ءيا، ۇلتتىق قۇرىلتايدان جۇرتتىڭ كۇتكەنى كوپ. اركىم ءوزىنىڭ كوكەيىندە جۇرگەن، جانىن قيناعان سۇراقتاردىڭ جاۋابىن العىسى كەلەدى. سول قاتاردا مەن قانداستارىمىزدى سەرگەلدەڭگە سالىپ وتىرعان «20-باپتىڭ 5) تارماعى» مەن «اپوستيل ماسەلەسى» تۋرالى ءبىر شەشىم ايتىلىپ قالا ما دەپ، قاتتى كۇتتىم.

بىراق، بۇل تاقىرىپ تۋرالى ازىرىنشە ەشتەمە ايتىلمادى.

مۇمكىن، پرەزيدەنت بۇل ماسەلەنى باسقا جولمەن شەشەر.

جاسىراتى جوق، قاتتى كۇيزەلدىم. ازاماتتىق الا الماي، سەرگەلدەڭگە ءتۇسىپ وتىرعان قانداستارىما جانىم اشىدى.

«قازاقستان – ءبارىمىزدىڭ قاسيەتتى قارا شاڭىراعىمىز. سوندىقتان ءاربىر ازامات ەل تاعدىرىنا ءوز تاعدىرىنداي قاراۋعا ءتيىس»، - دەپتى قاسىم-جومارت كەمەلۇلى.

بىرەۋلەرگە ۇناماۋىمىز مۇمكىن، بىراق ءبىز دە ءوزىمىزدى وسى قارا شاڭىراعىمىزدىدىڭ ءبىر ۋىعى بولعان قانداستار تاعدىرىنا ءوز تاعدىرىنداي قاراپ جۇرگەن جانبىز دەپ ەسەپتەيمىز.

ءوز باسىم پرەزيدەنتتىڭ ءار ءسوزىن قالدىرماي، مۇقيات وقىپ جۇرەمىن.

«قۇرىلتاي – ەشقاشان توي تويلاپ، اڭگىمە-دۇكەن قۇراتىن جيىن بولعان ەمەس»، - دەپتى پرەزيدەنتىمىز ۇلتتىق قۇرىلتايدىڭ ءۇشىنشى وتىرىسىندا سويلەگەن سوزىندە.

وسى سوزدەن كەيىن پرەزيدەنتتىڭ ءسوزىن ءتىپتى دە شۇقشيىپ وقىپ، قانداي ماسەلەلەرگە باسا نازار اۋدارعانىنا ۇڭىلە باستادىق. جانە مەملەكەت باسشىسىنىڭ دەن قويعان ماسەلەلەرىن تەرىپ الدىم.

قاسىم-جومارت كەمەلۇلى بۇل جولى دا ۇلتتىڭ جاڭا ساپاسىن قالىپتاستىرۋ ماسەلەسىنە ايىرىقشا توقتالىپتى.

قۇقىق قورعاۋ ورگاندارى قىزمەتكەرلەرىنىڭ مادەنيەتسىزدىگى مەن ساۋاتسىزدىعىن ايتپادى دەمەسەڭىز، پرەزيدەنت ءوز سوزىندە «شىڭعىسحان داۋىنان» باستاپ، «ناسىباي اتۋعا»، «جول ۇستىندەگى دورەكىلىككە» دەيىن تۇك قالدىرماي ءتىزىپ شىققان ەكەن.

ءبىر قاراعاندا، پرەزيدەنت تىم «ۇساقتاپ» كەتكەندەي سەزىلۋى مۇمكىن.

بىراق، ءبىزدىڭ ۇلتىمىزدىڭ قازىرگى جاعدايى – وسى ەكەنى، ءالى كۇنگە دەيىن الاش كوسەمدەرى مەن كەڭەس قايراتكەرلەرىن سالىستىرۋدان; اتا-باباسىنىڭ، جەرلەسىنىڭ ەسىمىن ۇلىقتاۋدى سۇراپ، ۇجىمدىق حات جازۋدان اسا الماي كەلە جاتقانىمىز وتىرىك ەمەس قوي!

