بىرنەشە اي بويى ەلدىڭ نازارىندا بولعان سالتانات نۇكەنوۆانىڭ ولىمىنە قاتىستى ىسكە بۇگىن نۇكتە قويىلدى.

مارقۇم سالتانات نۇكەنوۆاعا اسا قاتىگەزدىكپەن قول جۇمساپ، ولىمگە دەيىن جەتكىزگەن بۇل ماسەلە قوعامدا قىزۋ تالقىعا تۇسكەن. تىپتەن، بۇل ىسكە قاتىستى سوت تا كوپشىلىكتىڭ نازارىندا ءوتتى.

بۇگىن استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ايەلىن اسا قاتىگەزدىكپەن ولتىرگەن ەكس-مينيستر قۋاندىق بيشىمباەۆ پەن ونىڭ تۋىسى باقىتجان بايجانوۆقا قاتىستى ىسكە سوت ۇكىم شىعاردى.

قۋاندىق بيشىمباەۆ كەلەسى قىلمىستاردى جاسادى دەپ ايىپتالعان بولاتىن:

- قر قك 99-بابى، 2-بولىگى، 5-تارماعى بويىنشا "اسقان قاتىگەزدىكپەن كىسى ءولتىرۋ";

- قر قك 110-بابى، 2-ءبولىمى بويىنشا، ياعني ازاپتاۋ.

"110-باپتىڭ 2-بولىگىنىڭ 1-تارماعىنا سايكەس 7 جىلعا باس بوستاندىعىنان ايىرىلسىن، 99-باپتىڭ 2-بولىگىنىڭ 5-تارماعى بويىنشا 20 جىلعا باس بوستاندىعىنان ايىرىلسىن. بارلىعىن قوسقاندا بيشىمباەۆ 24 جىلعا باس بوستاندىعىنان ايىرىلسىن. بيشىمباەۆتىڭ ارەكەتتەرىندە قاۋىپتى رەتسيديۆ بار دەپ تانىلۋى ءتيىس. بيشىمباەۆ جازاسىن قىلمىستىق-اتقارۋ جۇيەسىنىڭ قاۋىپسىزدىگى ەڭ جوعارى مەكەمەسىندە وتەسىن. 2023 جىلعى 9 قاراشادان باستاپ ۇكىم زاڭدى كۇشىنە ەنگەنگە دەيىن قاماۋدا بولعان ۋاقىتاعى ءار كۇن ەندى وتەيتىن جازانىڭ كۇنىنە تەڭەستىرىلسىن", – دەدى سۋديا ايجان قۇلباەۆا.

قۋاندىق بىشىمباەۆ "بولاشاق" باعدارلاماسىمەن شەتەلدە وقىعان. 2009-2010 جىلدارى پرەزيدەنت نازارباەۆتىڭ كومەكشىسى قىزمەتىن اتقارعان. ودان كەيىن ساۋدا جانە ەكونوميكالىق دامۋ ءمينيسترىنىڭ ورىنباسارى، "سامۇرىق-قازىنا" قورى باسقارما توراعاسىنىڭ ورىنباسارى بولدى. 2013-2016 جىلدار ارالىعىندا "بايتەرەك" اق باسقارما توراعاسى، 2016 جىلى بىرنەشە اي ۇلتتىق ەكونوميكا ءمينيسترى قىزمەتىن اتقاردى.

2017 جىلى 10 قاڭتاردا اسا ءىرى كولەمدە پارا الدى دەگەن ايىپپەن تۇتقىندالادى. 2018 جىلى 14 ناۋرىزدا سوت شەشىمىمەن 10 جىلعا سوتتالادى، الايدا 2019 جىلى 25 قىركۇيەكتە كەشىرىم سۇراپ، بوستاندىققا شىققان.

ال سوتتالۋشىنىڭ تۋىسى، گاسترو-ورتالىق ديرەكتورى باقىتجان بايجانوۆ سوت ۇكىم بويىنشا 4 جىلعا باس بوستاندىعىنان ايىرىلدى.

"باس بوستاندىعىنان ايىرۋ جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەيدى. 2023 جىلعى 11 قاراشادان باستاپ ۇكiم زاڭدى كۇشiنە ەنگەنگە دەيiن قاماۋدا ۇستاۋ ۋاقىتى: باس بوستاندىعىنان ايىرۋ مەرزiمi تاۋلىگىنە ءبىر جارىم تاۋلىك مولشەرىندە ەسەپتەلسىن", – دەپ وقىدى سۋديا.

اسقار داريعا

Abai.kz