ەلىمىزدە جاڭا قالا پايدا بولدى. پرەزيدەنت توقاەۆتىڭ جارلىعىندا: «الماتى وبلىسىنىڭ ىلە اۋدانى ودان جەتىگەن اۋىلىن ءبولۋ جولىمەن قايتا ۇيىمداستىرىلسىن. الماتى وبلىسى ىلە اۋدانىنىڭ جەتىگەن اۋىلى وبلىستىق ماڭىزى بار قالا ساناتىنا جاتقىزىلسىن جانە ونىڭ اتاۋى الاتاۋ قالاسى بولىپ وزگەرتىلسىن»، - دەلىنگەن.

جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.

قالانىڭ اۋدانى - 88 مىڭ گەكتار. وندا بۇگىندە 52,7 مىڭ ادام تۇرادى.

قازاقستان رەسپۋبليكاسىنىڭ پرەزيدەنتى جانىنداعى ورتالىق كوممۋنيكاتسيالار قىزمەتىنىڭ حابارلاۋىنشا، جاڭا قالانى قۇرۋ جول جەلىلەرى، ينجەنەرلىك، الەۋمەتتىك ينفراقۇرىلىم وبەكتىلەرىن مودەرنيزاتسيالاۋعا، جاڭا جۇمىس ورىندارىن اشۋعا، ينۆەستيتسيالاردى، تەحنولوگيالاردى، قوسىمشا قارجى اعىندارىن تارتۋعا، كاسىپكەرلىك بەلسەندىلىكتى دامىتۋعا، سالىق تۇسىمدەرىن ۇلعايتۋعا مۇمكىندىك بەرەدى. بۇل ءوز كەزەگىندە ءوڭىردىڭ ينۆەستيتسيالىق تارتىمدىلىعى مەن ەكونوميكالىق تۇراقتىلىعىن جاقسارتۋعا ىقپال ەتەدى.

سونىمەن قاتار، ۇكىمەت اەا (ارنايى ەكونوميكالىق ايماق) اۋماعىن 30 مىڭ گەكتاردان 96,5 مىڭ گەكتارعا دەيىن كەڭەيتۋ مەن G4 City اەا-نى Alatau اەا-عا قايتا اتاۋ تۋرالى شەشىمدى ماقۇلدادى. وسىلايشا، الاتاۋ قالاسىنىڭ بارلىق اۋماعى جانە قوناەۆ قالاسىنىڭ ءبىر بولىگى اەا اۋماعىنا جاتقىزىلادى.

سۋ جاڭا قالا ارقايسىسىنىڭ وزىندىك دامۋ باعىتى بار ءتورت اۋدانعا بولىنبەك: ينۆەستيتسيالىق ايماق – گەيت سيتي، اۋىل شارۋاشىلىعى ايماعى – گولدەن اۋدانى، جاڭا كاسىپورىندارى بار – گروۆەن اۋدانى، تۋريستىك ايماق – گرين سيتي بولماق. الاتاۋ قالاسى باس جوسپارىنىڭ ارحيتەكتورى سەرسەمبەك ءجۇنىسوۆتىڭ ايتۋىنشا، جاڭا قالا بولاشاقتا ەكونوميكالىق ايماققا اينالادى.

Abai.kz