پرەزيدەنتتىڭ بۇل سوزدەرى، ءتىپتى، سوناۋ اباي زامانىن ەسكە تۇسىرگەنىن جاسىرمايمىن.

دەمەك، ساياساتتا ۇساق-تۇيەك دەگەن بولمايدى، پرەزيدەنت ءۇشىن ءبارى ماڭىزدى.

زيالى قاۋىمىمىز بەن باي-باعلاندارىمىزدىڭ ءتۇرى وسى بولعاندا، ءبىز قارىزعا باتىپ، سونىڭ كەسىرىنەن ناشاقورلىق پەن قۇمارپازدىققا تۇنشىعىپ بارا جاتقان مىنا قارا حالىقپەن قالاي «جاڭا قازاقستان» قۇرا الامىز دەگەن دە ويعا قالدىق.

ءتىپتى، «اتىمدى ادام قويعان سوڭ، قايتىپ نادان بولايىن؟ حالقىم نادان بولعان سوڭ، قايدا بارىپ وڭايىن؟!» - دەگەن اباي ءسوزىن مەڭزەپ وتىرعان جوق پا دەگەن دە قيال كەلدى باسىما.

قاتەلەسسەم تۇزەتىپ قويىڭىزدار، قاسىم-جومارت كەمەلۇلىنىڭ بۇدان دا باتىل رەفورمالار مەن باتىل شەشىمدەرگە بارىڭقىراماي وتىرعانىنىڭ ءبىر سەبەبى – وسىدان ەكەن-اۋ دەپ ويلادىم.

ارينە، بوداندىق قامىتىنان شىققان ەلدىڭ حالىقىن ەڭ كەمىندە ەلۋ جىل كىنالاۋعا بولمايدى!

كەرىسىنشە، سول حالىقتى وسىنداي كۇيگە تۇسىرگەن سەبەپتى جان-جاقتى باعامداعان جانە ول سەبەپتى اشىق ايتقان دۇرىس دەپ ويلايمىن.

جاقسىلاپ باعامداي بىلسەك، ءجىپتىڭ ءبىر ۇشى اتقارۋشى بيلىك پەن زاڭ شىعارۋشى ورگانعا، ودان ارى مەملەكەتتىك باسقارۋ جۇيەسىنە، ودان ارى قاراي اتقاتى «162»-گە بارىپ تىرەلۋى مۇمكىن.

مەنشە، «شىن مانىندە، جەكە مۇددەسىن ەمەس، ەل مۇددەسىن بارىنەن بيىك قوياتىن ازاماتتار» قالىپتاستىرۋ ءۇشىن ەڭ ءبىرىنشى كەزەكتە ءادىل باسەكەلەستىك قاجەت.

«وسى دەرتتىڭ بارىنەن تۇبەگەيلى ارىلساق، ۇلتىمىزدىڭ ساپاسىن جاقسارتامىز، ونى مۇلدە جاڭا دەڭگەيگە كوتەرەمىز»، - دەپتى قاسىم-جومارت كەمەلۇلى.

ەڭ باستىسى، پرەزيدەنت قاسىم-جومارت توقاەۆ بۇل جولى ءوزى باسقارىپ وتىرعان ەلدىڭ بار شىندىعىن جايىپ سالدى.

ءبىزدى وسى دەرتتىڭ بارىنەن تۇبەگەيلى ارىلتاتىن جالعىز جول - ءادىل باسەكەلەستىك!

ءبىز وسى جولدا پرەزيدەنتپەن بىرگەمىز!!!

اۋىت مۇقيبەك

***

- قازىر ەرتەدە وتكەن وقيعالارعا، بەلگىلى ءبىر تۇلعالارعا قاتىستى تالقىلاۋ كوبەيىپ بارادى;

- قالامگەرلەرىمىز، ءتىپتى، شىڭعىس حاننىڭ تەگى كىم دەپ، ايتىسىپ-تارتىسىپ جاتاتىن بولدى;

- الاش كوسەمدەرى مەن كەڭەس قايراتكەرلەرىن سالىستىرىپ، ءبىر-بىرىنە قارسى قويادى;

- اشىعىن ايتۋىمىز كەرەك، ءبىز تاريحقا كەلگەندە كوبىنەسە ەموتسياعا بەرىلىپ كەتەمىز;

