قازاقستاندىق تەننيسشىلەر وليمپياداداعى جارىستارىن تۇگەل اياقتادى. ءبىزدىڭ كوماندادا كورتقا شىققان الەكساندر بۋبليك پەن الەكساندر نەدوۆەسوۆ جۇپتىق سىندا جەڭىلىپ قالدى.

جۇپتىق سىنداعى جەڭىلىستەن سوڭ بۋبليك شىعىپ بۇيدەدى: «بۇل ناتيجەمىزگە باعا بەرۋ قيىن. ارينە، مۇمكىندىك بولدى. مەدالدى ايتپاعاندا، جەڭىسكە جەتۋدىڭ ءوزى قولدان كەلمەدى. قازاقستاندىقتاردان بىرنەشە ويىندا جەڭە الماعانىم ءۇشىن كەشىرىم سۇرايمىن. ساشامەن (نەدوۆەسوۆ - رەد.) سوڭعى رەت 2022 جىلى وينادىم. جۇپتاسىپ جاتتىعۋعا دا مۇمكىندىك بولمادى. بىرگە وينايتىن تاجىريبەمىز از. بىراق بۇل دا اقتالۋ ەمەس» (پىكىردى olympic.kz جاريالادى).

تەننيسشى جىگىتتەر ءۇمىتتى اقتامادى!

بۋبليك جەكەلەي سىندا العاشقى اينالىمدا جەڭىلىس تاپقان. جەكەلەي سىنداعى العاشقى اينالىمدا ول رەيتينگتە 11-ورىندا تۇرعان امەريكالىق تەيلور فريتسپەن كەزدەستى. ەكى سەتكە سوزىلعان ماتچتا بۋبليك جەڭىلىس تاپتى.

وسىنىڭ الدىندا تەننيسشى الەكساندر شەۆچەنكو پاريجدەگى وليمپيادا ويىندارىنىڭ ءبىرىنشى اينالىمىندا ۇتىلعان ەدى. شەۆچەنكو العاشقى اينالىمىندا چەحيالىق ياكۋب مەنشيكپەن كەزدەستى. ەكى سەتكە سوزىلعان ماتچتا 6:3, 6:4 ەسەبىمەن جەڭىلگەن.

بۇل تەننيستەن ەرلەر قۇراماسىنىڭ ەل نامىسى سىنالار ءتورت جىلدىقتىڭ باستى باسەكەسىندەگى كورسەتكىشتەرى.

تەننيسشى قىزدار جارىسپاي جاتىپ جەڭىلدى

ال تەننيسشى قىزدار ءتىپتى ماسقارا قىلدى. پاريجگە ۇشىپ بارىپ، بەلسەندى تۇردە جاتتىعۋلارىن جاساپ جۇرگەن يۋليا پۋتينتسەۆا اياق-استى وليمپيادا جارىستارىنا قاتىسپايتىنىن مالىمدەدى. بۇل حاباردى قر تەننيس فەدەراتسياسى جەتكىزدى.

پۋتينتسەۆا دايىندىق كەزىندە تىزەسىن اۋىرتىپ الىپتى. مەديتسينالىق تەكسەرۋدەن وتكەن سوڭ تۋرنيردەن باس تارتۋ تۋرالى شەشىم قابىلداعان ەكەن.

قازاقستان تەننيس فەدەراتسياسىنىڭ ۆيتسە-پرەزيدەنتى دياس دوسقاراەۆ اتالعان جاعدايعا قاتىستى: «پاريج وليمپياداسى ءبىز ءۇشىن سىناقپەن باستالۋدا. الدىمەن ەلەنا رىباكينا سىرقاتىنا بايلانىستى باس تارتسا، يۋليا پۋتينتسەۆا جارقاتىنا بايلانىستى جارىستى توقتاتتى. ەكى سپورتشىعا دا ۇلكەن ءۇمىت ارقان ەدىك، وكىنىشتى»، - دەدى دوسقاراەۆ.

ال ەلەنا رىباكينانىڭ جاعدايىن وسىعان دەيىن ەگجەي-تەگجەيلى جازدىق. وليمپياداعا تۋرا ءبىر كۇن قالعاندا، «دەنساۋلىق جاعدايىن» ايتىپ، وليمپياداعا بارۋدان باس تارتقان. دارىگەرلەر وعان «كورتقا شىقپاق تۇگىلى، ۇشاققا مىنۋگە تىيىم سالعانىن» ايتقان. وسىدان سوڭ، رىباكيناعا قازاقستان قوعامى وكپەسىن ءبىلدىردى. حالىقارالىق تەننيس فەدەراتسياسىنىڭ، قازاقستان تەننيس فەدەراتسياسىنىڭ ءھام رىباكينانىڭ ءوزىنىڭ اقتالۋ سوزدەرىن – سىلتاۋ دەپ قابىلدادى.

ءسويتىپ، قازاقستاننىڭ تەننيسشىلەرى تورتكۇل دۇنيە كوز تىككەن ءتورت جىلدىقتىڭ باستى باسەكەسىندە تۇك تىندىرماي قايتىپ بارادى.

