ەلىمىزدەگى سۋ تاسقىنىنا بايلانىستى سوڭعى اقپارتتار جيىنتىعىن ۇسىنىپ وتىرمىز...

قازاقستاننىڭ 7 وبلىسىندا جول قوزعالىسى شەكتەلدى

"قازاۆتوجول" مالىمەتىنشە، 8 ساۋىردەگى ساعات 7.00 جاعداي بويىنشا حالىقارالىق جانە رەسپۋبليكالىق ماڭىزى بار اۆتوجولداردا جالپى ۇزىندىعى 3206 مەتر بولاتىن جەتى ۋچاسكەدە: اتىراۋ، قوستاناي، پاۆلودار، سولتۇستىك قازاقستان وبلىستارىندا ەرىگەن قار سۋى وقيعاسى تىركەلدى.

سۋرەت: قر تجم

رەسپۋبليكالىق ماڭىزى بار جەتى وبلىستا (اقتوبە، اقمولا، اتىراۋ، قوستاناي، پاۆلودار، ماڭعىستاۋ، سولتۇستىك قازاقستان) ۇزىندىعى 679 كم 14 اۆتوجولداردا قوزعالىس شەكتەلدى. رەسپۋبليكالىق جولداردا 305 بىرلىك تەحنيكا مەن 357 ادام جۇمىس ىستەيدى.

قازاقستانداعى سۋ تاسقىنى: قازىرگە دەيىن نە بەلگىلى؟

رەسپۋبليكالىق اقپاراتتىق شتابتا وتكەن بريفينگتە قازاقستانداعى سۋ تاسقىنى جاعدايى بويىنشا جەدەل اقپارات بەرىلدى، دەپ حابارلايدى باق.

قازىرگى ۋاقىتتا 3686 جەكە تۇرعىن ءۇيدى، 557 اۋلا اۋماعىن، 1822 ساياجاي ءۇيىن سۋ باسۋدا. بۇل اتىراۋ، اقتوبە، اقمولا، قوستاناي، باتىس قازاقستان، سولتۇستىك قازاقستان، پاۆلودار وبلىستارىنداعى جاعداي.

سۋرەت: قر تجم

"سۋ تاسقىنى كەزەڭىنىڭ باسىنان بەرى 72 029 ادام قۇتقارىلدى، ونىڭ ىشىندە 16 078 بالا. ۋاقىتشا ورنالاستىرۋ پۋنكتتەرىندە 14 368 ادام، ونىڭ ىشىندە 7 200 بالا بار", - دەپ اتاپ ءوتتى تجم توتەنشە جاعدايلاردى جويۋ دەپارتامەنتىنىڭ باستىعى قاھارمان ورازالين.

7,5 ميلليون تەكشە مەتردەن استام ەرىگەن سۋ سورىلىپ، 950 مىڭ توننا قاپ جانە 976 مىڭ توننا ينەرتتى ماتەريالدار توسەلدى. اۆاريالىق-قۇتقارۋ جۇمىستارىنا 12 455 ادام، 7 اۋە كەمەسى تارتىلدى.

"رەسپۋبليكالىق جەدەل شتابتىڭ باقىلاۋىندا اتىراۋ، اقتوبە، اقمولا، قوستاناي، باتىس قازاقستان، سولتۇستىك قازاقستان، پاۆلودار وبلىستارى تۇر", - دەپ تولىقتىردى ورازالين.

قازگيدرومەت نە دەيدى؟

"قازگيدرومەت" رمك ءباسپاسوز حاتشىسى الينا يسماعۇلوۆا اتاپ وتكەندەي، 8 ساۋىردە رەسپۋبليكانىڭ كوپ بولىگىندە اۋا رايىنىڭ تۇراقسىز سيپاتى ساقتالادى، جاڭبىر جاۋادى، تۇنگى ساعاتتاردا سولتۇستىك-باتىستا، سولتۇستىكتە جانە ورتالىقتا جاۋىن-شاشىن بولادى (جاڭبىر جاۋىپ، قارعا اۋىسادى). 8 ساۋىردە كۇندىز قازاقستاننىڭ ورتالىعىندا قاتتى جاڭبىر جاۋادى دەپ كۇتىلۋدە.

سۋرەت: قر تجم

سقو-دا الدىن الا ەۆاكۋاتسيا

ەسىل اۋدانىنىڭ نيكولاەۆكا، بىرلىك اۋىلدارىندا جانە شال اقىن اۋدانىنىڭ قاراتال اۋىلىندا ەسىل وزەنىندەگى سۋ دەڭگەيىنىڭ كوتەرىلۋىنە بايلانىستى تۇرعىن ۇيلەردى سۋ باسۋ قاۋپى تۋىندادى، دەپ حابارلادى تجم. 105 تۇرعىن، ونىڭ ىشىندە 37 بالا الدىن الا ەۆاكۋاتسيالانىپ، تۋىستارى مەن ەۆاكۋاتسيالىق پۋنكتكە ورنالاستىرىلدى. 57 اۋىل شارۋاشىلىعى جانۋارلارى قاۋىپسىز جەرگە ايدالدى.

سۋرەت: قر تجم

قۇلسارى سۋ باسقان ۇيلەر:

قازىرگى ۋاقىتتا اتىراۋ وبلىسى جىلىوي اۋدانى قۇلسارى قالاسىندا 2680 ءۇيدى سۋ باستى, دەپ حابارلايدى تجم.

