەڭى ءۇشىن جاسالىپ جاتىر. بولاشاق قازاقستاننىڭ الەمدىك ارەنادا شىن مانىندە وركەنيەتتى، زيالى دا زايىرلى، وزىق ويلى بولۋىنىڭ بىردەن-ءبىر كەپىلى دە وسى. ونىڭ نەگىزىندە قاراپايىم، بىراق وتە ماعىنالى بەس تالاپ جاتىر: بىلىمدىلىك، ەڭبەكقورلىق، ادالدىق، جاۋاپكەرشىلىك جانە كاسىپقويلىق»، - دەپ اتاپ ءوتتى ايدا بالاەۆا قۇتتىقتاۋ سوزىندە.

ءمينيستردىڭ ايتۋىنشا، بۇل سىيلىق جۇزدەگەن قازاقستاندىق دارىندى جاستاردىڭ ومىرىنە جاڭا باستاما بەردى. ولاردىڭ قاتارىندا مادەنيەت قايراتكەرلەرى ديماش قۇدايبەرگەن، «مۋز ارت» توبى، سپورتشىلار ولگا شيشيگينا، دەنيس تەن، دينارا سادۋاقاسوۆا، جاس عىلىمدار ماكسيم زدوروۆەتس، ماقسات جاباگين، جۋرناليستەر ماقپال جۇماباي، يرينا تەن سىندى دارىندى تۇلعالار بار.

«بۇل قاسيەتتەردىڭ بارلىعى «دارىن» سىيلىعىنىڭ يەگەرلەرىنە ءتان قاسيەتتەر عانا ەمەس، ءوسىپ كەلە جاتقان جاستارعا ۇلكەن ونەگە. ءبىر عانا ديماش قۇدايبەرگەننىڭ مىسالىندا وتانىمىزدى، ونىڭ مادەنيەتى مەن ءتىلىن تورتكۇل دۇنيەگە پاش ەتىپ جۇرگەن ونەرپازدى عانا ەمەس، ىشكى پاراساتى زور، ادامي ءتالىمى ۇلگى، جانى مەيىربان ازاماتتى كورەمىز. ءسوز جوق، بۇل جاستارعا دۇرىس باعىت كورسەتەتىن ونەگەلى جول.

سودان بولار – بيىل «دارىن» سىيلىعىنا تاپسىرىس بەرگەن جاستاردىڭ سانى وتكەن جىلعا قاراعاندا 50% پايىزعا كوپ. قازىلار القاسىنا وڭاي تيگەن جوق. قىزۋ تالقىلاۋلار مەن پىكىرتالاستار بولدى. كىل جۇيرىكتىڭ ىشىنەن تاڭداۋ جاساۋ قاشاندا قيىن، ويتكەنى بارلىق ۇمىتكەرلەر اتالعان سىيلىققا لايىقتى»، - دەدى ايدا بالاەۆا.

مينيستر جاستاردىڭ جارقىن وكىلدەرى كەلەر ۇرپاققا ۇلگى بولا وتىرىپ، ادال ەڭبەك ارقىلى سالاۋاتتى ءومىر سالتىن ناسيحاتتاۋعا، قوعامدىق مادەنيەتتى ساقتاۋعا، ءوزىن-ءوزى دامىتۋ مەن ورتادا جاعىمدى، وڭ كوزقاراس قالىپتاستىرۋعا ۇيىتقى بولۋى ءتيىس دەپ سانايدى.

«سوڭعى جىلدارى قولعا الىنعان پرەزيدەنتتىڭ اۋقىمدى رەفورمالارى، باستامالارى مەن باعدارلامالارى بولاشاق ۇرپاق ءۇشىن قۋاتتى ىرگەتاس سانالادى.  بۇل ىستەر ەرتەڭگى قوعام كەدەرگىلەرگە تاپ بولماۋى ءۇشىن جانە جاھاندىق ميسسيالارعا نازار اۋدارماۋى ءۇشىن قاجەت. مەملەكەت جاستاردىڭ دامۋى ءۇشىن بارلىق جاعدايدى جاسايدى، ال پرەزيدەنت ءاردايىم قولداي وتىرىپ ءوزىن - ءوزى جەتىلدىرۋگە شاقىرادى»، - دەپ اتاپ ءوتتى مينيستر

مينيستر «دارىن» مەملەكەتتىك جاستار سىيلىعىنىڭ 19 لاۋرەاتىنا ديپلوم، توسبەلگى جانە اقشالاي سىيلىقتار تابىس ەتتى.

بيىل مەملەكەتتىك ورگاندار مەن قوعامدىق بىرلەستىكتەر 340-تان اسا كانديداتۋرا ۇسىندى.

ونىڭ ىشىندە «عىلىم» بويىنشا - 110, «ديزاين جانە بەينەلەۋ ونەرى» - 21, «سپورت» - 27, «تەاتر جانە كينو» - 49, «ەسترادا» - 12, «جۋرناليستيكا» - 10, «حالىق شىعارماشىلىعى» - 28, «شىعارماشىلىق باستامالار» - 32, «ادەبيەت» - 28, «كلاسسيكالىق مۋزىكا» - 30 ءوتىنىم بار.

Abai.kz