سوڭعى ءۇش اپتادا 40-قا جۋىق دەموكرات كونگرەسسمەن بايدەندى ترامپپەن العاشقى پىكىرتالاستا ءساتسىز ءسوز سويلەگەنى ءۇشىن ناۋقانىن توقتاتۋعا شاقىردى.

كەشە اقش-تىڭ قازىرگى پرەزيدەنتى جو بايدەن پرەزيدەنتتىك سايلاۋدان ءوز كانديداتۋراسىن الىپ تاستايتىنىن مالىمدەدى.

سۋرەت ۆيكيپەديادان الىندى

بايدەن نە دەدى؟

"مەن ءۇشىن سىزدەردىڭ پرەزيدەنتتەرىڭىز بولۋ ومىردەگى ەڭ ۇلكەن قۇرمەت بولدى. مەن قايتا سايلانۋعا ۇمتىلعانىما قاراماستان، مەنىڭ پارتيامنىڭ جانە ەلدىڭ مۇددەسى ءۇشىن دوعارىسقا كەتىپ، قالعان مەرزىمگە پرەزيدەنتتىڭ ءوز مىندەتتەرىن ورىنداۋعا عانا كوڭىل ءبولۋ كەرەك دەپ ەسەپتەيمىن", - دەلىنگەن ح بايدەندە جاريالانعان مالىمدەمەدە.

ول اقش سوڭعى ءۇش جىلدا، ياعني ونىڭ پرەزيدەنتتىگى كەزىندە ەكونوميكالىق تۇرعىدان، دەنساۋلىق ساقتاۋ، كليماتتىڭ وزگەرۋى جانە ت.ب. سالالاردا "ۇلكەن پروگرەسكە" قول جەتكىزگەنىن، سونداي-اق، كوروناۆيرۋس پاندەمياسىنان جەڭىل-جەلپى وتكەنىن اتاپ ءوتتى. ول ءوزىنىڭ ۆيتسە-پرەزيدەنتى كامالا حارريسكە العىسىن ءبىلدىردى.

ءۇش اپتادان استام ۋاقىت بويى 81 جاسار قازىرگى مەملەكەت باسشىسى ءوزىنىڭ سايلاۋالدى ناۋقانىن توقتاتۋدى تالاپ ەتكەن پارتيالاستارىنىڭ قاتتى قىسىمىنا ۇشىرادى.

بۇعان رەسپۋبليكاشىل دونالد ترامپقا قارسى العاشقى پىكىرتالاستاعى ابدەن ابىرجىپ، كىبىرتىكتەپ ءساتسىز ءسوز سويلەۋى سەبەپ بولدى.

بايدەنگە كىمدەر قارسى بولدى؟

باستاپقىدا بايدەننىڭ سايلاۋىنىڭ بولاشاعىنا قاتىستى دەموكراتيالىق پارتيا ىشىندەگى بارلىق پىكىرتالاستار جۇرت كوزىنەن تاسادا بولدى. دەگەنمەن كەيىن كەلە، ونىڭ جەكەلەگەن مۇشەلەرىنىڭ نارازىلىعى مەن ساياسي ۇرەيى باق-قا تارادى. بىراق كەيىن ونداعان كونگرەسسمەن (بۇل ارادا The Washington Post جۋرنالىنىڭ مالىمەتتەرىنشە، كەم دەگەندە 37 دەموكرات تۋرالى ءسوز بولىپ تۇر) پرەزيدەنتتى ءوز كانديداتۋراسىن الىپ تاستاۋعا شاقىردى. ولارعا پارتيانىڭ بىرقاتار ءىرى قاجىلاندىرۋشىلارىمەن قاتار، ءتىپتى، جوردج كلۋني سياقتى گولليۆۋدتىق اتاقتى ادامدار دا قوسىلدى.

سەناتتاعى دەموكراتتاردىڭ باسىم كوپشىلىگىنىڭ سەركەسى چاك شۋمەر جانە وكىلدەر پالاتاسىنىڭ بۇرىنعى سپيكەرى نەنسي پەلوسي دە بايدەندى وسىنداي قادامعا شاقىردى. ولار ەگەر بايدەن دودادان كەتپەسە، اق ۇيمەن بىرگە اقش كونگرەسىنىڭ پالاتالارىن دا باقىلاۋدان شىعىپ، ترامپ جەڭىسكە جەتكەن جاعدايدا تولىق كۇش الىپ كەتەدى دەگەن الاڭداۋشىلىقتارىن ءبىلدىردى.

