پاريج 2024: اشىلۋ ءراسىمى... وزەندە وتەدى
![](https://abai.kz/content/uploads/2024/07/1720004477.png)
26 شىلدە كۇنى پاريج وليمپياداسى جالاۋىن كوتەرەدى.
2024 جىلعى جازعى وليمپيادا جەر بەتىندەگى اسا ءبىر «قوي ۇستىنە بوزتورعاي جۇمىرتقالار» تىنىش كەزەڭگە تۋرا كەلىپ تۇرعان جوق، الايدا ۇيىمداستىرۋشىلار سپورت مەرەكەسىنىڭ مەيلىنشە ءساتتى دە بەيبىت ءوتۋى ءۇشىن بارىن سالىپ جاتىر. فرانتسۋزدار وليمپيادانىڭ اشىلۋ سالتاناتىنىڭ ءوزىن ەرەكشە ەتىپ جوسپارلاپتى. ادەتتە «وليمپيادا»، «اشىلۋ ءراسىمى» دەگەن كەزدە جۇرتتىڭ كوز الدىنا جانكۇيەرگە لىق تولى ستاديون، 200-گە تارتا قاتىسۋشى ەلدەردىڭ مىڭداعان سپورتشىلارىنىڭ قازداي تىزىلگەن سالتاناتتى شەرۋى، ت.ب. ەلەستەيدى عوي. فرانتسيا بۇل جولى قاساڭ ۇلگىدەن قاساقانا قاشىپ وتىر.
راس، وسى جۇما كۇنگى وليمپيالىق ويىنداردىڭ اشىلۋ سالتاناتىندا دا الەم سپورتشىلارىنىڭ شەرۋى بولادى، بىراق ولار ستاديوندا ەمەس... ءپاريجدى قاق جارىپ وتەتىن سەنا وزەنىنىڭ بويىمەن جۇرەدى! وزەن عانا ەمەس، بۇكىل پاريج قالاسى اشىلۋ ءراسىمىنىڭ تۇتاس الاڭىنا اينالماق. ۇيىمداستىرۋشىلار ستسەناريدى ءالى دە بارىنشا قۇپيا ساقتاپ وتىر، دەگەنمەن قاتىسۋشىلار شەرۋىن ستاديوننان وزەن بەتىنە الىپ شىعۋدىڭ ءوزى – از توسىنسىي ەمەس. جەر جۇزىنەن كەلگەن 6 مىڭداي سپورتشىنىڭ 85 قايىق-بارجاعا ءمىنىپ سەنا بەتىمەن سالتاناتتى تۇردە ءجۇزىپ ءوتۋىن كوزىڭىزگە ەلەستەتىڭىزشى – مۇلدە كۇتپەگەن كورىنىس قوي! وزەننىڭ قوس جاعالاۋىندا ولارعا اۋستەرليتس كوپىرى مەن ەيفەل مۇناراسى، ەليسەي الاڭى مەن پاريج قۇداي-انا عيباداتحاناسى قول بۇلعاپ، ءسات-ساپار تىلەيدى – كەرەمەت ەمەس پە؟
مۇنداي ستسەناري، ارينە، ءبىرىنشى كەزەكتى تەلەاۋديتوريانى تاڭعالدىرۋ تالابىنان تۋىنداپ وتىر، بىراق فرانتسياداعى وليمپيادانىڭ اشىلۋىن ءوز كوزىمەن كورگىسى كەلگەندەردىڭ دە ۇتىلمايتىنى انىق. ەگەر الەمدەگى ەڭ ۇلكەن ستاديوننىڭ ءوزى ارى كەتسە 100 مىڭ ادام عانا سىيعىزا السا، سەنا وزەنىنىڭ قوس جاعالاۋىنان اشىلۋ سالتاناتىن شامامەن 500 مىڭداي ادام تاماشالاي الماق. وزەننىڭ ەكى جاعاسىنا دا تريبۋنالار ورناتىلعان، راس، بيلەت باعاسى ۇشىپ-اق تۇر دەسەدى. دەگەنمەن تاماشانى تەگىن كورەتىندەر دە جوق ەمەس، ولار – بالكونى مەن تەرەزەسى سەناعا قاراعان كوپقاباتتى ۇيلەردىڭ تۇرعىندارى.
«ءيا، سپورت مەرەكەسىنىڭ اشىلۋ سالتاناتىن وزەندە ۇيىمداستىرۋ – ستاديوندا وتكىزۋگە قاراعاندا اناعۇرلىم كۇردەلى، – دەيدى ءراسىمنىڭ شوۋ-دۋمان جاعىن باسقارۋشى مامان توني ەستانگە France Press اقپارات اگەنتتىگىنە بەرگەن سۇحباتىندا. – الايدا مۇنىڭ كورەرمەنگە اسەرى مۇلدە بولەك بولاتىنى ءسوزسىز. ءبىز ءۇشىن ەڭ ماڭىزدىسى وسى».
ءۇش ساعاتقا سوزىلاتىن اشىلۋ سالتاناتىنا 3 مىڭعا جۋىق، ءبيشى، ءانشى، ارتيست قاتىسادى. سولاردىڭ ىشىندە R&B ستيلىندە ءان ايتاتىن ساحنا جۇلدىزى ايا ناكامۋرا دا بار. ونىڭ بۇل راسىمگە قاتىسۋ-قاتىسپاۋىنىڭ ءوزى ءبىراز داۋ-دامايعا ۇلاستى ء(بىز ول جانجالدىڭ جاي-جاپسارىن جاقىندا ارنايى جازامىز). ارتيستەر وزەن بەتىندە عانا ەمەس، قوس جاعالاۋدا دا، ايگىلى ساۋلەت ەسكەرتكىشتەرى ماڭىندا دا ونەر كورسەتەدى. اشىلۋ ءراسىمىنىڭ جارتىسىنان استامى كۇن شىعىپ تۇرعاندا وتەدى، ال قاراڭعى تۇسكەن سوڭ ۇيىمداستىرۋشىلار عالامات جارىق شوۋىمەن تاڭعالدىرماق.
سونداي-اق اشىلۋ سالتاناتىنىڭ شوۋ-دۋمان بولىگىندە تاعى ءبىر توسىنسىي بولادى دەسەدى. ياعني الەمدىك دەڭگەيدەگى الدەبىر ءانشىنى كورىپ قالۋىمىز دا عاجاپ ەمەس. ونىڭ كىم ەكەنى ازىرگە قۇپيا، ايتسە دە، ونىڭ كانادالىق ەسترادا جۇلدىزى سەلين ديون بولۋى مۇمكىن دەگەن قاۋەسەت قازىردىڭ وزىندە تاراپ كەتتى.
ساكەن سىبانباي
Abai.kz