قۋاندىق بيشىمباەۆتىڭ وتباسى مۇشەلەرى مەن تۋىستارىنىڭ مۇلىكتىك جاعدايى مەن مۇلكىنىڭ شىعۋ تەگىنە تاۋەلسىز تەكسەرۋ جۇرگىزۋ تۋرالى قازاقستان رەسپۋبليكاسىنىڭ پرەزيدەنتىنە اشىق ۇندەۋ جاريالاندى.

«ءبىز، تومەندە قول قويۋشىلار، اتا زاڭىمىزدىڭ كەپىلى رەتىندە سىزگە قازىرگى ۋاقىتتا ايەلى سالتانات امانگەلدىقىزى نۇكەنوۆانى ءولتىردى دەپ ايىپتالىپ جاتقان بيشىمباەۆ قۋاندىق ءۋاليحانۇلىنىڭ وتباسى مۇشەلەرى مەن تۋىستارىنىڭ مۇلىكتىك جاعدايى مەن مۇلكىنىڭ شىعۋ تەگىن تەكسەرۋگە قاتىستى ءوتىنىشىمىزدى قاراۋدى سۇرايمىز.

بيشىمباەۆ قۋاندىق جاساعان قىلمىس سالتانات نۇكەنوۆا مەن ونىڭ جاقىندارىنا سوزبەن جەتكىزگىسىز قاسىرەت اكەلدى. بۇل زورلىق-زومبىلىق ارەكەتى جۇرتشىلىق اراسىندا نارازىلىق پەن ۇرەي تۋدىردى جانە ءبىز كىنالى ءوزىنىڭ قىلمىستىق ارەكەتتەرى ءۇشىن زاڭعا سايكەس تولىق جاۋاپ بەرۋى كەرەك ەكەنىنە سەنىمدىمىز»، – دەلىنگەن پەتيتسيادا.

پەتيتسيادا سونداي-اق قوعامنىڭ اشىقتىق پەن ادىلدىككە دەگەن سەنىمىن ەسكەرە وتىرىپ، رەسمي مارتەبەسىمەن تۇسىندىرىلمەگەن قوماقتى قارجىلىق مۇمكىندىگى بار بيشىمباەۆتار وتباسى مۇشەلەرىنىڭ كىرىس كوزدەرىنە مۇقيات ساراپتاما جۇرگىزۋ قاجەتتىگى ايتىلعان. بۇل رەتتە، اسىرەسە، بيشىمباەۆ قۋاندىقتىڭ اناسى زەينەتكەر الميرا نۇرلىبەكقىزى مەن ونىڭ بۇرىن سىبايلاس جەمقورلىق قىلمىسى ءۇشىن سوتتالعان ۇلىنىڭ قىزمەتى اراسىنداعى ىقتيمال بايلانىستى ەسكەرۋ قاجەتتىگى ءسوز بولدى.

«بيشىمباەۆتار وتباسىنىڭ كىرىس كوزدەرىنە تاۋەلسىز اۋديت جۇرگىزۋ قوعامنىڭ زاڭدى مۇددەلەرىن قورعاۋعا قىزمەت ەتىپ قانا قويماي، قىلمىستىق جولمەن الىنعان قاراجاتتى زاڭداستىرۋدىڭ ىقتيمال جاعدايلارىنىڭ الدىن الادى. بۇل سونداي-اق ازاماتتاردىڭ سوت تورەلىگى مەن جالپى زاڭ ۇستەمدىگىنە دەگەن سەنىمىن نىعايتۋعا ىقپال ەتەدى»، – دەلىنگەن ءوتىنىشتى.

Abai.kz