ءبىزدىڭ بايقاۋىمىزشا، كەيىنگى كەزدەرى رەسەيدىڭ شوۆينيستەرى تىنىش جاتقان حالقىمىزدىڭ نامىسىنا ءتيىپ، ءزارلى ءتىلىن سۇعىپ الۋ جونىندەگى الاپات ءبىر جارىستى باستاپ كەتكەن سىڭايلى.

بۇرىن مۇنداي ارانداتۋشىلار قاڭسىقتارىن ءوز ەلىنىڭ تورىندە وتىرىپ، اياۋسىز توگەتىن. ەندى قازىر ولاردىڭ ابدەن ەركىنسىگەندىكتەرى سونشالىق، سول اۋرۋلارىن ەلىمىزگە كەلىپ تە تاراتا باستاپتى. مۇنى جاقىندا عانا قوستاناي قالاسىندا "مەديا فۋتبول" ليگاسى شەڭبەرىندە وتكەن رەسەي مەن قازاقستان فۋتبول ماتچى كەزىندە بولعان وقىس وقيعادان ايقىن بايقاۋعا بولادى.

اتالمىش جارىس كەزىندە رەسەي فۋتبول كومانداسىنىڭ باپكەرى دميتري كۋزنەتسوۆ دەگەنگە ءبىر قازاق تورەشىسى ۇناماي قالسا كەرەك، ءدۇيىم جۇرتتىڭ كوزىنشە ونى  "چۋكچاعا" تەڭەپ، جامان سوزبەن سىلەيتىپ تۇرىپ، ءبىر بوقتادى. ءسىرا، بۇل نادان "چۋكچا" دەگەن ەر ادام ەكەندىگىن مۇلدەم تۇسىنبەسە كەرەك. جالپى، ورىس شوۆينيستەرى ونداي-مۇنداي ۇساق-تۇيەككە ونشا كوڭىل بولە بەرمەيدى عوي. ۇلى حالىق ەمەس پە؟

ءبىر عاجابى، قاسىندا تۇرعان رەسەيلىكتەرگە بۇل قالىپتى جاعداي كورىنسە كەرەك، ەشقايسىسى دا: "قوي، مۇنىڭ ارتىق. ءوزىمىز كەلگەن ەلگە ءتىل تيگىزبەيىك", - دەگەن بىردە-بىرەۋى جوق. مۇنىڭ ءوزى شوۆينيزم اۋرى رەسەي فۋتبولىن دا تولىق جاۋلاپ العاندىعىن كورسەتەدى. ەندەشە، شوۆينيزم سىرقاتى مەڭدەگەن مۇنداي فۋتبولشىلاردى كەلەشەكتە ەلگە كەلتىرۋدىڭ قانداي رەتى بار؟

بۇل ماسەلەنىڭ باسى عانا. ەرەكشە جانعا باتاتىندىعى، بۇل كۋزنەتسوۆ دەگەن جىرىندىنىڭ ءبىزدىڭ ەلگە بوتەن ەمەستىگىندە. ول سوناۋ 2018-2019 جىلدارى پاۆلوداردىڭ "ەرتىس" فۋتبول كلۋبى باپكەرىنىڭ كومەكشىلىگىنە شاقىرىلىپ، اسا جايلى جاعداي جاساعانبىز. بۇل كەلىمسەك بۇرىن ءاپ-ادەمى ويناپ كەلگەن كلۋبتى ءبىرجولاتا تۇرالاتىپ كەتتى. كەزىندە رەسپۋبليكا دەڭگەيىندە 4-ءشى ورىن الىپ كەلگەن كوماندا، از عانا ۋاقىت ىشىندە 10-شى ورىنعا ءبىر-اق ءتۇستى. كۋزنەتسوۆتىڭ نەسى كەتتى؟! "ماڭعىت، اۋزىڭا ساڭعىت" دەپ، رەسەيىنە تايىپ تۇردى. ەندى مىنە، ىشىندەگى ءزارىن تالاي جۇرتتىڭ الدىندا قاساقانا شاشىپ تۇرعاندىعى. "سەندەر ماعان نە ىستەي الاسىڭدار؟" دەپ، تورىمىزدە تەپسىنىپ وتىر. ءيا، نە ىستەي الامىز؟ ادەتتەگىدەي ۇندەمەي قۇتىلامىز داعى.

بۇلاي دەۋىمنىڭ وزىندىك سەبەبى دە جوق ەمەس. مىنا جايعا قاراڭىز. مۇنداي ماسقارا وقيعا قوستاناي قالاسىندا ورىن الدى. ونى ەلىمىزدىڭ بىرقاتار پورتالدارى جازدى. كەيبىرەۋلەرى ەلىمىزدىڭ سىرتقى ىستەر مينيسترلىگىنەن بۇل كۋزنەتسوۆ دەگەندى ەندىگارى ەلگە كىرگىزبەۋدى تالاپ ەتتى.

ال ەندى وزىمىزدەگى وڭىرلىك ءباسپاسوز بۇل تۋرالى ەشبىر جاق اشقان جوق. ولاردىڭ دەنى ورىس ءتىلدى ءباسپاسوز ەكەندىگىن ەسكەرسەك، مۇنى ىشتەي كۋزنەتسوۆقا تىلەكتەستىك دەمەسكە لاجىمىز جوق. ءبىر قىزىعى، مۇنداي ۇستانىمداعى باسپاسوزگە وبلىستىق بيۋدجەتتەن ونداعان ەمەس، جۇزدەگەن ميلليون تەڭگە ءبولىنىپ، ولاردى ىلعي دا جارىلقاپ ءجۇر. سويتە بۇلاردى باقىلايدى دەيتىن وسىنداعى قوعامدىق دامۋ باسقارماسى دەگەن ايدىك: "بۇلارىڭ قالاي؟ سەندەر ءوزى قاي ەلدە وتىرسىڭدار؟" دەپ، ءبىر قاباق تۇيۋگە دە جاراماي وتىر. ال ءوزى باسقاراتىن وبلىستا مۇنداي وقىس وقيعا بولعاندىعىنان وسى ءوڭىردىڭ باسشىسى قۇمار اقساقالوۆ مۇلدەم حابارسىز سەكىلدى.

مىنەكەي، وسىنداي ء"اي دەيتىن اجە، قوي دەيتىن قوجا" بولماعان جەردە كىم بولسا سول اۋزىنا كەلگەندى سويلەمەي قايتسىن؟ ەندى بۇعان كىمدى كىنالايمىز؟

جايبەرگەن بولاتوۆ

Abai.kz