جەم وزەنىنىڭ دەڭگەيىنىڭ كوتەرىلۋىنە بايلانىستى تجم قىزمەتكەرلەرى 8150 قاپ قۇم دايىنداپ، 2200 مەتر قورعانىس بوگەتىن بەكىتتى. تۇرعىنداردان 20 قوڭىراۋ كەلىپ ءتۇستى، توعىز ادام قۇتقارىلدى، ونىڭ ىشىندە ءتورت بالا، 34 ادام قاۋىپسىز جەرگە كوشىرىلدى. سونداي-اق، قاۋىپسىز جەرگە 40 ءۇي جانۋارى جەتكىزىلدى.

اقمولا وبلىسىندا ادامداردى قۇتقارۋ:

اقمولا وبلىسىندا قۇتقارۋشىلار "42-رازەزد" ستانتسياسىندا تۇراتىن ءۇش ادامدى ەۆاكۋاتسيالادى. بۇگىنگى تاڭدا ستانتسيادا ءۇش اۋلا اۋماعىن سۋ باستى.

سۋرەت: سكرينشوت

قوستانايداعى جاعداي:

تجم قوستاناي قالاسىنىڭ ورتالىق كوپىرىندەگى جاعدايدى بەينەلەيتىن بەينەبايان جاريالادى.

7 ساۋىردە توبىل جانە قوستاناي قالالارى اراسىنداعى ورتالىق كوپىرگە قر تجم قىزمەتكەرلەرى، ەرىكتىلەر، جەرگىلىكتى اتقارۋشى ورگاندار مەن ۇلتتىق ۇلاننىڭ قىزمەتكەرلەرى قاپ پەن ينەرتتى ماتەريالداردى توسەدى. ەلدى مەكەندەردە توبىل وزەنىندەگى سۋ دەڭگەيىنىڭ كوتەرىلۋىنە بايلانىستى سۋ باسۋ قاۋپى ءالى دە بار.

سونداي-اق قوستاناي وبلىسىنىڭ قۇتقارۋشىلارى، پوليتسەيلەر جانە جەرگىلىكتى بيلىك قاراسۋ اۋدانىندا 300-گە جۋىق اۋىلدى الدىن الا ەۆاكۋاتسيالادى. 5 ساۋىردەن باستاپ قاراسۋ اۋدانىندا جەرگىلىكتى اۋقىمداعى تج رەجيمى قولدانىلادى.

سۋرەت: zhaikpress.kz

بقو-داعى جاعداي:

ۆيتسە-پرەمەر نۇرلان بايبازاروۆ سۋ باسۋ قاۋپى تونگەن اۋماقتى، سونىڭ ىشىندە ورال ماڭىنداعى ساياجاي الاپتارىن ارالادى، دەپ حابارلايدى ءوڭىر اكىمدىگىنىڭ ءباسپاسوز قىزمەتى.

پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ جايىق وزەنىندەگى سۋ تاسقىنىنىڭ الدىن الۋ جۇمىستارىمەن تانىستى. سۋدىڭ كوتەرىلۋىنە بايلانىستى جاعالاۋلار قۇم سالىنعان قاپتارمەن نىعايتىلادى، اۋىر تەحنيكا جۇمىس ىستەيدى.

باتىس قازاقستان وبلىسىنا جاقىن رەسەيدىڭ ساراتوۆ جانە ورىنبور وبلىستارىنان سۋدىڭ ۇلكەن كولەمى كەلىپ تۇسەدى. اتاپ ايتقاندا، ساراتوۆ وبلىسىنداعى پريۋزەن سۋ قويماسىنان قاراوزەنگە سەكۋندىنا 300 تەكشە مەتر كەلىپ تۇسەدى. سونداي-اق ورىنبورداعى يريكلينسك سۋ قويماسىنان سەكۋندىنا شامامەن 2 مىڭ تەكشە مەتر جونەلتىلەدى. بۇل سۋلار تاياۋ ارادا جايىق وزەنى ارقىلى جانە ودان ءارى كاسپيگە وتەدى. وسىعان بايلانىستى ورال دەڭگەيى قالاعا قاۋىپ توندىرە وتىرىپ، قاۋىپتى دەڭگەيگە جەتۋى مۇمكىن.

سونداي-اق، بايبازاروۆ تەرەكتى اۋدانىنىڭ ۇزىنكول سۋ قويماسىن ارالاپ كوردى. جاعداي تۇراقتى، سۋ دەڭگەيى تومەندەۋدە. سۋ تاسقىنى سالدارىنان بقو مەن ورالدىڭ بەس اۋدانىندا تۇرعىن ۇيلەر مەن ساياجايلاردى سۋ باستى. وبلىس بويىنشا 7 مىڭعا جۋىق ادام ەۆاكۋاتسيالاندى.

سۋ تاسقىنىنان زارداپ شەككەندەرگە مىڭداعان ەرىكتىلەر كومەك كورسەتۋدە. حالىققا ازىق-تۇلىك، ءدارى-دارمەك جانە كيىم جەتكىزىلەدى. كەزەكشىلىك ۇيىمداستىرىلدى. وقۋشىلار ونلاين فورماتتا ءبىلىم الادى.

"اۋا تەمپەراتۋراسى كۇندىز ەلىمىزدىڭ باتىسىندا جانە شىعىسىندا 13-20 گرادۋس، رەسپۋبليكانىڭ سولتۇستىك-باتىسىندا جانە سولتۇستىگىندە - 7-15 گرادۋس، ورتالىقتا - 12-17 گرادۋس، ەلىمىزدىڭ وڭتۇستىگىندە - 20-25 گرادۋس، رەسپۋبليكانىڭ وڭتۇستىك-شىعىسىندا - 17-22 گرادۋس بولادى", - دەدى الينا يسماعۇلوۆا.

Abai.kz