اسا قامقور، ەرەكشە مەيىرىمدى اللانىڭ اتىمەن باستايمىن!

قۇرمەتتى مۇسىلمان باۋىرلار، وتانداستار!

بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرلەر بولسىن. سىزدەردى بەرەكەلى رامازان ايىنىڭ كەلۋىمەن قۇتتىقتايمىن!

رامازان – ون ەكى ايدىڭ سۇلتانى، بەرەكەلى دە كەشىرىمى مول اي. كۇندەلىكتى تىرشىلىك قامىمەن جۇرەتىن پەندەنىڭ جۇرەگىنە بۇل ايدا يمان نۇرى قۇيىلادى. ويتكەنى ورازا ادامدى تاقۋالىققا تاربيەلەيدى. سابىرلىق، قايىرىمدىلىق، مەيىرىمدىلىك، باۋىرمالدىق سەكىلدى ادامدىق اسىل قاسيەتتەر ارتىپ، يمان كۇشەيەدى. رامازان – اللانىڭ مەيىرىمى توگىلىپ، جۇماقتىڭ ەسىگى ايقارا اشىلاتىن، يماندى كۇشەيتۋگە مۇمكىندىك بەرىلگەن قاسيەتتى اي. بۇل – جاراتۋشى يەمىزدىڭ ۇلى سىيى ءارى نىعمەتى. رامازاننىڭ قادىرىن جاقسى تۇسىنگەن ساحابالار ورازاعا التى اي قالعان ساتتەن باستاپ: «راببىمىز، ءبىزدى رامازان ايىنا امان-ەسەن جەتكىزە گور!» – دەپ دۇعا ەتكەن.

ساۋاپتار ەسەلەنىپ جازىلاتىن ايدا جاسالعان قايىرلى ءىستىڭ قايتارىمى ادام بالاسى ءۇشىن قۇپيا-سىر. ءتىپتى اۋىز بەكىتكەن ادامعا بەرىلەتىن سىي مەن ساۋاپ، قۇرمەت پەن ماراپات پايعامبارلار مەن پەرىشتەلەرگە دە بەيمالىم. قۇدسي حاديستە اللا تاعالا: «ورازا – تەك مەن ءۇشىن. ونىڭ سىيىن (ساۋابىن) ءوزىم عانا بەرەمىن...» – دەپ، ورازانىڭ قادىرى مەن قاسيەتىن، ءمانى مەن ماڭىزىن بايانداعان.

دەمەك شاراپاتى مەن شاپاعاتى مول ايدا ساۋاپ جيناۋعا، ىشكى دۇنيەمىزدى تازارتۋعا، جاراتۋشىنىڭ رازىلىعىن الۋعا اسىققان ابزال. پەندەنىڭ وسى ايدا ۇستاعان ورازاسى، اللاعا ۇنامدى بارلىق قۇلشىلىقتارى، وزگەلەرگە جاساعان قايىرىمدىلىعى، ساۋاپتى امالدارى ەسەلەنىپ جازىلادى.

ورازا – كۇندىز تەك ءىشىپ-جەۋدەن ءوزىن شەكتەۋ دەگەن ءسوز ەمەس. ورازا – رۋحتىڭ ازىعى، ءتاننىڭ شيپاسى. رامازان جان مەن ءتاندى رۋحاني تازارتاتىن، مۇسىلمان ءۇشىن ۇلكەن سابىر مەكتەبى. اۋزى بەرىك جاندار وزىنە دورەكىلىك كورسەتكەن كەيبىر كىسىلەرگە: «مەن ورازامىن»، – دەگەن ءبىر اۋىز سوزبەن كوركەم مىنەزدىڭ كەرەمەت ۇلگىسىن كورسەتەدى. ناپسىسىنە توقتاۋ سالىپ، سابىر ساقتايدى. ال سابىر يەسىنە بەرىلەتىن سىي – ءجاننات.

دەنساۋلىعىنا بايلانىستى نەمەسە كارىلىك جەتىپ ورازا ۇستاۋعا شاماسى جەتپەگەن ادامدار اۋىز بەكىتكەن كىسىلەرگە اۋىزاشار بەرسە، ول دا – ۇلكەن ساۋاپ.

پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «اللا تاعالا ەڭ بولماسا ءبىر ءتۇيىر قۇرما، ءتىپتى ءبىر ۇرتتام سۋمەن بولسا دا قامقورلىق جاساعانعا ساۋاپ جازادى…» – دەگەن.

مەن وسى رەتتە بارشا وتانداستارىمدى قاسيەتتى ايدا جۇزەگە اساتىن قايىرىمدىلىق ءىس-شارالارعا ۇلەس قوسۋعا شاقىرامىن. كاسىپكەرلەردى الەۋمەتتىك ماڭىزى بار ازىق-تۇلىكتەردىڭ باعاسىنا جەڭىلدىك جاساۋعا ۇندەيمىن.

قوعامدىق تاماقتانۋ ورىندارىندا اۋىزاشار ءمازىرىن حالىققا ىڭعايلى باعامەن ۇسىنۋ دا – ساۋاپتى ءىستىڭ ءبىرى. دۇكەندەردە كۇللى جاماندىقتىڭ باستاۋى بولعان اراق-شاراپ ساتىلماسا دەگەن تىلەگىمىزدى جەتكىزەمىز. سونىمەن قاتار بارشا حالىقتىڭ ورتاق يگىلىگى ءۇشىن سالىنىپ جاتقان جول، كوپىر، مەكتەپ، مەشىت، مەدرەسە، بالاباقشا، سپورت كەشەنى سىندى ماڭىزدى عيماراتتارعا از دا بولسا ۇلەس قوسىپ، بەلسەندىلىك تانىتۋعا شاقىرامىن.

راقىم ايى – رامازان قۇتتى بولسىن! قاسيەتتى ايدا ۇستاعان ورازامىز، جاساعان دۇعا-تىلەكتەرىمىز، قۇلشىلىق-عيباداتتارىمىز، ءاربىر قايىرلى امالدارىمىز قابىل بولعاي! اللا تاعالا وتباسىمىزعا اماندىق، جۇمىسىمىزعا بەرەكە ءناسىپ ەتكەي! تاۋەلسىزدىگىمىز تۇعىرلى، مەملەكەتىمىزدىڭ مەرەيى ارقاشان ۇستەم بولعاي! ءامين!

ناۋرىزباي قاجى تاعانۇلى,

قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي

Abai.kz