سوڭعى كۇندەرى بايدەن ءوز كانديداتۋراسىن كوپشىلىك الدىندا ۇسىنىپ وتىرعانىمەن، جەكە اڭگىمەلەرىندە سايلاۋدان باس تارتۋ مۇمكىندىگىن العا تارتىپ، ءوز ورنىنا ۆيتسە-پرەزيدەنت بولۋى ىقتيمال كانديداتۋرالاردىڭ ءبىرى بولىپ ەسەپتەلەدى دەگەندى اۋىزىنا الا باستادى.

اقش-تا جۇرگىزىلىپ جاتقان كەيبىر ساۋالنامالار سەنەر بولساق، پرەزيدەنت دودادان شەتتەۋىنىڭ الدىندا ونىڭ ترامپتى جەڭۋ مۇمكىندىگى زور بولعان.

CNN دەرەككوزدەرى حابارلاعانداي، ۆيتسە-پرەزيدەنت كامالا حارريس ترامپتى جەڭە المايدى دەگەن سوزدەردىڭ ءوڭى اينالىپ، "ال حارريس جەڭە الا ما؟" دەگەن ساۋالدىڭ باسى قىلتيا باستادى.

ABC News اق ءۇيدىڭ جوعارى لاۋازىمدى قىزمەتكەرىنە سىلتەمە جاساي وتىرىپ، بايدەن ءوزى ءتىپتى، جارىستان باس تارتقان جاعدايدا پارياسىنىڭ جەڭىپ شىعۋ مۇمكىندىكتەرىن باعالاۋ ءۇشىن قوعامدىق پىكىرگە سۇراۋ سالۋدى تاپسىرعانىن حابارلادى.

17 شىلدەدە بايدەنگە كوروناۆيرۋس ينفەكتسياسى دياگنوزى قويىلدى. ساياساتكەر سايلاۋالدى ءىس-شارالاردى توقتاتىپ، ۆاشينگتوننان كەتىپ، دەلاۆەردەگى جازعى ۇيدە كارانتينگە ءتۇستى.

دەموكراتتاردىڭ پارتيالىق سەزى 19-22 تامىزدا چيكاگودا وتەدى. ماۋسىم ايىنىڭ باسىندا اياقتالعان ىشكى پارتيالىق سايلاۋدىڭ قورىتىندىسى بويىنشا بايدەن - پرەزيدەنتتىككە ۇسىنۋ ءۇشىن پارتيا دەلەگاتتارىنىڭ قاجەتتى داۋىس سانىن جيناعان جالعىز كانديدات.

الايدا دەموكراتيالىق پارتيانىڭ ۇلتتىق كوميتەتى سەزگە ەكى اپتا قالعاندا، تامىز ايىنىڭ باسىندا، ءوز كانديداتىن وگايوداعى بيۋللەتەندەرگە ەنگىزۋ ءۇشىن قۇجاتتاردى تاپسىرۋ مەرزىمىن وتكىزىپ الماۋ ءۇشىن پارتيا دەلەگاتتارىن "ۆيرتۋالدى قايتا تىركەۋدى" وتكىزۋدى جوسپارلاعان بولاتىن.

دەموكراتتاردىڭ كوزىرى كىم؟

جەرگىلىكتى زاڭناماعا سايكەس، ولار 7 تامىزدا اياقتالدى. بىراق جاقىندا شتات گۋبەرناتورى ولاردى قىركۇيەكتىڭ باسىنا دەيىن ۇزارتقان زاڭعا قول قويدى. الايدا، قۇجات 1 قىركۇيەكتە عانا كۇشىنە ەنەدى. سوندىقتان دەمپارتيانىڭ ۇلتتىق كوميتەتى مەرزىمىنەن بۇرىن داۋىس بەرۋ ارقىلى ىقتيمال زاڭ پروبلەمالارىن بولدىرماۋعا ۇمىتتەندى.

دەموكراتتاردان پرەزيدەنتتىككە ۇمىتكەرلەردىڭ قاتارىندا سەناتور مارك كەللي, كولىك ءمينيسترى پيت بۋتتيدجيچ, سونداي-اق گۋبەرناتورلار گەۆين نيۋسوم, گرەتحەن ۋيتمەر، دجوشۋا شاپيرو، ۋەس مۋر جانە باسقالاردىڭ ەسىمدەرى بار.

ال جو بايدەننىڭ ءوزى دەموكراتتاردىڭ ۇمىتكەرى رەتىندە ۆيتسە-پرەزيدەنت كامالا ءحارريستى ۇسىناتىنىن جانە ونىڭ كانديداتۋراسىن قولدايتىنىن مالىمدەدى.

كامالا ءحارريستىڭ ءوزى دە پرەزيدەنتتىك دودادان كەتارى ەمەس ەكەنىن اشىق ءبىلدىردى. ال الدىن الا ساۋالنامالار بويىنشا، ءحارريستىڭ رەيتينگى ترامپتىڭ رەيتينگىن قۋىپ جەتىپ قالعان.

Abai.kz