ەل جۇلدە كۇتكەن قىزدار جارىسقا تۇسپەي جىعىلدى. رىباكينا مۇلدە بارماي قالسا، بارىپ تۇرعان پۋتينتسەۆا سايىسقا تۇسكەن جوق. ال ەرلەر العاشقى اينالىمنان جەڭىلىپ، جارىستى توقتاتتى. بۋبليكتىڭ ءوزى ايتپاقشى، «مەدالدى ايتپاعاندا، جەڭىسكە جەتۋدىڭ ءوزى قولدان كەلمەدى».

پاريجدەگى ساتسىزدىك – وتەمۇراتوۆتىڭ اريفمەتيكاسى ما؟

قازاقستان تەننيس فەدەراتسياسىن ۇزاق جىلداردان بەرى وليگارح بولات وتەمۇراتوۆ باسقارادى. الگى جەمە-جەمدە «برونحى» اۋىرىپ قالاتىن رىباكينانى اتتاي قالاپ، رەسەيدەن الدىرتقان دا وسى وتەمۇراتوۆتىڭ ءوزى ەدى. رىباكينانىڭ حالىقارالىق جارىستارىنا وتەمۇراتوۆتىڭ ءوزى بارىپ، تاماشالاپ جۇرگەن سۋرەتتەرى دە جەلىلەرگە سان مارتە تارالعان ەدى.
سپورتتى مونوپوليالاپ العان ولليگارح شەنەۋنىكتەردىڭ اتتاي قالاپ شەتەلدىك سپورتشىلاردى ەلگە تارتۋىن، ەلەنا رىباكينانىڭ رەسەيدەگى باپكەرىنىڭ سوزىمەن ايتقاندا «دايىن اسقا تىك قاسىق بولۋىن» ۇلت سپورتىنا بولعان جاناشىرلىقتان تۋعان ارەكەت دەپ باعالاۋ ورىنسىز بولار ەدى.

قاڭتار وقيعاسىنان كەيىن جاساعان العاشقى جولداۋىندا پرەزيدەنت توقاەۆ پرەزيدەنت نازارباەۆتىڭ بيلىگى كەزىندە ەلىمىزدە الەمدىك دەڭگەيدەگى ات توبەلىندەي ولليگارح توپتاردىڭ پايدا بولعانىن تىلگە تيەك ەتتى. نازارباەۆ جاقىندارى مەن جاقتاستارىنا تاۋەلسىز ەلدىڭ جەر استى-ءۇستى بايلىعىن عانا ەمەس، ساياسي، مادەني تەتىكتەردى دە باسقارۋعا بەردى. قازىرگى قازاقستان تەننيس فەداراتسياسىنىڭ پرەزيدەنتى بولات وتەمۇراتوۆ كەزىندە نازارباەۆتىڭ كومەكشىسى، ءىس جۇرگىزۋشىسى بولعانى بەلگىلى.

قازاق سپورتىنا قوجالىق جاساعاندار ءبىر وتەمۇراتوۆ ەمەس. تيمۋر قۇلىباەۆ ۇلتتىق وليمپيادا كوميتەتىن تىزگىندەگەن تۇستا كارىم ءماسىموۆ، اسقار مامين، دانيال احمەتوۆتەرگە دەيىن ءبىر-ءبىر فەدەراتسياعا يەلىك ەتتى. وسىدان-اق قازاق سپورتىنىڭ 30 جىل نارىقتىق باسەكەنىڭ قازانىندا ەمەس، بيلىكتىڭ نازارىندا بولعانىن بايقاۋ قيىن ەمەس.

وتەمۇراتوۆتىڭ «اريفمەتيكاسى» تۋرالى ءسوز رىباكينانىڭ وليمپياداعا بارمايتىنى تۋرالى اقپاراتتان كەيىن تاراي باستادى. سەبەبى، قازاقستان قوعامى رىباكينانىڭ تۇركيا كۋرورتىنداعى سۋرەتىنە قاراپ ونىڭ قازاقتار تولەيتىن 250 مىڭ دوللاردى قومسىنىپ، ءارى جاراقات الىپ قالۋدان ساقتانعاندىق دەپ سانايدى. ال اعىلشىن ءتىلدى «tennis.com» سايتى: «25 جاستاعى تەننيسشى سوڭعى رەت «ۋيمبلدون» تۋرنيرىنە قاتىسىپ، جارتىلاي فينالدا اقىرعى چەمپيون باربورا كرەيچيكوۆاعا جەڭىلىپ قالدى. ەندى رىباكينانىڭ نازارى سولتۇستىك امەريكاداعى حارد تۋرنيرلەرىنە اۋىپ وتىر. ول 6 تامىزدا تورونتودا رودجەرس ۇسىنعان National Bank Open تۋرنيرىندە باق سىنايدى دەپ جوسپارلانعان»، - دەپ جازدى.

وتەمۇراتوۆ بىردەڭە دەپ، تۇسىنىكتەمە بەرەر دەپ وتىرمىز... ايتپەسە، وزگەلەرىن ايتپاعاندا، ءدال رىباكينانىڭ پاريجگە بارماي قالۋى – وتەمۇراتوۆتىڭ جەكە اريفمەتيكاسى دەگەن پىكىرلەر دە استە-استە ايتىلىپ قاپ جاتىر...

Abai.kz