مەملەكەت باسشىسى قاسىم-جومارت توقاەۆ عالىمدارمەن كەزدەستى. بيىل تۋعانىنا 125 جىل تولعان اكادەميك قانىش ساتباەۆتان قالعان شاڭىراقتىڭ قايتا ىرگە كوتەرۋمەن جينالعان قاۋىمدى: «جاڭارعان عىلىم ورداسى بۇگىنگى جانە بولاشاق عالىمدار ءۇشىن قىزمەت ەتە بەرەدى»، - دەپ قۇتتىقتاعان مەملەكەت باسشىسى ەكى جىل بۇرىن بۇل جەردە كۇردەلى جوندەۋ جۇرگىزۋ جونىندە ناقتى تاپسىرما بەرىپ، سونىڭ ناتيجەسىنىڭ قالاي بولعانىنا ءوز ويىن ءبىلدىردى.

پرەزيدەنت قازىر – عىلىم مەن ءبىلىمنىڭ زامانى ەكەنىن العا تارتىپ: «ەگەر وتانىمىزدى كوركەيتەمىز دەسەك، ەڭ الدىمەن، وسى اتالعان ەكى سالانى دامىتۋىمىز كەرەك»، - دەپ قاداپ ايتتى.  ويتكەنى، «بۇدان باسقا جول جوق».

مەملەكەت باسشىسىنىڭ باستى ويى دا «شيكىزاتقا ارقا سۇيەپ وتىرعان ەل الىسقا بارمايدى. بىزگە عالىمدار، ينجەنەرلەر، ونەرتاپقىشتار قاجەت. ماماندارىمىز الەمدىك باسەكەگە توتەپ بەرە الاتىنداي ءبىلىمدى، بىلىكتى بولۋى كەرەك.

بۇگىندە الپاۋىت ەلدەردىڭ اراسىندا بارلىق سالادا باقتالاستىق ءورشىپ تۇر. ءبىز وسى كۇردەلى كەزەڭدە ەكونوميكانىڭ جاڭا ۇلگىسىنە كوشە باستادىق. ءادىل، ينكليۋزيۆتى ءارى باسەكەگە قابىلەتتى ەكونوميكا قۇرۋعا كىرىستىك. عىلىم مەن يننوۆاتسيا ونىڭ باستى تىرەگى بولۋعا ءتيىس. ءبىز كوشكە ىلەسەتىن ەمەس، كوشتى باستايتىن ەلدەردىڭ قاتارىندا بولۋىمىز كەرەك. ءبىر سوزبەن، عىلىمي الەۋەتىمىزدى ارتتىرۋ قاجەت. جالپى، وسى باعىتتا ءبىراز شارۋا اتقارىلىپ جاتىر.

«مەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا بىرقاتار ناقتى تاپسىرما بەردىم. بارلىق ماسەلە مەنىڭ تىكەلەي باقىلاۋىمدا»، - دەي كەلە، قازىر «عىلىم جانە تەحنولوگيالىق ساياسات تۋرالى» زاڭ جوباسى پارلامەنتتە قارالىپ جاتقانىن ايتتى.

ايماقتارىمىز بويىنشا تەحنولوگيا پاركتەرى جانە ينجينيرينگ ورتالىقتارى اشىلىپ جاتىر. جىل سايىن 500 عالىم شەتەلدە تاعىلىمدامادان وتەدى. مينيسترلىك جاس عالىمدارعا مىڭداعان گرانت ءبولىپ جاتىر. مۇنىڭ ءبارى عىلىمدى دامىتۋعا وڭ ىقپالىن تيگىزە باستايتىنى داۋسىز.

«ستراتەگيالىق باعدارىمىز قازاقستاننىڭ مەملەكەتتىلىگىن نىعايتۋعا جانە حالىقتىڭ تۇرمىسىن جاقسارتۋعا باعىتتالعان. ەلىمىزدىڭ بارلىق ازاماتى، اسىرەسە جاستار مۇنى جاقسى ءتۇسىنۋى كەرەك جانە رەفورمالاردان شەت قالماعانى ابزال.

