وتكەن اپتادا قازاقستاننىڭ قارجى سەكتورىنا: بارلىق بانكتەر، ميكروقارجى ۇيىمدارى، ساقتاندىرۋشى يندۋستريا، قارجىلىق مەكەمەلەرگە قازاق ءتىلىنىڭ تاعدىرىن وزگەرتكەن حات كەلىپ ءتۇستى.

مەملەكەت تاراپىنان وسى قارجىلىق سەكتوردى قاداعالاپ وتىرعان رەتتەۋشى ەكى الپاۋىت (ۇب، قنردا) ەندى بارلىق مەكەمەلەردىڭ سىرتقى جانە ىشكى قۇجات اينالىمى قازاق تىلىندە ءجۇرسىن دەگەن قاتاڭ تالاپ قويدى. كەز-كەلگەن حات، سىرتقا نەمەسە كومپانيانىڭ ءوز ىشىندەگى قىزمەتتىك جازبالار، ءبارىن قازاقشا جازاسىڭ. ورىسشا كەلگەن حاتقا ورىسشا جاۋاپ نۇسقاسىن بەرەسىڭ، بىراق ونىڭ جاۋابى الدىمەن قازاقشا بولۋى ءتيىس.

مەملەكەت تەك تالاپپەن شەكتەلگەن جوق. جوعارعى ءبىلىم مينيسترلىگىنىڭ وسى كوررەسپوندەنتسيانى قازاقشا قالاي راسىمدەۋ كەرەك، ياعني قازاق تىلىندەگى ءتۇرلى حات فورمالارىنىڭ شابلونى جاسالعان ۇلكەن نۇسقاۋلىعىن تىركەپ بەردى. تەرميندەردىڭ قازاقشا رەسمي اۋدارماسى، حات ۇلگىلەرى ءبارى بار. جوعارعى ءبىلىم مينيسترلىگى تاماشا، ۇلكەن جۇمىس اتقارىپتى.

وتاندىق قارجى ۇيىمدارى قۇجات اينالىمىن ەلەكتروندى تۇردە «دوكۋمەنتولوگ»، «لوتۋس»، «لاندوك» سىندى اقپاراتتىق جۇيەلەردە جۇرگىزەدى. ول جۇيەلەردە كومپلاەنس-قاداعالاۋشى ونلاين رەجيمدە قاي حاتتىڭ قاي تىلدە جىبەرىلگەنىن قاداعالاپ وتىرا الادى. ال كەڭسە ەگەر حات تالاپقا ساي راسىمدەلمەسە ونى تىركەمەيدى. ياعني، ءنومىر بەرىلمەيدى. وسىلايشا قازاقستاننىڭ قارجى سەكتورى ءبىر كۇن ىشىندە، وسى اپتادان باستاپ تۇگەل قۇجات اينالىمىن قازاق تىلىنە اۋىستىرىپ ۇلگەردى.

وتاندىق قارجى سەكتورىندا قازىر شامامەن 80 مىڭ ادام جۇمىس ىستەيدى. جانە ولار قوعامنىڭ ەڭ پروگرەسسيۆتى، جوعارى ءبىلىمدى، ءار نارسەنى تسيفرمەن، الگوريتممەن شەشەتىن بولىگى. ولاردىڭ قازاق تىلىنە تولىق كوشۋى مەملەكەتتىك ءتىلدى دامىتۋداعى ماڭىزدى فاكتور بولا الادى. ءتىلدى قىزىل ءسوز بەن جالاڭ ۇران ەمەس، وسىنداي تەحنيكالىق شارالار عانا كۇشەيتەتىنى ناقتى بايقالا باستادى.

ايبار ولجاەۆ

Abai.kz