قازاقستان پرەمەر-ءمينيسترىنىڭ
ورىنباسارى ت. دۇيسەنوۆا حانىمعا!

جاقىندا – 22 شىلدەدە «قازاقپارات» حالىقارالىق اقپارات اگەنتتىگى «باسقا ەلدەردەن كەلگەن ەتنيكالىق قازاقتارعا 55 «اتا جولى» كارتاسى بەرىلدى» دەگەن اقپارات تاراتتى.

اتالعان اقپاراتتا: «جەرگىلىكتى اتقارۋشى ورگاندارعا «اتا جولى» كارتاسىن الۋعا بارلىعى 75 ءوتىنىم ءتۇستى. 2023 جىلى 44 كارتا: بيزنەس-يمميگرانتتارعا 20 كارتا جانە سۇرانىسقا يە ماماندارعا 24 كارتا بەرىلدى. بيىل 11 كارتا بەرىلدى: بيزنەسمەندەرگە 5 جانە سۇرانىسقا يە ماماندارعا 6 كارتا»، - دەپ جازىلىپتى.

سونداي-اق: «كارتا يەگەرلەرى (جانە ولاردىڭ وتباسى مۇشەلەرى) مىناداي قۇقىقتارعا يە»، - دەپ مىناداي قۇقىقتاردى تىزبەلەپ كورسەتىپتى:

– مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينالىق مەكەمەلەردە الەۋمەتتىك تولەمدەر الۋ جانە قىزمەت كورسەتۋ;

– قر ەڭبەك كودەكسىنە جانە «حالىقتىڭ كوشى-قونى تۋرالى» قر زاڭىنا سايكەس قازاقستان اۋماعىندا جۇمىسقا ورنالاسۋ;

– قر كاسىپكەرلىك كودەكسىنە جانە وزگە دە قۇقىقتىق اكتىلەرىنە سايكەس قازاقستان اۋماعىندا كاسىپكەرلىك قىزمەتتى جۇزەگە اسىرۋ;

– «ءبىلىم تۋرالى» قر زاڭىنا سايكەس مەملەكەتتiك بiلiم بەرۋ ۇيىمدارىندا تەگiن ورتا بiلiم الۋ، مەملەكەتتiك ورتا ارناۋلى جانە/نەمەسە جوعارى وقۋ ورىندارىندا كونكۋرستىق نەگiزدە تەگiن ورتا ارناۋلى جانە/نەمەسە جوعارى بiلiم الۋ، جەكە وقۋ ورىندارىندا اقىلى ءبىلىم الۋ;

– «ادۆوكاتتىق قىزمەت جانە زاڭ كومەگى تۋرالى» قر زاڭىنا سايكەس مەملەكەت كەپىلدىك بەرگەن زاڭ كومەگىن الۋ;

– ازاماتتىق سالاسىنداعى حالىقارالىق شارتتارعا جانە قر زاڭنامالىق قۇقىقتىق اكتىلەرىنە سايكەس جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋ.

ءبىر قىزىعى، «اتا جولى» كارتاسىن العان ەتنيكالىق قازاقتارعا بەرىلگەن بۇل قۇقىقتاردى ءسىز قازاقستاننىڭ ەشبىر زاڭىنان تاپپايسىز.

جوق!

ءتىپتى، «حالىقتىڭ كوشى-قونى تۋرالى» زاڭىندا دا جوق!

«حالىقتىڭ كوشى-قونى تۋرالى» زاڭىنىڭ 25-بابىندا «قانداس» مارتەبەسىن جانە «اتا جولى» كارتاسىنىڭ قولدانىلۋىن توقتاتۋ», 25-1-بابىندا «اتا جولى» كارتاسىن بەرۋدەن باس تارتۋ ءۇشىن نەگىزدەرى» عانا قاراستىرىلعان.

«اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى مۇلدە قاراستىرىلماعان!

سوعان قاراماستان، قازاقستان پرەمەر-ءمينيسترىنىڭ ورىنباسارى - قازاقستان رەسپۋبليكاسى پرەمەر-ءمينيسترىنىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا حانىم قاتىستى بەس-التى مينيسترلىكپەن كەلىسە وتىرىپ، «شەتەلدە تۇراتىن ەتنيكالىق قازاقتار ءۇشىن «اتا جولى» كارتاسىن ۇسىنۋ قاعيدالارىن» 2023 جىلعى 30 ماۋسىمدا №280 بۇيرىعىمەن تاستاي قىلىپ بەكىتىپ قويعان.

بۇل بۇيرىقتا دا ونداي «قۇزىرەتتەر» كورسەتىلمەگەن.

سوندا، «اتا جولى» كارتاسىن العان  ەتنيكالىق قازاقتارعا ەشبىر زاڭدا جوق بۇنداي قۇزىرەتتەردى تامارا دۇيسەنوۆا حانىم قالتاسىنان شىعارىپ بەرە مە؟!  بۇل – ءبىر!

ەكىنشىدەن، سونشا دۋىلداتقانداعى «اتا جولى» كارتاسىن العان  ەتنيكالىق قازاقتارعا «بەرىلگەن» «قۇزىرەتتىڭ» سىيقى وسى بولسا، جەتىستىرگەن ەكەن!

قۇداي-اۋ، سوندا، تەك، مەرزىمى ون جىلعا دەيىن بەرىلەتىنى بولماسا، «اتا جولى» كارتاسىن العانداردىڭ «قانداس» مارتەبەسىن العان اعايىننان اسىپ بارا جاتقان «قۇزىرەتىن» بۇل جەردە كورىپ تۇرعان جوقپىز!