بۇگىنگى جاس ۇرپاق جاڭعىرۋ ۇدەرىستەرىنە اتسالىسىپ، ەلىمىزدە جۇرگىزىلىپ جاتقان رەفورمالاردىڭ يگىلىگىن تولىق سەزىنۋى قاجەت. دارىندى، تالاپتى جانە ەڭبەكقور جاستار، ونىڭ ىشىندە عالىمدار – زاماناۋي قازاقستاننىڭ جارقىن كەلبەتى. جاس ءارى تەرەڭ ءبىلىمدى ازاماتتار – ۇلتىمىزدىڭ باستى كاپيتالى جانە قوعامداعى وڭ وزگەرىستەردىڭ قوزعاۋشى كۇشى»، - دەگەنى ەل بولاشاعىنىڭ جارقىن ەكەنىن تانىتادى.

بۇل ارادا ەسكەرەتىن ءبىر دۇنيە «جاساندى ينتەللەكتىنى» دامىتۋ ىسىندە وزا شاپقان ەل عانا جەر بەتىندەگى جۇماقتا ءومىر سۇرەتىندىگىن زاماننىڭ الپەتى تانىپ وتىر. مىنە، وسى ءبىر زاماناۋي ماسەلە پرەزيدەنت نازارىنان تىس قالعان جوق:

«جاساندى ينتەللەكتىنى دامىتۋ ىسىندە ەلدىڭ كادرلىق الەۋەتى ماڭىزدى ءرول اتقارادى. سوندىقتان بىلىكتى مامانداردىڭ قاتارىن كوبەيتۋ كەرەك. جوعارى وقۋ ورىندارى بۇل جۇمىسپەن مىقتاپ اينالىسۋى قاجەت. بۇگىندە الەمنىڭ جەتەكشى ۋنيۆەرسيتەتتەرىنىڭ ءبىلىم بەرۋ ۇدەرىسىندە پراكتيكاعا باسىمدىق بەرىلەدى جانە ستۋدەنتتەردىڭ جاڭاشىلدىققا ۇمتىلىپ، ستارتاپتار ازىرلەۋىنە جاعداي جاسالعان. ەلىمىزدىڭ وقۋ ورىندارى وسىنداي ادىستەن ۇلگى الۋى كەرەك دەپ ويلايمىن.

ماشينالىق ۇيرەتۋدى دامىتۋ ماڭىزدى. بۇل ساراپتاما جاساۋ جانە مۇقيات پىسىقتالعان شارالار قابىلداۋ ءۇشىن وزىق تاسىلدەردى يگەرۋگە ىقپال ەتەدى. بىراق اتالعان تەحنولوگيانى كەڭ كولەمدە ەنگىزۋمەن قاتار مۇقيات زەردەلەۋدى جانە جاۋاپكەرشىلىكتى قاجەت ەتەتىن جاڭا سىن-قاتەرلەر دە پايدا بولادى. ەڭ الدىمەن، جاساندى ينتەللەكتىنى دامىتۋ، قولدانۋ ىسىندە اشىقتىق پەن ەتيكاعا ساي بولۋ ماسەلەلەرىنە باسا ءمان بەرگەن ءجون»، - دەدى پرەزيدەنت.

سونىمەن ۇلتتىق بىرگەيىمىزدى ساقتاپ، الەمدىك عىلىمەن بىرگە قالاي ادىمداۋ كەرەكتىگىنىڭ كىلتىن عالىمدارىمىز قولىنا ۇستاتقان مەملەكەت باسشىسىنىڭ عيباراتتى ءسوزى قازاق عىلىمىنىڭ قارىشتاي دامۋىنا زور سەرپىن بەردى دەسەك ارتىق ايتپايمىز.

Abai.kz