«Bloomberg» باسىلىمى: «قازاقستان مەن تۇركيا ەۋروپانىڭ كەيبىر ەلدەرىنە رەسەيمەن ساۋدا جۇرگىزۋگە كومەكتەسىپ وتىر»، - دەپ ماقالا جاريالادى.

وندا: «قازاقستان مەن تۇركيا جەكەلەگەن ەۋروپالىق كاسىپورىندارعا رەسەيمەن ساۋدا جاساۋعا كومەكتەسۋدە. ءتىپتى ستاتيستيكا دا ۋكرايناداعى سوعىس باستالعاننان كەيىنگى ساۋدا كولەمىنىڭ ارتقانىن راستايدى»، - دەپ جازىلعان.

باسىلىمنىڭ جازۋىنشا، سوڭعى ەكى جىلدا ەۋروپالىق ەكسپورت رەسەيگە توقتاعان جوق. ەندى تاۋارلار رەسەي فەدەراتسياسىنا قازاقستان ارقىلى تۇسۋدە.

«بۇل ورتالىق ازيا ەلى ۆلاديمير پۋتين ۋكرايناعا باسىپ كىرۋگە بۇيرىق بەرگەن ساتتەن باستاپ ساۋدا اعىنىن وزگەرتۋگە كومەكتەستى»، - دەپ اتاپ كورسەتەدى «Bloomberg».

ەكونوميستەر الەكس يساكوۆ پەن دجەرارد ديپيپپو ەۋروپا مەن رەسەي اراسىنداعى ساۋدا بايلانىستارىنىڭ نىعايا تۇسكەنىن جانە ءپۋتيننىڭ ەكونوميكاسىنا سانكتسيالاردىڭ ىقپالى ويلاعاننان از ەكەنىن راستايدى.

«Bloomberg» زەرتتەۋشىلەرىنىڭ ايتۋىنشا، 2023 جىلى قازاقستاننان رەسەيگە جەتكىزىلەتىن تاۋارلاردىڭ تەك جەتى پايىزى عانا تىيىم سالىنعان تاۋارلارمەن بايلانىستى. ەڭ كوپ ءوسىم كورسەتكەن ونىمدەر اراسىندا قۇرال-سايماندار مەن اۆتوموبيلدەر بولعان. ەو سانكتسيالارى ۇشاقتارعا، اتىس قارۋىنا جانە كەيبىر جارتىلاي وتكىزگىشتەرگە قولدانىلادى. رەسەي اسكەري وندىرىسكە قاجەتتى تاۋارلاردى ىزدەۋ ءۇشىن جالعان كومپانيالاردى بەلسەندى پايدالانادى. باستاپقىدا بۇل ەۋروپالىق شەنەۋنىكتەر اراسىندا الاڭداۋشىلىق تۋدىردى.

«Bloomberg» ەكونوميستەرى تۇركيامەن قاتار تاۋارلاردى رەسەيگە اۋىستىرىپ تيەۋ دەپ اتالاتىن ىقتيمال ورتالىقتاردىڭ ءبىرى بولىپ تابىلاتىن - قازاقستانعا نازار اۋدارادى.

«قازاقستانعا كەلەر بولساق، ەكسپورتتىڭ باسىم بولىگى تىيىم سالىنعان تاۋارلاردى ساۋدالاۋدان ەمەس، تۇرمىستىق تاۋارلاردى تاسىمالداۋدان تۋىنداۋى مۇمكىن ەكەنىن كورىپ وتىرمىز»، - دەدى ولار.

قورىتىندىلاي كەلە، «Bloomberg» ساراپشىلارى سانكتسيالار كۇتپەگەن سالدارعا اكەلدى دەپ سانايدى جانە ەو-نىڭ بۇل ماسەلەگە قازىرگى كوزقاراسى يدەالدان الىس.

يساكوۆ پەن ديپيپپونىڭ پىكىرىنشە، سانكتسيالاردىڭ تيىمدىلىگىن نەعۇرلىم قاتاڭ شارالار ارقىلى، سونىڭ ىشىندە كەلىسىمشارتتار ءۇشىن «رەسەيگە كەرى ەكسپورتتاۋعا تىيىم سالۋ تۋرالى ەسكەرتپە» دەپ اتالاتىن جاڭا باستاما ارقىلى كۇشەيتۋگە بولادى.

ارينە، ەۋروپا سانكتسيالاردى تيىمدىرەك ەتۋ ءۇشىن قوسىمشا كۇش-جىگەر جۇمساۋى كەرەك. «Bloomberg» سانكتسيالاردىڭ ەو جاعدايىندا كۇتىلەتىن ناتيجە بەرمەۋىنىڭ نەگىزگى سەبەبى رەتىندە ايقىن ەكونوميكالىق مۇددەلەردى كورسەتەدى.

«وتە باي ادامدار مەن وتە ءىرى كاسىپورىندار بار، ولار سانكتسيالاردىڭ جۇمىس ىستەۋىنە مۇددەلى ەمەس جانە ۇكىمەتتەر، وكىنىشكە قاراي، ولارعا قۇلاق اسادى», - دەيدى باسىلىم.

Abai.kz