قايتا، «قانداس» مارتەبەسىن العان اعايىننىڭ قۇزىرەتى بۇدان الدەقايدا كوپ جانە ءتيىمدى ەكەن...

تاعى ءبىر قىزىعى، ەڭبەك جانە حالىقتى الەۋمەتتىك قورعاۋ مينيسترلىگىنىڭ سايتىنان «قۇجاتتى الۋ ءۇشىن «قۇتتى مەكەن» ءموبيلدى قوسىمشاسى ارقىلى ءوتىنىش بەرۋ نەمەسە قازاقستان ەلشىلىگىنە جۇگىنۋ قاجەت...» دەگەن نۇسقاۋلىقتى كوزىم شالىپ قالدى.

ال، بىراق، «حالىقتىڭ كوشى-قونى تۋرالى» زاڭىنىڭ 10-بابىندا قازاقستان رەسپۋبليكاسى سىرتقى ىستەر مينيسترلىگىنىڭ جانە قازاقستان رەسپۋبليكاسىنىڭ شەتەلدەگى مەكەمەلەرىنە «اتا جولى» كارتاسىنا بايلانىستى قۇجات قابىلداۋ تۋرالى ونداي قۇزىرەتى بەرىلمەپتى.

بۇل نە سوندا، مازاق پا، الدە ءبىزدىڭ اتقارۋشى بيلىكتىڭ دەڭگەيى وسى ما؟!

جوق، «شەتتەگى قازاقتارعا بولا بەرەدى!» دەگەن ءبىر استامدىق پا بۇل؟!

الدە، مينيسترلەردىڭ ءبارى زاڭدى قايىرىپ قويىپ، تەك تامارا دۇيسەنوۆانىڭ ايتقانىمەن عانا جۇرەتىن بولعانى ما؟!!

ايتپاقشى، وتكەندە وسى «اتا جولى» كارتاسى تۋرالى دارحان قىدىرالى دەگەن سەناتور ماسەلە كوتەرگەنسىگەن سوڭ، ءبىز دە سەناتورعا حات (جت-2024-03929571) جازىپ، «...سەناتور رەتىندە مەنىڭ وسى جازبامدى ۆيتسە-پرەمەر تامارا دۇيسەنوۆانىڭ وزىنە جىبەرىپ، اتالعان كارتا بويىنشا سۇرۋ سالىپ، ءوز جاۋابىن الىپ بەرىڭىزشى!» دەپ، تامارا دۇيسەنوۆانىڭ پرەزيدەنتتى الداپ كەلگەن وسى جوق «كارتاسى» تۋرالى سۇراۋ سالعامىز.

دارحان قىدىرالى ول حاتىمىزدى «قازاقستان رەسپۋبليكاسى ۇكىمەتىنىڭ اپپاراتىنا» جىبەردى، سوڭىندا قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى-قون كوميتەتى» قاراپ، ءبىرىنشى ۆيتسە-مينيستر ا. سارباسوۆتىڭ قولى قويىلعان «باس دەسە، قۇلاق...» دەگەن جاۋاپ الدىق.

سونىمەن، بۇگىن تامارا دۇيسەنوۆاعا ءوز اتىمنان وسى حاتتى جازىپ وتىرمىن.

ساداعاڭ كەتەيىن، تامارا بوسىمبەكقىزى!

وسى «اتا جولى» كارتاسى دەگەن «جاڭالىق» ءسىز قازاقستان رەسپۋبليكاسى پرەمەر-ءمينيسترىنىڭ ورىنباسارى ءارى ەڭبەك جانە حالىقتى الەۋمەتتىك قورعاۋ ءمينيسترى بولىپ تۇرعان كەزدە «اينالىمعا» ەندى.

ەندەشە، «اتا جولى» كارتاسىن العان ەتنيكالىق قازاقتارعا بەرىلەدى دەگەن «قازاقپارات» حالىقارالىق اقپارات اگەنتتىگى جاريالاعان سول «قۇزىرەتتەر» قايدان شىقتى؟

ول «قۇزىرەتتەر» قاي زاڭنىڭ قاي بابىمەن قاشان بەكىتىلدى؟!

زاڭمەن بەكىتىلمەگەن مۇنداي «قۇزىرەتتى» ەتنيكالىق قازاقتار قالاي پايدالانادى؟!!

قۇداي تىلەۋىڭدى بەرسىن، تامارا بوسىمبەكقىزى!

سىزدەن ءوتىنىش، وسى سۇراقتارعا ءوز قولىڭىزدى قويىپ، ماعان جازباشا جاۋاپ بەرىڭىزشى!

ەگەر، وسى سۇراقتارىمنىڭ اربىرىنە ءوز قولىڭىز قويىلعان ناقتى جازباشا جاۋاپ بەرمەي، بۇل حاتىمدى وزگە مينيسترلىكتەرگە جونەلتە سالاتىن بولساڭىز، ءسىزدى سوتقا بەرەتىنىمدى ەسكەرتەمىن!!!

سونداي-اق، وسى جانە «حالىقتىڭ كوشى-قونى تۋرالى» زاڭىنىڭ اتىشۋلى 20-باپتىڭ 5) تارماعى تۋرالى سويلەسۋ ءۇشىن، مەنى جەكە قابىلداۋىڭىزدى سۇرايمىن.

اۋىت مۇقيبەك

Abai.kz