ەركىندىكتىڭ جاۋى كوپ. سونىڭ ەڭ قاۋىپتىسى – قورقاقتىق!
قازاقتىقتىڭ ءبىر اتى – ەركىندىك!
***
ەركىندىكتىڭ جاۋى كوپ. سونىڭ ەڭ قاۋىپتىسى – قورقاقتىق.
***
ەركىن بولۋدىڭ ءبىر شارتى – جاعىمپاز بولماۋ، تاعى ءبىر شارتى – ءوزىڭدى ءدىن-سىننەن اۋلاق ۇستاۋ.
***
تاربيەنىڭ ەڭ باياندىسى – بالانى ءسابي شاعىنان ەركىندىككە تاربيەلەۋ.
***
ەركىن حالىقتا عانا ۇلتتىق مىنەز بولماق، ۇلتتىق مىنەزى جوق حالىقتا – ۇلتتىق سانا بولماق ەمەس.
***
قوعامعا ەركىن وي ايتىپ، باتىل پىكىر بىلدىرە المايتىن تالانتتى ادام نەشە جەردەن تالانتتى بولسا دا – تالانتتى ەمەس.
***
حالقىڭنىڭ دۇنيەتانىمىن، سالت-ءداستۇرىن، مورالدىق-ەتيكالىق نورمالارىن بىلمەي تۇرىپ، ءوزىڭدى ەركىن ادام ساناۋ – بەكەرشىلىك.
***
ەركىندىك – حالىق ءانىن شىرقاۋدان، قۇلدىق – مولدانىڭ ۋاعىزىنا ۇيۋدان باستالادى.
***
ەركىن ادام – قۇل ۇستامايدى.
***
ينتەلليگەنتسياسى، اقىن-جازۋشىسى جالتاق ەلدىڭ: بيلىگى وكتەم ءھام جەمقور، حالقى – قۇل، جاقسىسى – قور، عالىمى – كەدەي بوپ وتپەك.
***
بيلىكپەن اۋىز جالاسىپ العان جازۋشىنى – جازۋشى دەمەي-اق قوي، اقىندى – ءتىپتى.
***
بيلىككە سالساڭ – ەركىن وي كەشۋدىڭ ءوزى قىلمىس، دىنشىلدەرگە سالساڭ – قيالداۋدىڭ ءوزى كۇناكارلىق
***
مولدانىڭ ۋاعىزىنا ۇيىعان كۇنى – قۇل بولدىم دەي بەر.
***
قازاق دالاسىن جاۋلاعان ورىس وتارشىلدارىنىڭ ەكى قۋاتتى قارۋى بولدى، ءبىرى – زەڭبىرەك، ءبىرى – ۋكازنوي مولدا.
***
ورىس وتارشىلدىعىنان قالعان ەڭ اۋىر دەرت – ءتۇپسانادا قالىپ قويعان ۇلتتىق ۇرەي.
***
ۇرەيگە بوي الدىرعان ۇلت "قورىقپاڭدار!" دەيتىن كوسەم كۇتۋمەن جۇرەدى.
***
ەركىن بولۋ – قيىن. قۇل بولۋ – وڭاي.
بىرىنشىسىنە – كۇرەس كەرەك، ەكىنشىسىنە – باعىنساڭ بولدى.
***
ەگەر، ەركىندىك اتتى ءدىن دۇنيەگە كەلەر بولسا، بيلەۋشىلەر ونى اكەلگەن نابيىمەن قوسا قۇرتىپ جىبەرگەن بولار ەدى.
سوندىقتان بيلەۋشىلەرگە ادال قىزمەت ەتكەن دىندەر عانا ءدىن-امان كەلە جاتىر.
***
بيلىك پەن ءدىن ءبىراۋىز. توبىرلىق مادەنيەتپەن قوساۋىز. بەيبىت كۇندە بۇل اۋىزدار ەل داۋلەتىن قاربىتا جەۋدەن ەش بوسامايدى. ال حالىق تولقىپ، تەڭدىك سۇراسا – دەرەۋ مىلتىققا اينالا قويادى. ونى قاڭتاردا كوردىك.
***
ەركىندىك، ادىلدىك، تەڭدىك تۋرالى بيلىك ويلاپ تاپقان ادەمى اڭىزدار كوپ، وعان سەنىپ قالۋعا استە بولمايدى.
***
باتىس وركەنيەتىنىڭ كونستيتۋتسياسى ەركىندىك ءۇشىن كۇرەسكەن جانكەشتى ەرلەردىڭ قانىمەن جازىلعان، قازاقتىكى – نازارباەۆتىڭ قالاۋىمەن.
***
ءبىلىمدى، وياۋ ەل عانا تاۋەلسىزدىكتىڭ قادىرىن بىلمەك.
***
ءبىزدىڭ ۇلتشىلداردىڭ ۇلتشىلدىعى دەپۋتات بولۋمەن اياقتالادى.
***
دەسەڭ – وپپوزيتسيونەر، جەسەڭ – اكىم، سوت، پروكۋرور، مينيستر ت.ب...
***
قۇداي – جۇرەكتە، ءدىن – دۇنيەدە (اقشادا).
***
قۇل يەلەنۋشىلىك داۋىردە بيلىك تۇتقىنداردىڭ دەنە كۇشىن عانا قۇلدانسا، اۆرامدىق دىندەردىڭ كەلۋىمەن ادامداردىڭ وي-ساناسى كىسەندەلىپ، رۋحاني قۇلدىق ءداۋىرى باستالدى جانە ول ءالى اياقتالعان جوق. قازاق قوعامىندا بۇل ءۇردىس ءتىپتى كۇشەيىپ كەلەدى.
***
ەركىندىك ءتۇبى – جالعىزدىق.
***
سۇيگەنىڭ دە قۇلىم بولىپ سۇيسەڭ دەيدى.
***
سەن امان بول دومبىرا! سەن تۇرعاندا – قازاقى ەركىندىك ۇعىمى، وعان دەگەن قۇشتارلىق ولمەك ەمەس!
***
ەركىندىكتىڭ ءبىر شەگى – جاۋاپكەرشىلىك، ءبىر شەگى – ولىمنەن قورىقپاۋ.
ەركىندىك تۋرالى بۇل ويماقتاي ويلاردىڭ اۆتورى – ەرلان تولەۋتاي
Abai.kz