- سوڭعى كەزدە اتا-باباسىنىڭ، جەرلەسىنىڭ ەسىمىن ۇلىقتاۋدى سۇراپ، ۇجىمدىق حات جازۋ ادەتكە اينالىپ بارادى;

- اتاسىنا ەسكەرتكىش قويۋدى، كوشەگە اتىن بەرۋدى وتىنەتىندەر كوبەيدى;

- سوڭعى جىلدارى ەل ىشىندە قارا كيىنىپ، تۇمشالانىپ جۇرەتىن ادامدار پايدا بولعانى بارشاڭىزعا ءمالىم;

- راديكالدى نەوفيتتار حالقىمىزدىڭ سالتىندا جوق كيىم ۇلگىلەرى ارقىلى دا جات ءدىني يدەالداردى قوعامعا تاڭۋعا تىرىسىپ ءجۇر;

- دەسترۋكتيۆتى ناسيحاتتارعا ءبىزدىڭ ەلىمىزدەگى بالالار دا ىلەسىپ كەتىپ ءجۇر;

- يسلام قاعيدالارىن ورەسكەل بۇرمالاپ، قاتىپ قالعان دوگما رەتىندە قابىلدايتىن وتباسىلارداعى ايەلدەردى كەمسىتۋ، ءتىپتى قورلاۋ فاكتىلەرىنە ەرەكشە نازار اۋدارعان ءجون;

- ەلىمىزدە قىز الىپ قاشۋدى، كوپ ايەل الۋدى ۇلتتىق ءداستۇر ساناپ، ەل ىشىندە دارىپتەگىسى كەلەتىندەر بار;

- تەك بىلتىردىڭ وزىندە ەسىرتكىگە قاتىستى 7,5 مىڭنان استام قىلمىس انىقتالدى;

- زاڭسىز اينالىمنان 41 توننا ەسىرتكى الىندى;

- ناشاقورلىق، اسىرەسە، بالالار اراسىندا تەز تارالىپ، جاستارىمىز ۋلانىپ جاتىر;

- دەنساۋلىققا زيان ءارى ۇيات ادەتتىڭ ءبىرى – ناسىباي اتۋ;

- تاعى ءبىر قاۋىپتى كەسەل – لۋدومانيا، ياعني قۇمارپازدىق;

- 400 مىڭعا جۋىق ازامات – بۋكمەكەرلىك كەڭسەلەر مەن كازينولاردىڭ تۇراقتى كليەنتى;

- بىرەۋگە ءتىل تيگىزىپ، ار-نامىسىن تاپتاپ، ءتىپتى، ۇرىپ-سوعۋعا دايىن تۇراتىندار از ەمەس;

- وكىنىشكە قاراي، قوعامدىق مۇلىكتەن باستاپ، مىڭجىلدىق مادەني مۇرالارعا دەيىن – ءبارىن جاپپاي ءبۇلدىرۋ كەيىنگى كەزدە ادەتكە اينالعان;

- ۇيدەگى ءليفتىنى، اۋلاداعى ويىن الاڭىن، كوشەدەگى ايالدامانى قيراتۋدىڭ قانداي قيسىنى بار؟!

- بىزدە سۋدى ۇنەمدەۋگە بايلانىستى قالىپتاسقان ءداستۇر جوق;

- ءوزىڭدى، ەلىڭدى دامىتۋعا قاجەتتى قانشاما التىن ۋاقىت ونبەيتىن داۋ-دامايعا، ەش پايداسى جوق ىسكە جۇمسالىپ جاتىر;

- الايدا كەيبىر كاسىپكەرلەر الدىمەن ەلدىڭ ەمەس، ءوزىنىڭ ماسەلەسىن ايتىپ قالۋعا تىرىسادى;

- جول ءجۇرۋ ەرەجەسىن جاپپاي بۇزۋدىڭ جانە جول ۇستىندەگى دورەكىلىكتىڭ زارداپتارى اسا اۋىر بولىپ تۇر...

(قاسىم-جومارت توقاەۆتىڭ ۇلتتىق قۇرىلتايدىڭ ءۇشىنشى وتىرىسىندا سويلەگەن سوزىنەن)

Abai.kz