تاريحتان بەلگىلىسى – 25 جەلتوقساندا ساعات 19:00 تاياۋ ءامىرى قازاققا عانا جۇرگەن ميحايل گورباچەۆ «كسرو پرەزيدەنتىنىڭ كسرو قارۋلى كۇشتەرى جوعارعى باس قولباسشىسىنىڭ وكىلەتتىگىن توقتاتۋى جانە كسرو پرەزيدەنتىنىڭ جانىنداعى قورعانىس كەڭەسىن تاراتۋ تۋرالى» جارلىققا قول قويدى. ودان كەيىن ورتالىق تەلەارنانىڭ تىكەلەي ەفيرىنەن:

«تاۋەلسىز مەملەكەتتەر دوستاستىعىنىڭ قۇرىلۋىنا بايلانىستى قالىپتاسقان جاعدايعا بايلانىستى مەن كسرو پرەزيدەنتى لاۋازىمىنداعى قىزمەتىمدى توقتاتامىن. بۇل شەشىمدى ءپرينتسيپتى تۇردە قابىلدايمىن... مەن سەنىممەن، دانالىقپەن جانە رۋحتىڭ كۇشىمەن ءوز ورنىمنان كەتەمىن. ءبىز ۇلى وركەنيەتتىڭ مۇراگەرلەرىمىز جانە قازىر ونىڭ جاڭا زاماناۋي ءھام لايىقتى ومىرگە قايتا ورالۋى ارقايسىسىنا بايلانىستى»، - دەگەن بولاتىن.

سونىمەن، ماسكەۋ ۋاقتىمەن 19 ساعات 35 مينۋتتا كسرو جالاۋى ءتۇسىرىلىپ، ءوزىنىڭ ساياسي ءومىر ءسۇرۋىن توقتاتتى.

 «سول كۇنى كەشكە ەكى تۋ ءتۇسىرىلدى. ءبىرىنشىسى كرەملدىڭ ءبىرىنشى كورپۋسىنىڭ ۇستىندەگى – كسرو-نىڭ جانە  رسفسر پرەزيدەنتتەرىنىڭ رەزيدەنتسياسىنىڭ ۇستىندەگى بايراقتار. فوتوگرافتار ءدال وسىنى ءتۇسىرىپ الدى. ال ەكىنشىسى - مينيسترلەر كەڭەسى عيماراتىنىڭ ۇستىندە بولدى. بۇل 14-ءشى كورپۋس، ول ەندى جوق»، -دەيدى رف مەملەكەتتىك تاريح مۇراجايىنىڭ ديرەكتورى الەكسەي لەۆىكين.

وسى فوتوعا تۇسىرىلگەننەن كەيىن ۆلاسوۆشىلار جالاۋى ماسكەۋ كوكىگىندە كسرو جالاۋىن الماستىرىپ جەلبىرەدى.

ميحايل گورباچەۆ تەلەۇندەۋىنەن كەيىن «اتوم شامادانىنىڭ» قۇپيا كىلتىن سول كەزدەگى رەسەي فەدەراتسياسى پرەزيدەنتى بوريس ەلتسينگە تابىستاماق بولعانىمەن ول گورباچەۆتىڭ سوزىنە كوڭىلى تولماي، كرەملدە ەمەس، باسقا بەيتاراپ جەردە تابىستا دەپ كەرگىپ، كەزدەسۋدەن باسىن الىپ قاشقان سوڭ، قىزىل يمپەريانىڭ العاشقى جانە سوڭعى پريزيدەنتى امالسىزدان ءوز قاسىنان ءبىر ەلى قالمايتىن قوس پولكوۆنيكتى شامادانىمەن كسرو قورعانىس ءمينيسترى ەۆگەني شاپوشنيكوۆكە تابىس ەتتى.

سوڭعى قىزىل پاتشا قاسىنداعى جانىنا جاقىن بەس ادامىمەن بىرگە كرەملدەگى سوڭعى كەشكى اسىن ءىشىپ، ونى ماڭگىە تاستاپ شىقتى.

«1991 جىلعى 25 جەلتوقساندا كەڭەس وداعى سياقتى مەملەكەتتىڭ تاريحىنا نۇكتە قويىلدى. قوعام، وكىنىشكە قاراي، سول كەزدە كەزەكتى قايتا اتاۋدى وزگەرتۋ بولادى دەپ ويلاعانى دا جاسىرىن ەمەس.  كرەملدىڭ ۇستىنەن كەڭەستىك تۋ ءتۇسىرىلدى، كسرو-نىڭ ىدىراۋىنىڭ تاريحى ورلمايتىن مەزەت بولدى»، - تاريحشى الەكساندر شۋبين.

ەكى كۇننەن كەيىن «پراۆدا» گازەتى: «كسرو جوعارعى كەڭەسى رەسپۋبليكالارىنىڭ كەڭەسى تاۋەلسىز مەملەكەتتەر دوستاستىعىنىڭ قۇرىلۋىنا بايلانىستى دەكلاراتسيا قابىلدادى، وندا كسر وداعى مەملەكەت جانە حالىقارالىق قۇقىق سۋبەكتىسى رەتىندە ءوزىنىڭ جۇمىس ىستەۋىن توقتاتادى دەپ تۇيىندەلگەن»،- دەپ جازدى.

Abai.kz