كەشە ەلىشىلىك باق-تا الماتى قالاسىنىڭ پروكۋراتۋراسى قازاق ۇلتتىق اگرارلىق زەرتتەۋ ۋنيۆەرسيتەتىن تەكسەرۋ قورىتىندىسى بويىنشا جالعان تۇقىم سەبۋ جانە ەگىس القاپتارىن وڭدەۋ ارقىلى بيۋدجەت قاراجاتىن ۇرلاۋ فاكتىلەرىن انىقتاعانى جاريا بولدى.

«كەلتىرىلگەن شىعىن 43,8 ملن تەڭگەنى قۇرايدى، تەرگەۋدى الماتى قالاسى پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسى جۇرگىزۋدە»، - دەلىنگەن اقپاراتتا.

بۇگىن رەداكتسيامىزعا قازاق ۇلتتىق اگرارلىق زەرتتەۋ ۋنيۆەرسيتەتى اتالعان اقپاراتقا قاتىستى ءوز تۇسىنىكتىمەسىن جولدادى. ءبىز اتالعان تۇسىنىكتىمەنى وقىرمان تالقىسىنا ۇسىنعاندى ءجون سانادىق.

الماتى قالاسى پروكۋراتۋراسىنىڭ قازۇازۋ-دا بيۋدجەت قاراجاتىن جىمقىرۋ تۋرالى اقپاراتىنا وراي «قازاق ۇلتتىق اگرارلىق زەرتتەۋ ۋنيۆەرسيتەتى» كەاق ءباسپاسوز قىزمەتى تومەندەگىنى حابارلايدى:

ۋنيۆەرسيتەتتە 2020 جىل ىشىندە مەملەكەتتىك ساتىپ الۋدى جۇزەگە اسىرۋ اياسىندا بيۋدجەت قاراجاتىن جىمقىرۋ فاكتىلەرى جاسالعان.

2020 جىلى ۋنيۆەرسيتەت پەن «Ai-Tall» جشس اراسىندا (5,8 ملن. تەڭگە سوماسىنا «امياك سەليتراسىن» ساتىپ الۋ بويىنشا), «كەمالحانسترويەليت» جشس-مەن (15,8 ملن. تەڭگە سوماسىنا «امموفوس» ساتىپ الۋ جانە جەتكىزۋ بويىنشا) جانە «قازترايدسناب» جشس-مەن (22 ملن. تەڭگە سوماسىنا «قانت جۇگەرىسى» تۇقىمىن ساتىپ الۋ جانە جەتكىزۋ بويىنشا) كەلىسىمشارت جاسالعان.

جوعارىدا كورسەتىلگەن شارتتار بويىنشا تۇقىم سەبۋ جانە سەبۋ ورىندارىن وڭدەۋدى راستاۋ اكتىسىن جالعان جاساۋ فاكتىلەرى انىقتالدى.

«دارميراۋديت» جشس جۇرگىزگەن قورىتىندىعا سايكەس ۋنيۆەرسيتەت مەملەكەتكە 43,8 ملن. تەڭگە كولەمىندە زالال كەلتىردى.

سونىمەن قاتار، ۋنيۆەرسيتەتتە تابىس تابۋ ماقساتىندا جەكە كاسىپكەرلەرگە جالعا بەرىلەتىن بىرقاتار تۇرعىن ەمەس كوممەرتسيالىق ءۇي-جايلار (دۇكەندەر، اسحانالار جانە ت.ب.) بار.

ماسەلەن، 2012-2022 جىلدار ارالىعىندا «دانا» جك كوممەرتسيالىق ءۇي-جايلاردى (دۇكەن ءۇشىن) تۇراقتى تۇردە جالعا العان، بۇل رەتتە اي سايىنعى جالداۋ اقىسى ۋنيۆەرسيتەتتىڭ بۇرىنعى قىزمەتكەرىنە قولما-قول اقشامەن جانە ءموبيلدى اۋدارىمدارمەن بەرىلىپ وتىرعان، الايدا ول ۋنيۆەرسيتەتتىڭ ەسەپ شوتىنا تۇسپەگەن.

بۇل فاكتىلەر قر قك 190-بابى 3-بولىگى 1-تارماعى جانە قر قك 189-بابى 4-بولىگى 2-تارماعىندا كوزدەلگەن قىلمىستىق قۇقىق بۇزۋشىلىق جاساۋ فاكتىسى بويىنشا سدتبر-ىندە تىركەلگەن.

ۋنيۆەرسيتەتتىڭ جاڭا باسشىلىعى 2023 جىلدان باستاپ زاڭسىز شىعارىلعان اكتيۆتەردى، ونىڭ ىشىندە جوو جاتاقحانالارى مەن وقۋ اۋديتوريالارىن قايتارۋ بويىنشا بارلىق قاجەتتى شارالاردى قابىلدادى، بۇل تۋرالى ءتيىستى اقپارات باق-تاردا بىرنەشە رەت جاريالاندى.

قازۇازۋ باسشىلىعى ۋنيۆەرسيتەت قىزمەتىن قر زاڭناماسىنىڭ تالاپتارىنا سايكەس قالپىنا كەلتىرۋ بويىنشا بارلىق شارالاردى ودان ءارى جۇرگىزەتىن بولادى.

Abai.kz