پاريج-2024: العاشقى جانجال
![](https://abai.kz/content/uploads/2024/07/a-9.jpg)
وليمپيادانىڭ اشىلۋ سالتاناتى وتپەي جاتىپ، شۋ شىقتى.
جازعى وليمپيالىق ويىندار رەسمي تۇردە ەرتەڭ، 26 شىلدە كۇنى اشىلادى. الايدا، كەيىنگى جىلدارى قالىپتاسقان ءداستۇر بويىنشا، سپورتتىڭ كوپ ويىندى قاجەت ەتەتىن كەيبىر تۇرلەرى اشىلۋ سالتاناتىن كۇتپەي-اق جارىستى باستاي بەرەتىنى بەلگىلى. كەشە، 24 شىلدەدە ەرلەر اراسىنداعى فۋتبول تۋرنيرىندە ءبىرىنشى تۋردىڭ ويىندارى ءوتتى.
الدىمەن ويىن ناتيجەلەرىنە كوز جۇگىرتىپ الايىق:
«ا» توبى. فرانتسيا – اقش – 3:0, گۆينەيا – جاڭا زەلانديا – 1:2.
«ۆ» توبى. ارگەنتينا – ماروككو – 1:2, يراك – ۋكراينا – 2:1.
«س» توبى. وزبەكستان – يسپانيا – 1:2, ەگيپەت – دومينيكان رەسپۋبليكاسى – 0:0.
«D» توبى. جاپونيا – پاراگۆاي – 5:0, مالي – يزرايل – 1:1.
جالپى العاندا جايماشۋاق وتكەن ويىنداردىڭ شىرقىن بۇزعان جانجال ارگەنتينا – ماروككو ماتچىنىڭ سوڭىندا بولدى. ماروككو فۋتبولشىلارى 2:1 ەسەبىمەن ۇتىپ جاتتى، شۆەد تورەشىسى گلەنن نيۋبەرگ نەگىزگى 90 مينۋت اياقتالعان سوڭ تاعى دا 15 (!) مينۋت قوستى. اقىرى بۇل قوسىمشا ۋاقىت تا وتە شىقتى، ال ساعات ءتىلى 16-مينۋتتى كورسەتىپ تۇرعان كەزدە ارگەنتينا قۇراماسىنىڭ ويىنشىسى كريستيان مەدينا گول سوعىپ، ەسەپتى تەڭەستىرىپ كەتتى!
قولدا تۇرعان جەڭىستىڭ سۋسىپ كەتكەنىنە نارازى بولعاندىقتان با، الدە 15 مينۋتتان سوڭ ماتچتى توقتاتپاي، ارگەنتينالىقتاردىڭ ەسەپتى تەڭەستىرۋىنە مۇمكىندىك بەرىپ قويعان تورەشىگە دەگەن ىزادان با، بالكىم، ءتىپتى ونىڭ وسى شەشۋشى گولدى وفسايدتان سوعىلسا دا (سونداي كۇدىك بولدى) ەسەپتەۋگە ىڭعاي بىلدىرگەن ارەكەتىنە اشۋلانعاننان با – ايتەۋىر قىزۋقاندى ماروككولىق جانكۇيەرلەر سول ساتتە جاسىل الاڭعا لاپ قويدى. ستاديونداعى ءتارتىپ جاعىن قاداعالاۋعا ءتيىس ستيۋاردتار مەن ساقشىلار ولارعا يە بولا الماي قالدى. گولعا قۋانىسىپ، ءبىرىن-ءبىرى قۇتتىقتاپ جاتقان ارگەنتينا فۋتبولشىلارىنا تريبۋنادان سۋسىننان بوساعان بوتەلكەلەر، تەمەكى تۇتاندىرعىشتار، ءتىپتى پەتاردالار لاقتىرىلدى. تورەشى ويىندى شۇعىل توقتاتىپ، قاۋىپسىزدىك جاعىن ويلاپ، فۋتبولشىلاردى جاسىل الاڭنان تريبۋنا استىنداعى باسپانا-جايعا الىپ كەتۋگە ءماجبۇر بولدى.
ويىن ءبىتتى مە؟ جوق. تورەشى نيۋبەرگ ماتچتىڭ بىتكەنىن ءبىلدىرىپ، ىسقىرىق شالعان جوق. ايتسە دە، ءتارتىپ ساقشىلارى جانكۇيەرلەردى ويىندى اياقتالعانىنا سەندىرىپ، سابىرعا شاقىرىپ، اقىرى ولاردىڭ ستاديوننان شىعۋىن تالاپ ەتتى. ارادا ەكى ساعاتقا جۋىق ۋاقىت وتكەن سوڭ، تورەشى ەكى كوماندانىڭ فۋتبولشىلارىن جاسىل الاڭعا قايتا شاقىرىپ (بۇل كەزدە ستاديوندا ەشقانداي كورەرمەن قالماعان ەدى), ويىندى جالعاستىردى. الدىمەن ول اۋادا قولىمەن مونيتور ۇلگىسىن سىزىپ، ۆار (رەفرەريدىڭ ۆيدەر اسسيستەنتى) جۇيەسىنە جۇگىنەتىنىن كورسەتتى دە، الاڭ جيەگىندەگى تەلەەكرانعا ءۇڭىلدى. شاماسى، ويىن توقتاپ تۇرعان ەكى ساعاتتىڭ ىشىندە الگى سوڭعى گول سوعىلعان داۋلى كورىنىستى بىرنەشە رەت قايتالاپ كورىپ، ناقتى شەشىمگە كەلىپ العان بولۋى كەرەك، تورەشى كوپ ۇزاماي-اق ك.مەدينانىڭ گولى وفسايدتان سوعىلعانىن، سوندىقتان دا ەرەجە بويىنشا ەسەپكە الىنبايتىنىن حابارلادى. سوسىن ويىنعا تاعى ەكى مينۋت قوسقانىن كورسەتىپ (قايدان الىنعان 2 مينۋت – مۇلدە تۇسىنىكسىز!), كوماندالار از-كەم ويناعان بولدى. ەكى مينۋت ىشىندە، ارينە، ناتيجە وزگەرگەن جوق – 2:1 ەسەبىمەن ماروككو كومانداسى ارگەنتينانى جەڭىپ كەتتى.
«فۋتبولدا جۇرگەنىمە قانشا جىل بولدى، مەن مۇنداي تسيركتى ەشقاشان كورگەن ەمەسپىن» دەدى ۋىسىنا ىلىككەن ۇپايدان ايرىلىپ قالعان ارگەنتينا وليمپيالىق قۇراماسىنىڭ باس باپكەرى حاۆەر ماسكەرانو. «بۇل – تاريحتا بولماعان ماسقارا! ءبىز 1 ساعات 40 مينۋت بويى ەندى نە بولاتىنىن بىلمەگەن كۇيى دال بولىپ وتىردىق. بىزگە ەشكىم دە ەشتەڭە ايتىپ، تۇسىندىرگەن جوق. ۇيىمداستىرۋ دەڭگەيى وسىنداي بولسا، جەتىسكەن ەكەن» دەدى كوماندا كاپيتانى نيكولاس وتامەندي.
وليمپياداداعى فۋتبول تۋرنيرىندە 2-تۋر ويىندارى 27 شىلدەدە وتەدى.
ساكەن سىبانباي
Abai.kz